田徑女神靚女箭手仙氣水球隊長柔道之花睇東奧睇四大美女賞心事！

2021/07/26 05:12:09 網誌分類: 生活

26 Jul

        　　東京奧運戰況激烈，Kelly好多朋友追睇各項比賽，除咗為中港兩地運動員打氣，仲係追睇場上嘅美女，俾佢哋發現咗德國田徑女神、哥倫比亞美少女箭手、烏克蘭柔道靚女同中國水球隊嘅出水芙蓉。

        　　被選為「世界最性感運動員」嘅德國田徑女神舒密特（Alica Schmidt），唔單止樣靚，仲擁有高挑身材，同埋飄逸嘅金髮，絕對喺跑道上一道賞心悅目嘅風景。今年二十二歲嘅舒密特，有唔少忠實粉絲，但佢好謙虛，話知識同自信先令人變得更好。佢近年受傷患所困，今屆奧運將以後補選手身份參戰接力賽。Kelly真係好希望佢出場，一定提高收視率。

        　　哥倫比亞二十一歲嘅美少女箭手艾歌絲達（Valentina Acosta），擁有深邃輪廓，濃眉大眼，同埋甜美燦爛笑容，十足十卡通公主一樣。艾歌絲達射箭時仲超級有型，被網民封為「愛神丘比特」，唔少網民留言話「射中我的心了」。佢喺周三將會出戰射箭女子個人排位賽，三十二強淘汰賽。

        　　盛產美女嘅烏克蘭同樣有代表，二十一歲嘅柔道女神比露迪（Daria Bilodid），擁有完美嘅九頭身、精緻五官、筆直長腿，同埋火辣嘅完美體態，真喺男女通殺。有「烏克蘭巨蟒」之稱嘅佢，出身柔道世家，曾經有全年不敗紀錄，前日拎埋東奧柔道女子四十八公斤級銅牌，真喺又睇得又打得呀！

        　　講到女神，當然唔少得中國隊，二十三歲嘅國家女子水球隊隊長熊敦瀚，加入水球隊近十年，有實力又有顏值。五官精緻嘅佢，有一雙炯炯有神嘅大眼睛、高鼻樑同埋白裏透紅的膚色，好多網友形容佢係「根本撞臉張栢芝」。

        Kelly Chu