2~5/8 26000穿梭.好淡通殺

2021/08/02 21:11:21 網誌分類: 經濟

02 Aug

8月開新局重上26000水平, 惟科企沽壓湧現

2/8 周一恆指收26235, 大升274點

港股成也QQ上証.敗也QQ上証

今日港股跟隨內地股市急升, 力守25700向上攻, 惟仍受制於26300水平, 收升274點, 已收復上周五大部份失地, 技術指標進一步改善, 按照慣性走勢今個星期係收升周, 好友會反擊, 但估計只係短暫反彈, 因為今個月由淡倉主導大市, 期權倉位淡倉高達64%, 26/7下跌裂口26878~27222有淡友重兵攔路

上証大升67點收3464, 成交急增, 老外繼續掃A股, 只要上証企穩關鍵大位3450, 有助恒指進一步挑戰26500關鍵阻力大位, 好友或會推我逃命, 滬深大媽繼續沽出QQ及美團(換入車股), 係科指全日受壓的主因, 科企沽壓未除, 港股走不遠

匯市方面, 美國十年期債息下跌, 美元止跌回升, 人民幣結束三連升, 惟僅收跌49點子報6.4609, 人仔仍處偏強水平, 港匯回軟, 貼價只得超瘦牛熊, 8月業績期, 小心股份見光死, 匯控.恒生(2/8)打頭陣, 阿里巴巴(3/8), 中芯國際.長和.長實(5/8)

27/7創今年新低見24748後拗腰上, 收25086, 當大市成交額高達$3606億 , 創有紀錄以來最多, 大成交創新低係見底訊號, 隨後港股反覆急升, 好友奪回主導權, 反彈目標26500, 26800關鍵位阻力大, 如果24748只係短底, 代表中線仍會再下試, 破底或者做第二隻腳

上周港股暴跌後展開反彈浪, 但股災氣氛差, 全民皆艇, 彈上去就會惹來龐大沽壓, 蟹貨出籠, 今次急升係超賣的技術性反彈, 恐慌性拋售跌過籠, 往後多數會急彈, 死貓彈完就會繼續尋底, 上証與港股同步尋頂, 當上証見頂, 港股就會反艇,

8月開新局, 初生BB牛熊都非常貼價, 要上攻下殺來擴大周.月及年波幅, 順道開餐, 向上挑戰26300~26500, 向下繼續回補上升裂口25520~25857

港股爆升, 好明顯係挾淡, 想推上去靚價派貨, 挾淡逼空軍回補空倉係最有效的推升手法, 不過QQ蟹貨多到不得了, 冇莊家睇場, 只係大鱷大媽挾淡倉, 炒上落來操控大市

由低位24748反彈1000~1500點可見26250, 再上就係挾淡升過龍, 阻力位26300~26500, 升穿不難, 企穩不易, 由24748反彈至26335, 升幅1587點, 已夠水位俾大鱷轉身, 具有高傳染性Delta 變種病毒全球肆虐, 令新冠疫情進一步惡化, 窒礙經濟復甦步伐

美國證交會要求中企披露政府監管風險, 盈富基金為配合白宮的禁令, 禁止美國投資者購買盈富, 白宮禁止美資買賣中資股, 加上阿爺的監管措施沒完沒了, 皆不利市場氣氛, 美國十年期債息持續失守1.3%後續跌, 連1.2%都插穿, 怪不得金融股捱沽,

按照慣性走勢, 月初開新局會踢上去向上擴大周及月波幅, 當受阻而回才尋底, 由於中港股市同步觸底後掉頭向上, 港股何時見頂及破底就要看上証, 恒指連跌兩個月, 有財演指, 根據歷史統計, 七八月升跌多數係打孖, 即係7月跌, 8月亦跌, 不過今年7月係股災, 跌幅驚人, 未知會否跟慣性走勢

${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$

港股急跌急彈, 收復失地, 26000穿梭, 部署屠熊

3/8 周二恆指收26194, 跌41點, 反彈在望

今日港股雖然飛天(高見26289)遁地(低見25774), 上攻下殺, 大幅波動, 但原來牛熊都係到嘴邊食唔到, 按照大鱷的習性, 餓左成日, 明日會開餐, 熊熊命危

今日高開見26289就碌落山, 其後急跌急彈, 在26000穿梭, 以往呢種格局都係引淡友熊熊入局, 結果牛熊都進場, 目前牛熊分布為6:4, 以恒指即市波幅閒閒地500點來看, 牛熊都貼價(25750 VS 26300), 熊較近, 十分肥美, 向上阻力26300~26500, 如收市能上企, 就會挑戰26800來擴大周及月波幅, 向下支持25500~25700, 如失守不妙, 代表淡友已奪回主導權

27/7見底24748後展開反彈浪, 底部上移24848.25857.25636.25743.25774, 往後當底部下移就要慎防港股已見頂, QQ受官媒批評手遊為「精神鴉片」的利淡消息打擊, QQ一度急跌一成低見$423.6, 午後文章突然收起, 推動QQ等一眾科企急彈, 收窄跌幅, 估計科企淡友於低位回補空倉, 亦有科企撈底盤趁低吸納, 今日科企沽壓沉重, 監管措施一浪接一浪, 市場沽貨避險情緒高漲, 滬大媽大手沽出QQ.中芯.美團及小米, 但老外上午沽A股, 午後就大舉掃A股, 係利好訊號

根據往績, 大市觸底反彈都會反覆向上, 維持5~7日, 上周二(27/7)見底, 代表目前港股仍處反彈勢頭, 今日有重量級利淡消息港股都唔死, 亦冇插穿昨日低位, 大鱷操控大市如入無人之境, 部署上攻態度明顯, 本周上証收升機會大, 港股同步的話, 周線亦會收升, 趁反彈減磅, 因港股累積沽空大, 淡友隨時會反擊, 寧願等回吐再低吸

上証雖然收跌16點報3448, 但消費壽險等多個A股板塊都造好, 道指連跌3天, 以往連跌2~3天就會反彈, 往後港股走勢就要看中美股市表現, 上証能否重上3450, 以及監管措施對科企的負面影響會持續多久, 大媽洗倉潮何時結束, 正路今晚在美上市中概股要捱沽, 本周恒指高低位25743~26300, 周波幅只得557點, 遠遠未達標, 預示未來幾日就要爆邊,

如本周收升, 明日就會升穿昨日高位26300來擴大周波幅, 向上每百點都有熊熊, 亦有上攻誘因, 根據過往幾次創新低後的走勢, 見底後的一周都係收升, 按此推算, 本周五會收25961/9233之上, 不過要小心本周彈完下周淡友就會反擊

港股急升急回, 收窄升幅, 秒殺肥熊即回, 高處不勝寒

4/8 周三恆指收26426, 升231點, 日升日跌

上周中港股市深潛, 本周齊齊作出反彈, 同步尋頂, 今日恒指沖上去26650, 一做夠即市日波幅及周波幅, 大鱷就縮手, 港股就掉頭向下, 可能係因為26700~27000只得瘦熊, 26500關鍵位得而復失, 短炒好友今日推上去可能已食胡, 未平倉淨數減少, 今次反彈浪恒指有接近二千點升幅, 可能已到水尾,

上証收升29點報3477, 重上3450關鍵大位, 以全日最高位收市, 午市曾說今早上証造好, 但指標股茅台內銀內險A股都下跌, 其實不但拉住上証後腿, 亦拖累相關H股, 內銀內險H股逆市下跌, 所以話呢! 中港股市係同一方向, 炒港股就要分析A股, 見內銀內險A股唔掂, 就知港股會腳軟, QQ等科企只係急跌後的技術性反彈, 高位沽壓加劇, 紛紛衝高回落, 利淡手遊股消息仍在發酵, 港股業績期已展開, 小心股份見光死

滬深大媽齊齊掃入QQ, 推動港股一度大幅反彈456點, 不過高見26650就掉頭回落, 股民於26/7龐大下跌裂口26878~27222關前紛紛沽貨, 人心虛怯, 港股仍然係升市成交縮, 跌市成交大, 一彈上去就惹來沽壓

每周通常係升2~3天, 如今係2升1跌, 跌市日數未達標, 港股每周通常有兩個方向, 周初急升, 近周末淡友就會反擊, 8月開局港股雖然反覆急升, 但亦不應太樂觀, 今個月有22個交易日, 日數太多, 大鱷多數玩好淡通殺, 不會走單邊向上, 即市飛天遁地, 唔俾股民捉到路, 今個星期六(7/8)轉節氣立秋, 小心港股會變盤, 美元進一步上升, 港匯再度轉弱, 淡友等緊中美股市見頂回落, 就有藉口出手,

過去7日恒指收市U盤都係大幅踢高, 但今日卻向下走, 係利淡訊號, 今日港股急升係由大媽推動, 大媽再掃入QQ穩住了港股, 今個月能否突破26800阻力大位來擴大月波幅就要看上証, 因兩地股市係同步尋頂, 同步見頂回落, 不進則退,

以往美股都係燒煙花, 於高位反覆, 升得好地地, 失驚無神插一大棍, 到時可能係港股掉頭向下之時, 根據統計數據美股7月係燒煙花, 8月份收跌機會大, 美股基金大戶一直減倉止賺, 手持大量現金, 但美股散戶卻蜂湧入市, 有濃濃的派貨味, 但新冠疫情惡化, 加上美國十年期債息跌跌不休, 資金追捧美國科企, 納指愈升愈有, 美股高企不下, 穩住了全球股市, 港股亦由低位大幅反彈,

5/8 周四恆指收26204, 跌221點, 日升日跌

踏入8月份, 中港股市反覆上升, 上証咬住3450唔放, 恒指亦連續四日收26000之上, 港股技術指標改善, 沽空比率已是連續5日縮減, 今日只得12.02%, 為兩周以來最低, 反映本周由好友主導大市, 今個星期不會大插, 下星期港股表現就要看上証能否上破3500

昨日恒指創月內新高, 今日收跌呈陰燭, 利淡, 如明日收跌, 即係連跌兩天, 就打破了日升日跌的慣性走勢, 收市如能守住26000水平, 代表好友仍未放手, 明日係周五, 有周末沽壓效應, 今個月有22個交易日, 日數太多, 跌下彈下, 好淡通殺有排玩

大媽昨日掃QQ, 推動港股急升, 今日大媽沽QQ, 港股就反艇, 港股升跌由大媽話事, 自從加股票印花稅死線過後, 1/8起無需急於走鬼, 大媽不再單邊沽貨, 係抽高QQ/美團再沽, 如果跟慣性走勢, 今個星期會係收升周, 理應收25961/9233之上, 人民幣回穩, 連升兩天, 今日恒指即市波幅收窄, 大鱷想養牛熊, 結果牛熊都進場, 26000邊有幾十張貼價瘦牛, 肥熊在26600樓上

今日老外沽A股, 大媽沽港股, 係中港股市齊齊下跌的原因之一, 內銀A股愈跌愈有, 走勢差劣, 未有受惠於今次反彈浪, 工行H股更創一個月新低,

踏入8月份的4個交易日, 恒指每日都係上午創即市低位, 然後買番上去, 但今日卻是尾市創低位, 即係由開市一路沽到收市, 代表沽壓沉重, 淡友出手, 必有後著, 要看明日隊落去淡友會否食胡平倉, 好友會否推番大市上去畫周線收升收陽

27/7恒指低見24748後拗腰向上, 於尋頂期間, 恒指收市U盤連續6日都係大大力踢高(黑箱作業累計升288點), 但昨日收市U盤卻走低, 當時估好友已食胡, 本周唔會再殺上去, 今日港股不妙, 但大鱷仍能托左半日, 派貨及引股民入局, 午後就插水, 今日收市U盤亦係走低, 即係要落山

27/7見底24748後展開反彈浪, 底部上移24848.25857.25636.25743.25774.26009.26126, 如跌穿前底或收於其下, 底部下移, 代表向上趨勢已逆轉, 如能守住26000仲未死得, 根據往績, 大市觸底反彈會反覆向上, 維持5~7日就會掉頭向下, 上周二(27/7)見底, 昨日見頂, 剛好彈了6天, 按照慣性走勢, 如果未見大頂, 由高位26650嘔500~800點就要再沖頂, 如插逾千點仍唔彈, 就係見頂訊號

2~5/8 26000穿梭.好淡通殺

網誌分類

已關注

最新網誌

最新回應

月曆