10~11/8 連升兩周見頂回落

中港股市同步於7月尾急挫後展開反彈浪, 本周港股急跌急彈, 昨日低見25920, 向下擴大了周波幅, 今日高見26611, 向上擴大了周波幅, 呈反覆上升勢頭, 後市如能上破26611及前頂, 就可進一步擴大周波幅,

按照慣性走勢, 周三四五係創周高位的時間窗口, 不過過去幾個月恒指通常連升2天就回吐, 最長亦只係升3天, 26800~27000阻力非輕, 不易一舉突破, 就算升穿26800, 但淡友有重兵駐守27200及27600攔路, 當港股上攻受阻而回, 就會繼續尋底之旅

港股技術指標向好, 企穩10天線反覆向上推進, 大漲小回, 係典型尋頂格, 新舊經濟股輪流接力推高大市, 港股何時見頂就要看上証及QQ, 當QQ見頂, 港股就彈完, 牛熊分布方面, 26108(牛) VS 26650(熊), 整體牛熊數量: 7055張牛 VS 5653張熊, 熊熊愈養愈肥, 非常貼價, 26650樓上肥熊要買定官才

港股升唔喜.跌唔樂, 向下有上升裂口25520~25857未全數回補是後患, 向上有26/7下跌裂口26878~27222淡友攔路, 目前港股就跟住上証及QQ騰上騰落, 上証表現亮麗, 連升兩天, 收3530, 升勢全面, 有大成交配合, 不過老外今日趁茅台大升沽貨, 上証通常連升兩天就回吐

美元升穿93, 港匯弱, 資金流走, 人民幣連跌3天, 美國十年期債息重上1.3%, 利淡科企, 科指今日雖然收升, 不過科指走勢仍弱, 過去3周都係升1~2天就回吐

匯市形勢本來利淡港股, 但美債息上升卻利好, 回顧8月初美國十年期債息插穿1.2%, 金融股反艇, 但立秋變盤, 當時美國十年期債息重上1.3%, 金融股隨即止跌回升, 大幅反彈, 推動中港股市急升, 大媽及好友借勢上攻屠熊及派貨,

港股特定升跌模式

踏入8月份, 港股有特定的升跌模式, 反映港股由好友主導大市, 當打破這規律, 代表好友已食胡鬆人, 淡友出手

~ 每次插穿26000都能收26150之上

~ 每次作出回吐, 跌1~2天後就會作出反彈, 收復失地並升突

~ 國指跑贏恒指當天, 恒指國指都係收升

老外上午沽滬深A股, 但尾市卻大手掃A股, 該時段中港股市齊齊急升, 擴大升幅, 大媽掃QQ及美團, 係升市功臣, 不過卻沽出中芯及港交所(明日公布業績)

QQ已連升3天, 隨時會腳軟, 因為由6月起最長係3連升, 今日高見$493就掉頭向下, 收窄升幅, 當QQ見頂回落, 港股反彈浪就告一段落, 要QQ完成調整, 才可推動港股展開新一輪升浪, 近日QQ爆升除了因為大媽掃貨外, 可能係有淡友於下周三(18/8)QQ業績前平空倉, 空軍補倉買盤進一步推高QQ, 掃貨盤並非看好QQ, 目前QQ蟹貨多到不得了,

市場氣氛好轉, VHSI恒指恐慌指數連跌3天, 今日大跌7.32%, 不過市場缺水, 資金流走, 港股升勢並不全面, 大鱷大媽係不斷換碼, 輪住來炒, 新經濟股急升, 但唔少舊經濟股卻逆市下跌

港股急升急回, 收窄升幅, 秒殺肥熊即回,

11/8 周三恆指收26660, 升54點, 連升3日, 高處不勝寒

上証QQ見頂 = 港股見頂

大鱷大媽繼續輪住來炒, 昨日新經濟股急升舊經濟股逆市下跌, 今日剛好相反, 舊經濟股急升新經濟股逆市下跌, 科指最終收跌, 美元於93.2打回頭, 本港資金流走情況紓緩, 今日港匯收報7.7787(9/8走弱報7.7838), 往後當港匯再度轉弱, 就係港股回調先兆

26000水平空軍縮手, 但今早爆上26822沽空急增至15.13%, 為8月以來最高, 代表淡友已出手反擊, 由27/7低位24748展開反彈浪, 累計上升2074點, 反覆升了超過兩個星期, 時間及升幅已超標, 今日出現見頂訊號, 期指未平倉合約凈數縮減, 好友可能已食胡

今日創月內新高見26822後掉頭回落, 抹去大部份升幅, 剛好於26/7下跌裂口26878~27222關口俾淡友打回頭, 牛牛上移至26200水平, 反彈浪後期見貼價牛出世, 就係港股見頂訊號

按照慣性走勢, 今日港股應收跌, 結果只係科指跌, 恒指國指沖高回落仍夾硬收升, 不過沽壓未除, 估計明日中港股市回吐壓力會大增, 正路應補跌, 因為每星期通常有兩個方向, 升了3天, 本周未跌過, 明日係轉勢日, 市強即市調整或小幅收跌, 如收跌超過200點或收陰燭就要小心, 10天線危危乎

市傳#3333恒大賣資產減債, 債務危機露曙光, 內房及金融股爆升挾淡, 升過龍, 上証收3532(高見3544, 挑戰3550大位), 升2點, 連升3天, 創6月底以來最長升浪, 與港股情況一樣, 按照慣性走勢今日上証應收跌, 結果卻出現三連升, 正路明日要補跌, 兩地龍頭股茅台及QQ雙雙見頂回落, 代表兩地股市亦已見頂

三個關鍵因素令港股踏入8月份作出報復性反彈

~ 1/8加印花稅已成定局, 大鱷大媽冇必要再急於賤價走貨, 可踢上去再出貨

~ 7月尾美資大舉沽出中概股已暫告一段落, 美國女股神亦已沽出大部份中概股持倉(8%==>0.18%), 港股沽壓紓緩, 就作出大反彈

~ 回顧8月初美國十年期債息插穿1.2%, 金融股反艇, 但7/8立秋變盤, 美國十年期債息重上1.3%, 跌到殘的金融股隨即止跌回升, 大幅反彈, 推動中港股市急升

上星期恒指周線升幅不大, 因為當時美債息處於1.2%附近, 壓住金融股, 如果以美債息做指標, 金融股大漲, 今個星期表現勝上周

~~~~~~~~~~~~~~~~~~~~~~~~~~~~~~~

大媽托沽

1/8加股票印花稅之後, 暫時唔覺得港股成交及表現有大變化, 分析師及財演曾說高頻交易大鱷會減少炒港股, 我反而覺得1/8後大媽回歸, 掃貨及護盤, 港股當堂生猛番, 要留意當大媽大舉沽貨食胡, 港股就會反艇

踏入8月, 我已經感到大媽的氣場, 係護盤手影, 亦有可能係推高出貨, 如果股份跌得太殘, 會影響企業發債.貸款融資, 護盤係必需, 否則會影響內地金融市場的穩定性, 阿爺不斷推出監管政策, 亦有責任維穩, 神又佢, 鬼又佢, 一啖沙糖一啖屎

美企業績勝預期, 加上企業回購, 美股屢創新高, 不過老美位高勢危, 托住高位派貨, 人人都擔心美股反艇, 大媽推高港股, 遠遠拋離前底, 就可預留回調空間, 守住前底, 不過目前只係月中, 所以推到上26800關鍵大位就見大媽縮手, 似乎唔想8月上旬推得太高

昨日滬深大媽大手掃QQ, 推動恒指急升收26500之上, 今日滬大媽沽QQ, 深大媽買少少QQ, 大媽收水, 削弱港股上升動力, 所以港股衝高回落, 收窄升幅, 當大媽縮手唔掃貨, 港股就要作出調整

~~~~~~~~~~~~~~~~~~~~~~~~~~~~~~~

今日高見26822, 周波幅902點已進入達標範圍, 冇必要再飛天, 要看好友大鱷會否忍忍手, 預留多些上升空間俾8月下旬, 又或者26822已是反彈浪頂, 後市要插穿7月股災低位24748來擴大年波幅,

港股通常連升2~3日就回吐, 慣性走勢好準, 上証及港股兩連升後果然腳軟, 就算夾硬推升都要衝高回落, 明日沽壓會更大, 業績高峰期, 小心股份見光死, 持貨要睇路

過去7個月恒指高低位出現時間:

1.2.4.5月收升: 該月下旬才見頂, 全月先低後高,

3.6.7月收跌: 該月下旬才見底, 全月先高後低

上証7月收3397, 過去7個月恒指月線升跌係跟足上証, 假如上証今個月收升, 恒指亦會收升, 假如7月下旬跌穿月初低位25743, 代表今個月有可能收跌