12~19/8 尋底屠牛之旅

昨日已提醒大家爆上26822見空軍加沽, 好友大鱷及大媽高位都縮手唔托市, 昨日沽空勁多, 今早沽空亦多, 今日港股收跌係正路, 慣性走勢不會全周日日升, 每周升跌通常係2~3天, 升了3天, 就要跌2天

於尋頂期間大鱷會一直撐市, 守住10天線反覆推升, 引熊入局後就再殺上去屠熊, 當見頂以及牛牛上移就會縮手唔托市, 插穿10天線破位而下, 大舉屠牛, 目前係等利淡的殺跌催化劑, 月中係回調的時間窗口, 好友都唔想花太多子彈托市, 不會一直撐到月尾, 今次爆上26822係靠大媽掃QQ及美團所推動, 昨日創新高後大媽已經縮手, 連續兩日冇大手掃QQ, 大鱷大媽高位派貨, QQ見頂, 港股見頂

監管風暴蔓延, 阿爺的打壓政策沒完沒了, 內媒指銀保監針對互聯網保險亂象擬整治, 相關股份反艇, 昨日內銀內險飛天, 今日已見獲利沽壓湧現, 全世界都做快閃黨, 亦係港股高位一瞬即逝的主因, 滬深股通雖然錄得資金凈流入, 但老外係沽出茅台.平保及比亞迪A股, 散水了

港股連跌兩天, 部署下殺屠牛

13/8 周五恆指收26391, 跌126點, 臨危托沽

溫水煮蛙式派貨

港股技術指標轉弱跡象, 11/8港股見頂, 12~13/8連跌兩天, 淡勢已成, 國指今日率先跌穿10天線, 代表港股已轉為尋底市, 亦預示恒指亦會跟隨國指插穿10天線,

近來見資金轉投內銀等價殘舊經濟股，代表市場對新經濟股仍有戒心，畢竟阿里B站等在美上市的中概股沽壓未除，阿爺的監管政策猶如泰山壓頂, 內地監管措施沒完沒了, 最令基金界痛心就係連本來有政策扶持的芯片業都要嚴打, 科企沽壓沉重, 拖低大市, 資金由科企轉投舊經濟股來避險, 權重股QQ.阿里.強勢股港交所及比亞迪紛紛見頂回落, 代表港股要落山, 下周三QQ公布業績前港股沽壓加劇, 不過招行建行業績市場收貨見資金泊入, 內銀板塊再度受青睞, 成為托市功臣,

美股愈強, 港股愈弱, 因為唔少炒港股的資金都轉投美股市場, 1/8起加股票印花稅影響浮現, 加上大媽.外資.高頻交易商撤走, 港股成交逐步萎縮, 資金流走, 港匯亦再度走弱, 今日成交只得$1259億, 創2個多月以來最細成交, 成交急降, 大龍鳳先兆, 港股表面上連升兩周, 其實唔少股份上周已見頂回落, 並不是11/8才跟隨大市見頂, 大鱷大媽臨危托沽

6月初恒指見頂29490回落尋底期間, 每逢周一恒指多數係收跌, 只係見過1次周一收升, 但踏入8月份首兩周轉為反彈尋頂市, 連續兩個星期一都收升, 假如日前高見26822已見頂轉為尋底市, 下周一就應收跌, 月中係回吐的時間窗口, 港股已連升兩周, 如果冇趁8月上旬反彈時走貨, 就錯失良機

港股連跌三天, 繼續尋底屠牛之旅

16/8 周一恆指收26181, 跌210點

受中美政策不斷打壓, 在美上市中概股繼續捱沽, 拖低相關板塊, 醜聞纏身的阿里沽壓沉重, QQ業績前尋底, 走勢差劣, 測市指標全面利淡, 回顧過去兩周尋頂期間恒指一直守住10天線, 不過繼昨日國指失守10天線, 今日連QQ恆指亦同步跌穿10天線, 代表8月上旬的反彈浪已結束, 假設本周港股收跌, 按照慣性走勢今日低位不會是底, 後市會插穿今日低位26047/9225, 當恒指插穿25500, 國指亦會同步插穿9000水平,

今日高低位26047~26449, 周波幅仍未達標, 仍有下跌空間, 要下試月初低位25743, 權重科企弱雞, 利淡港股, 今日四大板塊3升1跌(工商), 在大跌市當中金融公用地產三大板塊仍能逆市收升, 反映資金積極換馬避險, 大鱷托住26000可能係臨危托沽, 震熊引牛, 牛熊分布 8158牛 VS 4857熊, 貼價牛肥到不得了, 26000樓下每百點都有肥牛, 有下殺誘因, 向下有上升裂口25520~25857未全數回補是後患,

資金繼續由新經濟股轉投內銀屋仔等舊經濟股, 令港股收窄跌幅, 險守26000水平, 上周美國車企德師奶見頂回落, 拖累比亞迪等強勢車股反艇, 代表港股要落山, 內地剛公布的經濟數據欠佳, 拖累上証衝高回落, 差不多抹去所有升幅, 上証結束兩日跌勢, 收升1點, 無形之手力守3500水平, 但上証仍受制於前頂3544, 不進則退, 要慎防連日掃A股的老外沽貨食胡, 當上証插穿3500大位, 淡友就有藉口殺跌

回顧8月上旬無論當天恒指點插, 收市都企26150之上, 今日亦唔例外, 誰在托市? 當收於26150, 代表好友已閃, 港股要向25800.25500進發, 就可擴大月波幅, 恒指恐慌指數VHSI急升4.4%, 預示港股後市不妙, 淡友等緊利淡催化劑來殺跌

睇下資金流就知港股發生乜事, 大鱷趁港股彈高食胡鬆人, 資金流走, 下列11/8港股見頂前後幾天港匯收市位反映大鱷推高港股後就撤資

09/8  7.7838 港匯弱

10/8  7.7814 港匯開始轉強

11/8  7.7787 (港匯強.港股見頂日)

12/8  7.7814 港匯開始轉弱

13/8  7.7828 港匯弱

16/8  7.7843 港匯愈來愈弱

老外大舉掃A股, 大媽外資走港股, 滬深、港股通資金流向(人民幣)

滬深股通合計流入100.40億
港股通合計流出29.60億

港股連跌四天, 大舉屠牛

17/8 周二恆指收25745, 大跌435點

美期大跌 + 上証暴跌, 雙鬼拍門 = 港股破位而下

今日低見25615, 創8月新低, 不過29/7上升裂口25520~25857未全數回補, 即係未見底, 收跌周多數在周三四五創新低

今日中港股市走鬼撤資, 幸好恒指收市U盤大大力踢高49點(過去兩日係走低), 代表好友正部署反擊, 按照恒指慣性走勢, 如周一二大跌, 周三或四就會作出反彈, 彈完再跌過

中國公布令人失望的經濟數據、阿富汗政局以及 Delta 變種病毒急劇擴散, 市場避險情緒升溫, 影響了資金流, 避險貨幣日圓及美元都走強, 美元再度上企93.1水平, 人民幣轉弱, 港匯跌破7.79, 為去年3月以來最弱, 怪不得中港股市反艇,

匯市變化對股市的影響力最大, 8月上旬港股急升就係受港匯突然轉強所推動, 本周港股急跌就係受港匯突然急速轉弱所拖累, 當國指失守9000大關, 恒指25500就危危乎, 恒指由高位26822回吐至今日低位25615, 跌幅1207點, 或會作出死貓彈引好友入局, 不過月波幅仍未達標, 彈完就要再尋底

由於中港股市今日已偷步跟美期下挫, 明日港股表現就要看 1) 內地股市會否創新低, 會否止跌回升 2) QQ能否守住低位$422, 3) QQ業績前淡友會否食胡回補空倉 4) 國指會否轉強, 5) 好友會否繼續掃內銀及友邦來托市 6) 大鱷隊落去屠殺貼價牛後會否推番大市上去 7) 港股會否打破日日低開的弱勢, 競價轉為高開

肥牛陣亡, 過去幾日俾大鱷呃左入局的好友歸西, 估計大鱷今日屠恒牛約1500張, 創今個月新低, 擴大了月波幅, 不過恒指月波幅仍未達標, 上証急插70點, 接連失守3500及3450兩個大關, 收3447, 老外走貨, 上証見頂回落, 大媽亦沽港股

美股正在聚頂, 收水陰霾下, 隨時會大插, 本周五結算, 升了這麼多, 美股淡友理應會作出垂死掙扎, 作出反擊, 世上沒有只升不跌的股市, 當美股反艇, 就會推港股落山,

昨晚美股一插即彈, 近全日高位收, 但在美上市中概股卻反艇, 我估係美股有無形之手托市, 以及美企回購股份, 但中概股受中美政策打壓, 基金.大小鱷.散戶.大媽全面沽貨, 所以彈唔起, 亦拖累港股表現

只要國指弱勢持續, 國指9000大關就好難守得住, 如此一來, 恒指25500亦不保, 8月上旬趁反彈我按計劃積極走貨, 因為估計第三季係尋底市, 點都要再下試前底24748吧! 高低腳或破底來擴大年波幅, 所以減磅博破底才考慮分注補貨

假設11/8高位26822已是反彈浪頂, 後市就要插穿7月股災低位24748來擴大年波幅, 如果做細月波幅, 就可以做高低腳, 下試24800~25000, 今個月係港股業績期, 小心業績股見光死, 港交所就係業績後潛行凶間