8月尾恒指3升3跌

2021/08/27 21:31:45 網誌分類: 經濟
27 Aug

港股急跌急彈力守25300, 收窄跌幅, 部署結算位

27/8 周五恆指收25407, 跌7點,連跌3天, 反彈在望

下午已見美期急升,預示今晚美股彈高機會大, 利好下周一港股市況, 加上 上証彈高, 港股今日理應高收,恆指由大升226點變成倒跌係好奇怪, 有可能係好友擔心今日大升的話, 下周一期指結算就會惹來更大沽壓, 所以托住25400部署結算位就算數

由於今個月係淡倉底, 8月下旬淡友一直壓住大市, 今日有大量企業於收市後公布業績, 下周一就會反映, 小心業績股見光死, 內銀內險係高危板塊, 因為業績會受內房債務所拖累, 沽空方面, 空軍早前見爆上25700樓上就加沽多隻, 但落到25200附近沽空就收斂, 趁大跌時阿里QQ等股份亦見空軍平倉盤

本周三四五港股回吐, 部份原因係受美國10年期國債升穿1.35%, 以及美元上企93所拖累, 但今晚聯儲局阿伯開金口後, 10年期國債息碌落1.31%, 美元落到92.69, 人民幣急彈, 利好下周初中港股市表現, 債息衝高回落, 怪不得納指突破15000大位,

美股屢創新高, 道指恒指差距效應下, 中港股市亦跌唔落, 睇MACD表現, 大鱷似乎係畫緊圖, 等機會上攻, 近日恒指困在25000~26000, 以月波幅來看, 9月份就要爆邊來擴大新波幅

根據過往統計數據, 7月及8月多數係打孖升跌, 7月收升.8月收升, 7月收跌.8月收跌, 今年7月收跌, 所以8月亦應收跌, 即係31/8會收25961之下

~~~~~~~~~~~~~~~~~~~~~~~~~~~~

月尾恒指3升3跌

睇番2018年起的記錄,月尾升跌日數的慣性走勢,每個月最後5天未見過出現同一方向(5日全升或全跌), 如今恆指3連跌,即係下周一二不會是跌跌, 如果唔打破記錄,月尾最後兩天(30~31/8)恆指就會係升跌或升升,不過下周二有MSCl調動影響市況, 而每月最後一天多數收跌, 所以下周一會收升, 周二升跌難料, 如果跟月尾3升3跌的慣性走勢, 下周一二就會係升升

按照慣性走勢, 每月最後一個星期五收市位可作為預測該月升跌的指南針, 今日表現預示8月收跌, 31/8會收25961之下, 今日低見25304, 好友力守25300來結算, 牛熊分布方面係牛多熊少(8215 : 5195), 兩者都非常貼價, 25300 vs 25650, 以閒閒地400點日波幅來看, 有可能好淡通殺, 貼價牛熊都要死

上証今日反彈20點, 收復昨日近一半失地, 收報3522, 周三高見3540(前頂3544)後掉頭回落, 港股後市表現就要看上証能否突破3540/3544, 如再度打回頭, 就會拖低港股, 今日老外大手掃A股, 利好, 但大媽午後加速沽出港股, QQ倒跌, 係拖低港股的元兇之一

阿爺為了維持月底流動性平穩, 人行本周淨投放1200億, 創7個月新高, 不過內地股市有暗湧, 上証午後明升暗跌, 指數升幅雖然擴大, 但A股比亞迪茅台及金融股升幅卻收窄

~~~~~~~~~~~~~~~~~~~~~~~~~~~~

護盤手影

一直都認為阿爺推出這麼多監管措施, 冇理由任由中港股市大插, 人為股災, 等阿爺護盤, 而每次插穿3400都見疑似護盤手影, 鐘擺理論適用於股市,目前中港股市氣氛差, 股市深潛, 但物極必反, 股市是不會長時間處於不合理水平, 暴跌後就會作出報復性反彈, 插穿25000係跌過龍, 估值吸引,長線來說,向上空間大,入貨後就等鐘擺搖向另一邊,

港股月中創今年新低, 做高低腳後收於前底之上, 測市指標出現利好訊號, 其後重上25000一直守得好穩, 反覆挑戰26000水平, 巿場氣氛差買盤弱, 失驚無神大幅抽升挾淡係最有效的推升方法, 大鱷操控港股的手法,係失驚無神轉向唔畀股民捉到路,股民賺下蝕下 到頭來得個吉或者嘔凸

阿富汗撤軍引發大混亂, 以及美國新冠疫情惡化, 令拜登的支持率跌至上任以來最低, 如果依家出現股災, 拜登就更加無地自容, 所以美股一直見無形之手托市,每次插水都識得抝腰上, 美股高企不下, 港股受帶動向上, 亦冇再創新低

不妨去睇下7月尾恒指低見24748後的走勢, 就會知今次低見24581後會點走, 真係好似咖! 7月尾係兩日後就重上25800, 所以今次25800都係攔唔住, 9月點都要再挑戰26000, 因為市場上有太多淡友, 所以大鱷玩挾淡, 逼淡友回補空倉, 幫手推高大市

炒港股就要先分析上証, 因兩地股市係同一方向, 同步尋底頂, 兩地股市游走的水平亦有關連性, 上証未見頂, 港股亦未見頂

{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}

港股期指結算, 恒指結束三連跌

30/8 周一恆指收25539, 升131點

今日港股期結, 明日係黑期結算, 聽聞場外期指倉位更大, 由於今個月係淡倉底, 空軍明日會出手推低結算價, 由4/8起, QQ一直不在沽空榜首, 但今日突然重上五大沽空榜首, 預示QQ要下試10天線約$450水平, 要看明日結算塵埃落定, 午後港股會否作出反彈, 因為今日期結都係午後推上去高收

今日恒指收升131點, 升幅不算大, 皆因國指跑輸恒指, 加上滬深大媽齊齊沽QQ, 削弱港股上升動力, 阿爺掀起的監管風暴沒完沒了, 股民有戒心, 一彈即走貨, 阿爺繼續推出監管政策, 今次又係手遊當災, QQ尋底, 港股尋底, 幸好QQ今日下試20天線獲支持回升, 收陽燭, 釋出利好訊號, 6/9恒指成份股變動, QQ比重由6.13%將增至佔8%, 本周或會有買盤掃QQ

上証收升6點, 連升兩天, 收3528, 高見3539, 近日不斷挑戰前頂3540/3544, 今日衝頂有超大成交配合, 加上即市波幅急降, 預示明日會有大龍鳳, 非生即死, 後市如能突破前頂, 有助港股挑戰25800, 如上証打回頭, 恒指就要下試25000

受9月份大量成份股除息所拖累, 後市期指會率先跌穿25000, 所以今日好友推恒指上25500, 就係想大幅拋離25000, 唔想期指插穿25000, 大鱷似乎畫緊圖, MACD正在向上勾, 走勢向好, 牛熊分布方面, 牛在25200附近, 熊在25635樓上, 非常貼價, 牛熊都命危

~~~~~~~~~~~~~~~~~~~~~~~~~~

處暑後的反彈浪

明日係畫月線的大日子, 上証已鐵定8月收升, 過去7個月恒指上証月線升跌係同步, 但好明顯今個月恒指無法跟隨上証收升, 但恒指亦不應深潛, 因為恒指上証收市水平係有關連升, 不會各行各路, 既然上証8月收升, 恒指8月亦不應大幅收低過25961(7月收市位)

恒指於20/8見底24581, 23/8處暑港股轉勢向上, 反覆尋頂, 一直冇插穿23/8低位25037, 只要守得住, 就代表要上攻26000, 日前高見25982就打回頭, 皆因今個月係淡倉底, 淡友攔路, 但下個月開新局就唔同玩法, 要升穿26000來擴大月波幅

7月份高低位24748~28859, 8月份高低位24581~26822, 9月就要25000~26000上下爆邊, 不過只要上証守3500, 恒指就會守住25000水平, 阿爺為了維持月底流動性平穩, 人行公開市場連續4個交易日進行逆回購操作

今日推上25500收, 因為如果現貨收於25200附近, 除息低水效應下, 9月期指就會率先跌穿25000關鍵位, 但大鱷唔想太快插穿

今日似乎有好息之徒趁股份下跌時買入9月除息股, 亦見企業公布業績後回購股份, 一眾買盤有助撐住大市, 匯債形勢變盤, 美元跌.人仔港匯強, 利好中港股市, 有基金經理及投機港股的小鱷表示對現水平美股有戒心, 認為跌到殘的港股有吸引力, 入貨博9月上26000有值博率, 怪不得每次插至25000~25300都見買盤低吸

~~~~~~~~~~~~~~~~~~~~~~~~~~

慣性走勢

上周按照慣性走勢來預測恆指本周一二不會是跌跌, 會係升跌或升升, 如今揭盅, 本周一果然收升, 可能係好友力撐來結算, 上証今日彈力不足見沽壓, 近來上証收升時, 內銀內險消費股都跟唔上, 彈力弱, 甚至逆市下跌

那麼周二(明天)港股升跌又如何? 有三種慣性走勢具參考價值

回顧2018年起三年多的MSCl調動日表現, 14次當中11跌3升, 收跌機會率高

過去7個月的月尾最後一天恒指6跌1升, 收跌機會率高

月尾恒指3升3跌其實不太準, 不過可以肯定不會一面倒全升或全跌, 對估算哪天升跌有幫助, 回顧過去7個月每月最後6天恒指升跌表現

一月 1升5跌

二三四六月 3升3跌

五月 4升2跌

七月 2升4跌

八月 到今日為止2升3跌, 尚餘1天有待揭盅, 如能收升, 就符合3升3跌

{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}

港股急挫急彈, 倒升高收, 牛熊通殺

31/8 周二恆指收25879, 大升339點, 連升兩天

水到渠成

今日恒指低開後最多大插429點低見25110, 秒殺牛牛即彈, 午後倒升339點屠熊, 好淡通殺, 以全日最高位25879收, 單日轉向高收, MACD上衝, 走勢靚絕, 守得住23/8低位25037, 確認完成調整, 展開尋頂之旅, 後市突破26000毫無難度, 要向26500.26822進發, 技術指標及測市指標釋出利好訊號, 港股升勢有望延續

以往每月開新局多數係踢上去, 正路明日港股才彈高, 但今日係月尾最後一天, 已急不及待於黑期結算尾聲就爆上, 可能係因為美期午後急升, 中港股市就跟住飛天, 已提醒淡友小心, 開新月唔同玩法咖! 結果尾市急升, 跟住收市U盤再伸多一腳上去, 挾多點110點, 以25879全日最高位收,

恒指周波幅仍未達標, 收升周多數會在周三四五創周高位, 港股能走多遠就要睇上証能否突破前頂3544/3550再進一步攀升,如能上企3550, 恒指就可上26000, 中港股市落後於美股, 現正追落後

明日9月開新局, 明早競價開市位係畫9月份月線的關鍵位, 不宜開得太高, 壓低開可降低9月收陽燭的難度

根據過去3年多的升跌統計, MSCI調動日多數收跌, 但今日卻違反慣性走勢, 午後單日轉向, 倒升收市, 事出必有因, 原來係美元企唔穩93碌落山, 利好非美貨幣, 人民幣連升3日, 港匯強勢, 打穿7.78, 推動中港股市彈高

大升前必有一插, 震牛引熊, 今日早市一棍插水, 就係大升市的前奏, 好友趁今日MSCI調動大成交, 借勢推升, 營造大成交轉勢向上的利好形態, QQ尾市在$475窄幅橫行, 收市U盤爆上$481.2收, 皆因上月收$479, 好友想畫8月QQ收升的圖表, 吸引技術派追入, 幫手推高大市

過去7個月恒指月線都係與上証同步升跌, 但今個月卻是例外, 不過由於上証8月份收升, 亦令恒指收窄月線跌幅, 全月僅跌82點, 全靠今日爆升收窄了8月跌幅, 好明顯大鱷今日係畫圖

早市恒指低見25110, 昨晚道指收35399, 當時差距高達10289點, 又超標, 所以午後港股急升, 將兩者差距收窄至9521點, 換句話說, 就算午後唔彈高, 如恒指今日收得低, 差距超標多過10000點的話, 明日都會彈, 只係提早於今日下午反彈

// 8月上旬港股由好友主導, 恆指道指差距一直維持8500~9000點 //

只要道指續升又或者好似8月上旬港股追落後, 就會扯住上, 差距具啟示作用

~~~~~~~~~~~~~~~~~~~~~~~~~

資金流 VS 股市

今日滬深大媽由港股開市沽到收市, 大媽走貨的確會削弱港股上升動力, 但回購及熱錢(假設有資金流入)就可抵消大媽沽貨的壓力, 如能突破大位, 亦會吸引基金及短炒投機客追入, 亦可逼淡友回補空倉, 昨日QQ突然上五大沽空榜首, 今日挾爆了空軍, QQ就飛天

美元跌穿92.5見92.459, 資金流有變, 水到渠成, 匯債變化對股市起關鍵作用, 股市往往會受帶動, 出現急升或暴跌, 睇下美元.港匯.人民幣, 今日對比上周五, 係天與地, 所以上周三四五港股回吐, 但踏入本周港股就彈高

七月中旬 中港股反艇創今年新低就係受資金流所拖累, 當時美元上企93.5, 港匯破7.79, 人民幣破6.5,

周末曾說資金流有變(詳細分析可重溫近日網誌), 利好中港股市, 所以昨日兩地股市都收升, 以往MSCI調動都見龐大沽壓, 今早的確出現了, 但為何午後突然爆升呢? 好明顯係受資金流所推動, 美期急升, 台股上午反艇, 午後急升, 以全日最高位收市

台股即市走勢與中港股市不謀而合, 並非單純為畫月線.挾淡, 而是環球資金流的改變推動股市變盤, MSCI大執位帶動了環球股市表現

老外上午係呆下呆下, 但午後突然大手狂掃A股, 滬深股通資金凈流入高達111.53億元人民幣, 推動內地股市急升, 間接推高了港股, 可想而知熱錢的威力

日前我問9月會否突破8月高低位24581~26822, 就係因為資金流對股市舉足輕重, 熱錢流走就會破底(好似7月尾), 當熱錢湧入就會破頂

最新回應

試下學下
試下學下 2021/09/17

今晚似樣,納指大跌夜期企定定 {#iconb_62}

水滴石穿
水滴石穿 2021/09/17

半官方吹风:

《環球時報》總編輯胡錫進在個人微博發文,指恒大(3333)一旦破產,亦不會出現「成為雷曼兄弟倒閉那樣系統性金融風暴的導火索」。

他認為,中國並不存在發生房地產發生次貸危機的基本形勢,中國購房首付款的比例很高,二套房的首付比例尤其高,與美國當時的情況截然不同。

胡錫進指,國家不會給企業出難題,故意置企業於困境,當企業正常經營遭遇市場逆風時,國家也會以規範的方式盡量幫它們紓困。然而,國家需要對行業開展規範化調整時,也不會因為存在的企業問題嚴重而投鼠忌器,對它們刻意遷就和保護。一旦問題爆雷,出事企業不能有自己「大到不能倒」的僥倖,必須有能力以市場方式自救。市場上最後留下來的都是基礎業績過硬、不怕風雨一時刮斷幾根樹杈的企業。

胡鍚進重申,個人希望恒大能度過難關,每一個遭遇困境的企業,都希望它們能上演「起死回生」的奇蹟。因為它們活下來,對增加社會韌性的正面作用往往更大,但這個奇蹟需要恒大和每一個一旦陷入險境的企業主要依靠自己的市場力量去創造。

水滴石穿
水滴石穿 2021/09/17

下一波,香港地产股?

有報道指,中央官員在今年一場閉門會議上,向香港發展商傳達訊息,要求將資源和影響力用於支持北京,以及幫助解決香港的住房短缺問題。

《路透社》引述3名主要發展商以及1名熟悉相關會談香港政府顧問,指中央官員在一場閉門會談上傳遞上述訊息。報道引述消息人士稱,他們被告知「遊戲規則已改變」,中央政府不再容忍「壟斷行為」。報道亦引中央政府官員消息人士稱,中聯辦有意削弱一些未對中央在港利益做更多事的財團。

合和主席胡應湘則對《路透社》表示,北京並沒有指示該怎樣做,但就說「你們需要解決這個問題」,認為中央並非對香港不耐煩,但會施加一定壓力。另一發展商消息人士則指,內地官員表達了期望,但沒有提出策略和期限。

門徒
門徒 2021/09/17

試兄真係好心地拖阿婆過馬路 {#icons_boy9}