9月初港股進入阻力區

上証通常連升3~4日就回吐, 最長五連升, 到1/9為止已是四連升, 沽壓會湧現, 就算指數夾硬升, 股份都未必跟升, 由於港股由低位24581反彈上26000累積龐大升幅, 加上升勢過急, 未必能站穩26000水平, 當連升斷纜跌幅超過200點, 又或者係上証及QQ見頂, 就係港股見短頂訊號, QQ美團港股都超買, 小心明日伸多一腳上去就見短頂, 加上由5月起, 科指通常連升3~4日就回吐, 今日已升到第三棍, 今個星期港股未跌過, 回吐壓力大增

港股衝高回落, 收窄升幅, 秒殺肥熊即回, 26000好淡角力

2/9 周四恆指收26090, 升62點, 連升4天, 沽壓大增

今早港股創本周新高, 伸埋呢腳上去, 本周恒指高低位25110~26359, 周波幅1249點已達標, 明日不應創新高, 不進則退, 要向25800進發, 大鱷要開始部署下周的波動區

港股回調整固.消化沽壓, 儲力向上

3/9 周五恆指收25902, 跌188點, 結束四連升

一般來說, 第一次挑戰阻力大位26200~26300多數係試水溫, 會打回頭, 結果高見26359即回, 向下支持25800.25500, 回調整固後就會上破2/9高位26359, 阻力在26500.26800~27000, 港股技術指標向好, 如果9月未見大頂, 只係見短頂回落, 市強由高位嘔600~800點就會彈(26359-600~800=25550~25760)

美元回落, 人民幣港匯齊齊走強, 匯市形勢利好中港股市, 港股溫度計QQ今日收跌收陰, 皆因本周港股未跌過, 今日要收跌, 當然要推低權重QQ, 後市只要QQ止跌收陽收升, 就係利好訊號, 上証結束連升5日勢頭, 收3581, 跌15點, 連續3日企3550之上, 曾突破7月高位見3614, 下一站挑戰6月頂3629, 「跨境理財通」據報最快國慶假後開通, 近日有資金炒阿爺國慶送大禮

過去幾個星期的周一收升或跌具啟示作用, 係關鍵日, 碰巧下周一美股休市, 港股自由行, 必有大龍鳳, 按照慣性走勢, 下周一如能收升, 代表周線有望收升

6/9 恆指收26163, 升261點,

QQ先低後高, 收升收陽, 靚仔, 皆因有無形之手睇住QQ, 目的係推高港股, 其實上周QQ.快手.京東.美團.B站等多隻新科技股都見莊家陸續進場, 係科指及港股走強的主因,恒指周波幅及月波幅仍未達標, 代表港股未見頂, 仍有上升空間, 後市會升穿上周高位26359/9434來擴大波幅

QQ已率先站穩10及20天線, 而恒指近日不斷跌穿26000並下試20天線仍能收於其上, 呈利好形態, 因為過去幾個月的大跌浪港股一直受制於20天線, 今次卻連日收20天線之上, 好明顯今次上升動力比以往強, 上周曾說港股有資金市的味道, 近日見莊家紛紛入場掃貨, 又真係愈來愈似, 不過熱錢似集中炒新科企, 金融地產內房卻受冷待, 只要科指保持強勢未見頂, 代表港股升勢未完, 當科指轉弱就要小心

過去半年港股反覆下跌, 股民傾向悲觀, 淡友多, 挾淡倉就係最佳推升方法, 但近來的升市成交縮, 並不配合升勢, 當有利淡消息, 就較易反艇, 熊市不宜太樂觀,

阿爺好, 港股好, 中港股市係同步尋底頂, 9月上旬中港股市正在尋頂, 上証開市位已是全日低位, 港股都係一樣, 齊齊低開即彈, 單日轉向高收, 就算港股有沽壓, 但A股會扯住港股上, 要上証見頂回落, 才會拖低港股

近來內地股市強勢, 其中一個原因係老外由23/8起就密密大手掃A股, 上証收3621, 強到嚇人, 另外一個強勢原因係匯市, 人民幣及港匯都走強, 因為美元失守92.5水平

以往老外掃A股都係三幾日貨仔就沽貨獲利, 但今次唔係, 係一路掃貨, 推高內地股市, AH股同步, 老外掃A股, 間接推高H股,上証愈升愈有, 不斷突破阻力位, 上企3600大位之上, 收3621, 升40點, 目前中港股市係同步尋頂, 港股比上証落後, 正在急起直追

上周上交所宣布納入快手.時代天使等十多隻股份入港股通, 一眾大媽的買盤就結束了連續一個多星期港股通資金凈流出, 變成凈流入, 係利好訊號, 反映北水大媽重拾對港股的興趣