21~28/9 轉節氣後力守24000

昨晚美股暴跌, 道指大插614點收33970, 略為插穿34000大位, 要看後市能否重返其上, 今日美期急彈, 過去幾日美股雖然大跌, 但仍咬住納指14800, 道指34000大位, 有分析指中港股市反艇, 美股亦大跌, 反而會吸引資金回流仍處牛市的美股, 只要穩住美股, 就可穩住環球股市

22/9聯儲局公布議息結果, 未來幾晚美股又要起風雲, 大幅波動在所難免, 今日港股反彈可能係短炒淡友擔心明日內地復市阿爺護盤, 上証跌幅可能少過預期, 今日有淡友回補空倉, 平保見淡友食胡平倉手影, 由於已獲利甚豐, 小淡友先行止賺, 袋袋平安過中秋, 因為唔知阿爺明日搞邊科,

今早見地產板塊高開高走, 昨日急挫的A股逆向ETF今日下跌, 就知今日港股死不了, 因為想港股反艇, 就要金融地產齊齊大插, 今早港股雖然下跌, 但金融地產兩大板塊都造好, 結果午後港股果然倒升,

連續7日大舉屠牛後, 肥牛陣亡, 目前牛熊分布 8953牛 vs 4987熊, 一般來說, 出現單邊下跌市, 當貼價熊出世就係反彈之時, 今日24500樓上熊剛出世, 有上攻誘因, 不過23700附近重倉肥牛會拉住港股後腿, 貼價牛亦快將出世, 踏入月尾, 港股多數係好淡通殺, 大鱷要屠牛熊追數

多位分析師都認為阿爺會救恒大, 不會讓事件衍生系統性風險, 亦唔相信阿爺會打死本港地產界, 內房及地產股係跌過龍, 目前好友就係等阿爺放出好消息來穩住市場信心, 有長線投資者表示24000港股具吸引力, 已開始分注入貨

淡友趁大媽不在, 冇人護盤, 博大霧隊港股落地獄, 又擔心大媽周四回歸掃貨挾淡, 所以今日有淡友食胡, 推高了大市, 8/9見頂26560回落以來, 往往係彈一日又插過, 如能出現連升(周四收升), 利好, 如國指跑贏恒指, 收升機會增加, 過去6日恒指即市波幅擴大, 高達420~770點, 今日多隻內險股午後急彈, 除了可能係淡友回補空倉盤, 亦有可能同目前正在招股的保誠有關, 唔似係看好後市的買盤

上周恒指4跌1升, 打破了通常升跌2~3日的慣性走勢, 上周跌市日數過多, 升市日數太少, 本周升市日數理應增加, 不會只升1天這麼少, 中港美三地股市同步見底頂的話, 當中美股市觸底反彈, 港股亦會跟隨, 待遇上阻力大位再跌過, 過去幾日高位24640/24920/25045, 估計淡友會攔路

~~~~~~~~~~~~~~~~~~~~~~~~~~~~~~~~

技術性反彈

今日港股作出技術性反彈, 推番大市上去淡友又加沽, 沽空高企又爆燈, 後市一係大插, 一係急升挾淡, 不會呆下呆下橫行, 本周大插後, 恒指擴大了年波幅至大約7400點, 已進入了達標範圍, 不過以往見過年波幅約8000點, 所以今日低位23771未必係今年終極大底, 只係短底, 要推番上去期指結算/轉倉/基金季結高位走貨, 又或者好友乘機逃命,

恒指月波幅已超標, 高過一般正常波幅, 夠水位俾大鱷轉身, 未知大鱷會否忍忍手唔隊住, 來預留下個月的下跌空間, 不過QQ及港交所未見底是後患, 幸好QQ雖然收跌, 但卻是收陽燭, 下跌動力減弱中, 有望作出反彈, 今日QQ雖然跌穿$445, 創24/8以來新低, 但仍力守$440大位, 釋出利好訊號, 不過QQ沒有莊家睇場, 蟹貨亦多

今日收市U盤恒指收窄升幅, 走低45點, 為兩個月以來收市U盤最大跌幅, 可能係博反彈的好友食胡的避險沽盤, 今日港股一插即彈, 大媽不在, 冇人護盤, 但港股仍能開高收, 單日轉向呈陽燭, 測市指標利好, 近來大鱷一直勒住來窒窒步跌係引好友牛牛入局, 今個月累計屠牛超過一萬張, 港股跌勢理應喘定, 不過牛死牛還在, 牛熊分布仍然係牛多熊少, 因為25000/24000都係大位, 短短幾日連環插穿兩個大位點都會彈一彈, 如果阿爺生性, 有利港股續彈, 不過熊市沽壓大買盤弱, 博反彈宜炒波幅

呢兩日大量牛牛飛撲入市博反彈, 因為大市跌勢過急, 超賣, 加上美元衝高回落, 港匯略為回升, 美期急升, 美國十年期債息下跌, 都有助推動港股向上, 高人及一眾好友財演全面唱淡, 逆向思維, 港股有望作出反彈

港股明日中秋休市, 後日(香港時間23/9(周四))港股復市將會反映聯儲局議息結果, 同時亦要反映明日內地長假期復市的表現, 從A50這兩天偷步急挫來看, 市場預期內地股市明日會大跌, 只要內地股市跌幅少過預期, 有助穩住港股, 由周四起, 恒指將會步入月尾6天的部署結算市況, 要數住升跌日數來炒, 上個月係3升3跌, 不過今個月尾北水港股通因應十一黃金周長假期又會再關閉(29/9~7/10), 未知會否影響升跌慣性走勢

假期前後例牌大龍鳳, 港股急升急回, 收窄升幅, 牛熊通殺

23/9 周四恆指收24511, 升289點, 連升兩日沽壓大增

轉節氣秋分急升上企24500大位

睇住匯市來炒港股, 今早開市初段已提醒大家今日買上, 因為港匯走勢好轉

回顧上周五港匯收報7.7828

本周一二最弱曾見7.7881及7.7885==>熱錢流走, 港股大插

目前報7.7837==>資金流走暫告一段落, 港匯轉強, 港股彈高

今個月恒指見頂回落以來, 首度出現兩連升, 皆因匯債形勢利好友, 今日港股收升係正路, 不過只限今日, 明日中港股市危, 因為上証已連升3天, 通常升2~3日就回, 今日上証高位已見獲利沽壓, 不過有無形之手力撐, 夾硬收升, 港股今次反彈浪何時見頂就要睇住上証, 因為兩地股市多數係同步尋頂/見頂, 如明日上証無法突破今日高位3671掉頭向下, 港股亦會同步見頂回落, 以近來日波幅閒閒地500點來看, 就要下試24000水平

見恒指連升兩日亦不應太樂觀, 熊市易跌難連升, 由於本周係收跌周, 淡友不會輕易放手, 24500/24800~25000都會攔路, 今日科指上升乏力, 皆因美國十年期債息急升上1.4%水平, 不利科企, 按照慣性走勢, 明日中港股市都要收跌, 恒指本周2升2跌就達標

匯市形勢好轉, 代表洗倉走鬼盤收斂, 加上美期急升, 好友就借勢反擊, 至於港股何時再落山做終極大底, 就要睇住匯市以及上証表現, 後市要擔心月尾開始水星逆行, 以及大媽放十一長假, 北水又關水喉, 熊市見反彈亦不宜太樂觀, 過夜可以變天, 炒即日鮮較安心, 向上阻力24500/24800~25000, 上証阻力3650/3700, 如插穿24300, 代表反彈浪結束, 要向24000.23771進發

日前曾問大家貼價熊何時出世, 不過冇網友回應, 其實係非常重要的指標, 今早我才知道周二已登場, 所以今日就爆上去屠熊啦! 不過要擔心的是, 貼價牛亦已出世並大幅上移, 今日港股衝高秒殺小熊, 再碌落去屠殺小牛, 好淡通殺, 目前牛在24150, 有下殺誘因

~~~~~~~~~~~~~~~~~~~~~~~~~~~~~~~

升市現暗湧

恒指由周二低位23771反彈上今日高位24827累計反彈1056點, 深大媽買QQ, 但滬大媽走QQ, 總的來說, 大媽走港股, 買不多, 主要買非權重股, 老外沽A股, 港股方面, 唔少股份都衝高回落收陰燭, 反映人心仍虛怯, 蟹貨/獲利盤出籠, 其實今日港股表面上收升, 但卻收陰, 走勢欠佳

當大市處於尋底階段, 大鱷唔會容許大升, 一彈上去就會打回頭, 當大市見短底, 大鱷尋底目標已達, 大市就會彈高高或連升, 當一見頂就會再插過, 根本就係造市, 

明日地產商開大會討論如何應對阿爺的政策, 今日港股反彈的主要動力來自周一二跌幅過大的內房及本地地產股, 係技術性反彈/挾淡, 並非看好後市的買盤, 早前熱炒的車股, 今日逆市下跌, 莊家正在派貨撤退

華爾街大鱷及美企回購撐股價係高手, 美股餐餐大插後都識彈, 聯儲局班友仔出口術唱好亦唱淡, 耐不耐放下風, 見美股大跌又發出利好言論, 推番美股上山, 昨晚鮑爺擺明係撐美股, 唔講收水, 美股連插後梗係借勢反彈, 美股已連跌2~3周, 上周四權結算完成, 本周美股反彈亦係正路, 9月尾基金季結, 基金經理要做靚盤數, 亦想高位出貨來應付贖回, 9月初白宮派救濟金關了水喉, 美股散戶參與度跌了35%,

中港美三地股市通常係同步見底頂, 昨日上證觸底反彈, 所以今日港股冇創新低, 不過衝高秒殺小熊即回, 反映24800阻力大, 上証及港股同步創兩日以來高位, 同步見頂回落, 同步轉勢向下, 同步收窄升幅,

大鱷養牛熊, 目前貼價牛熊都登場, 位於24150及24840熊, 市弱由低位彈千點(見24800)已經會腳軟, 如有利淡消息就會重拾跌勢, 要有強烈利好消息, 才可由低位反彈1000~1500點,

早前分析內銀走勢, 我已經話內銀A股炒完, 碌緊落山, 拉埋H股落水, 建行12/8重上$5.5整數大位一直守得好穩, 但過去一個星期已經插穿, 比亞迪本來一直穩守$250, 但16/9已失守, 阿里巴巴本來一直穩守$150, 自從周二(21/9)失守, 已經連日收於其下, 這些指標股插穿大位, 反映港股沽壓沉重, 有大手沽盤出緊貨

真係估佢唔到, 今個月玩左16日, 恒指竟然係8升8跌, 周一出現小型股災, 由24920碌落山, 今日竟然高見24827, 一度收復大部份失地, 呢個都算係股災? 分明係人為操控大市上落，大鱷正趴街, 殺人不見血

==================

9月基金季結

9月中基金經理英爺說已將本來重倉的愛股QQ沽出一半持貨, 阿爸已清倉, 對比持倉高峰期已走了大部份新經濟股, 英爺係本港基金界成績一向亮麗, 但英爺說截至9月中已見紅, 第三季已由賺變蝕, 我估本周佢個基金可能蝕得更多

早前我係網誌分析, 曾說9月基金季結, 代入基金經理的角度來看, 見熊市反彈梗係走貨來埋季結, 不會冒風險入市, 如此一來就會削弱港股低位的承接力, 睇下英爺的取態, 就會明白為何港股如此弱雞, 基金經理減磅, 大戶散戶全民皆艇, 大媽推高出貨, 近來見本來熱炒的資源商品鋼鐵水泥股都插, 可能係止賺盤, 趕住埋季結, 如果唔沽, 隨時倒蝕