15/10 港股10月劇本月尾高危

好友守住24500.24800, 繼續向上推進, 底頂上移, 反覆推升, 尋頂市每周都會有新高, 只要中美股市好, 就會帶動港股向上, 我覺得今個月初插穿24000創新低的反彈動力比以往強, 可能係因為年波幅已達標, 長短炒買盤入市, 基金季結的制肘消失, 基金經理可放膽炒, 過去一個月美股反艇反而吸引資金炒價殘港股, 9月份港股係俾美股拉落山, 但近日美股回購買盤進場, 美股造好, 推動中港股市向上

今早睇得出好友刻意壓住升勢, 中午已提醒淡友, 只要上証破3570, 好友就會出手, 話口未完, 午後上証就殺上3578, 扯住港股上山, 阿爺一啖沙糖一啖屎, 今日有利好教育股的消息, 刺激相關股份彈高

早前講過淡友想偷襲, 就要趁大媽放假, 當大媽回歸掃貨就推高港股, 美股都係一樣, 淡友想偷襲就要係10月中業績公布前的禁止買賣期出手, 結果9月中至10月初美股果然大插, 日前美企公布業績後, 重啟回購活動, 淡友縮,好友谷, 美股就飛天

近來睇台股收市總結, 發覺升跌板塊及大市表現似港股, 是不是熱錢國際大鱷全球同步炒呢？ 過去一周美元回軟，利好新興市場股匯，資金流入，炒高亞太區股市

早前熱炒航運股，但10月初波羅的海乾散貨指數見頂回落，連跌6日，過去幾個星期航運股散水，潛行凶間，愈跌愈有, 熱炒股升得急時跌亦快，股民賺賺埋埋隨時嘔突

~~~~~~~~~~~~~~~~~~~~~~~~~~~~~~~~

斷估10月下旬劇本

我覺得大鱷本周係留力, 想預留多些上升空間俾10月下旬創新高, 10月初觸底反彈的力度比以往強, 加上有資金流入港股, 後市有望升上更高水平, 向25800~26000進發

中美股市都靚仔, 以大鱷的能力, 今日大可踢上25500, 甚至更高, 不過就提高了下周破頂的門檻, 亦影響了頂部逐步上移的部署, 所以今日大鱷刻意唔破頂

我反而希望下周(18~22/10)收升, 23/10轉節氣霜降, 月尾淡友反擊, 結算周(25~29/10)好淡角力, 11月初聯儲局議息前的一周獲利沽壓或會加劇

上周五(8/10)國慶後內地復市只得一日市, 收升一天就畫了周線升, 本周國慶行情落空, 上証竟然收跌, 希望下周收升幫下港股, 以周波幅以及時間計, 下周港股會創月內新高

恒指本周波幅超細, 只得571點係受3日市(兩日休市)所拖累, 由於好少連續兩周細波幅, 所以下周應該補數, 會有大波幅, 一般應有900~1500點周波幅

假如大鱷守住24800, 就應挑戰25800~26000, 不過再殺上去就要慎防超買回吐, 因為25700係好淡角力關鍵大位, 如能收於其上, 向上就要加500點見26200, 如打回頭, 就要再下試25000水平

港匯非常強, 資金流入, 係港股動力之源, 假如好友大鱷今個月想推上26000來擴大月波幅及挾淡, 就有可能拖到10月尾或11月才殺跌, 累積龐大沽空最終要釋放, 最好升埋下星期(18~22/10), 然後月尾結算周才大插