木水火
木水火
木水火

泛民爛帳走得甩 市民納稅為咗乜

2021/10/26 13:00:01 網誌分類: 時事
26 Oct

天地有正氣,欠錢唔還冇天理。港府手上嘅公帑,每蚊每毫都係港人拚勁嘅成果,即使依家庫房尚算充裕,又豈可任人胡亂揮霍,何況某啲反中亂港嘅前議員係用納稅人嘅錢嚟破壞香港,直頭係「食碗面,反碗底」,倘若置之不理,正義難以伸張,港府以後何談服眾,港人交稅時,又情何以堪呢?好彩港府現時已撥亂反正、掃除「毒瘤」,唔使再支付無心建設香港嘅議員工資,但係「止蝕」真係足夠嗎?假如嗰啲前議員無錢還,又唔使負擔相應責任,叫全港市民如何發洩心中嘅怨憤呢?   {#iconb_54}

泛民爛帳走得甩 市民納稅為咗乜

每年收到綠信封,市民拆開嗰陣都會膽戰心驚,但無計啦,為咗建設香港,公民責任應盡則盡。但係今年交稅,市民平添一份怒火,皆因見到成班被DQ嘅泛民議員拎完薪津,拍拍籮柚就走;諗到辛辛苦苦工作一年、死慳死抵儲錢,啲稅金竟然畀人拎去反中亂港、風花雪月,真係眼淚在心裏流啊。或者喺成本效益嚟講,港府同泛民達成和解,追番部分薪津係比較划算,之但係從納稅人角度而言,大概市民寧願稅金用喺追求公義,都唔想畀成班泛民逍遙法外囉。 {#iconb_233}

立法會行政管理委員會提交嘅報告顯示,前議員梁頌恆、游蕙禎同梁國雄仲拖欠緊立法會借款,其中梁頌恆因破產,行管會直接「投降」,準備撇銷93萬元薪津;游蕙禎嗰93萬元就同行管會達成和解,但佢喺年度內只還咗17.5萬元;梁國雄嗰筆直頭冇影添。而楊岳橋、郭榮鏗、郭家麒同梁繼昌,4個人加埋涉款成472萬元,最終和解後淨係還咗48萬元。咁嘅情況,功夫茶真係忍唔住要問「十萬句為甚麼」,好難相信有人賴皮賴到咁,須知道每一蚊都係公帑嚟,拎去扶貧不知可以幫到幾多人。 {#iconb_234}

出得嚟行,預咗要還。或者心地善良嘅人覺得成班泛民好歹都叫做過議員,出咗力收番糧係天公地道;之不過睇番條數,以梁頌恆同游蕙禎為例,薪金其實只佔總數大約十分之一,姑勿論佢哋出過咩力,仲有超過83萬元預支營運津貼,係兩條友一當選就「舔到盡」,做咗短短12日,竟然話無錢「回水」,搵鬼信啊! {#iconb_626}

12日花光83萬元可以點做,真相只有天知、地知,同泛民自知,普羅大眾只能夠喺客觀例子中推測。例如係梁、游兩條友嘅辦公室內一房都係酒樽、零食,而且飲親都係名牌威士忌,仲有大大隻鬆弛熊公仔添;又例如游蕙禎發表嘅「扑嘢都冇地方」論;加上已經棄保潛逃、曾經做過兩條友助理嘅黃台仰,畀警方搜出上百粒「偉哥」。嗱,功夫茶不作揣測,之但係一般人以為做議員唔係想像中咁快樂,事實似乎係佢哋做議員嗰陣嘅快樂,港人根本想像唔到囉。 {#icons_girl8}

天地有正氣,欠錢唔還冇天理。港府手上嘅公帑,每蚊每毫都係港人拚勁嘅成果,即使依家庫房尚算充裕,又豈可任人胡亂揮霍,何況某啲反中亂港嘅前議員係用納稅人嘅錢嚟破壞香港,直頭係「食碗面,反碗底」,倘若置之不理,正義難以伸張,港府以後何談服眾,港人交稅時,又情何以堪呢?好彩港府現時已撥亂反正、掃除「毒瘤」,唔使再支付無心建設香港嘅議員工資,但係「止蝕」真係足夠嗎?假如嗰啲前議員無錢還,又唔使負擔相應責任,叫全港市民如何發洩心中嘅怨憤呢?

功夫茶

https://orientaldaily.on.cc/content/要港要聞/odn-20211026-1026_00190_001/泛民爛帳走得甩--市民納稅為咗乜

回應 (0)
我要發表
user