木水火
木水火
木水火

區會失權問題多 市民聖誕好難過

2021/11/22 13:15:01 網誌分類: 時事
22 Nov

區會失權問題多 市民聖誕好難過 {#icons_girl3}

一個人行起衰運,自然頭頭碰着黑,中國人傳統會用「沖喜」去化解,希望通過辦喜事嚟沖走一身晦氣。本港近幾年嚟可謂衰事連連,先有黑暴,再有疫情;捱到家吓疫情稍歇,市民梗係想喺聖誕節「沖一沖喜」,淡化社會上嘅不安氛圍。之但係因為區議會喪失撥款權,唔單止民生服務大受影響,連聖誕燈飾都要等到元旦先有得睇,咩節日氣氛都冇晒,睇怕市民「沖喜」願望又要落空。 {#iconb_617}

今屆區議會先前被泛民主派把持,政治掛帥凌駕民生,市民已經苦不堪言;港府出手撥亂反正,完成18區區議員宣誓,仲收番區議會嘅撥款權。不過港府做事總係鍾意做啲唔做啲,最為急切嘅「撥亂」完成咗,重返正途即刻冇晒影,自然衍生一大堆問題啦,地區活動同工程大受影響,即將來臨嘅聖誕同新年更首當其衝,甚至連長者服務嘅撥款都要等等先。有區議員形容,依家好似係「知道餐單冇權煮餸」,最終受害嘅咪又係全港市民,最驚係市民「肚餓」自然有脾氣,民怨又要飆升。 {#icons_cat6}

嗱!唔好以為冇聖誕燈飾「事小」,港人傳統重視過節,而且呢個聖誕唔係一年一度咁簡單,前年有修例風波,街頭火光強過燈光,上年又有新冠疫情,市民驚感染人人心慌慌;等足兩年,港人當然想開開心心、大玩特玩。另外,所謂「人靠衣裝,佛靠金裝」,要畀外人睇到香港現時繁榮安定,門面嘢點可以少?輸人唔輸陣,聖誕燈飾作為香港嘅「招牌」話冇就冇,畀啲西媒見到,又有文章可做。 {#icono_38}

再講,想「沖喜」嘅點止小市民。本港零售同服務業近年一潭死水,商戶梗係想趁聖誕大賺一筆。節日氣氛係帶動消費意欲嘅關鍵,顧客見到景靚氣氛好,使錢都自然疏爽啲。雖則話商戶可以自行包裝,但如果成條街都死氣沉沉,港人隨時連出街意欲都冇,港府派得再多消費券都振興唔到經濟啦。畢竟社會氛圍足以影響市民情緒,市民如果感到憂慮,各方面都會偏向保守;家吓整個香港仲未走出陰霾,利用節日氣氛去沖淡市民心中嘅不安,本身係最立竿見影嘅方法。 {#icono_59}

唉!市民難以歡度聖誕似乎已成定局,緊接而嚟嘅元旦同農曆新年可唔可以好好過,都仲要持觀望態度。更甚者,區議會失撥款權之後,連帶「社區參與計劃」同「地區小型工程計劃」都受拖累,長遠可能阻礙新市鎮發展。事實上,立法會通過削減區議會權力已有一段時日,民政總署仲研究緊新嘅審批撥款流程同準則;希望港府能緊記「撥亂反正」同「知錯能改」一樣,係分兩大部分,就好比治病,切除咗毒瘤都未稱得上健康,之後仲要好好調理身子,假如港府持續懸而不決,難保唔會有新嘅病菌乘虛而入囉。{#icono_51}

功夫茶

https://orientaldaily.on.cc/content/要港要聞/odn-20211122-1122_00190_001/區會失權問題多--市民聖誕好難過

回應 (0)
我要發表
user