6~8/12 港股置諸死地而後生

港股急挫屠牛.牛死熊命危, 好淡通殺

6/12(周一)恒指收報23349, 大跌417點, 連跌兩天

置諸死地而後生

科指急瀉, 預期的破底終於出現, 科指及國指齊創今年新低, 恒指幸保不失, 今日港股大插釋放了沽壓係好事, 大市嚴重超賣, 加上阿爺降準的及時雨, 利好港股, 通常大插創新低都會觸發反彈, 想食彈高就要先震走好友, 今日大好友高人叫粉絲斬倉止蝕止賺走鬼, 燈神看淡散水, 相反指標係利好訊號, 日後當佢地再看好就要小心了, 有人辭官歸故里, 有人漏夜趕科場, 唔少早前造淡的空軍食胡, 但今日沽空急增至16.54%, 於這麼低水平造淡, 隨時會被大鱷挾淡

上証高見3626的兩個月高位後倒跌收場, 午後獲利沽壓湧現, 倒插收3589, 跌18點, 走勢差, 希望阿爺放水幫到手, 因為降準利好內銀內險內房券商股, 牽一髮動全身, 就可帶動其他股份上揚, 印象中降準好似連外圍金融市場都會俾正面反應, 明日有望高開, 港股能走多遠就要看上証表現, 今日港股大插, 道指恒指差距再度超標, 恒指上升空間擴大, 明日港股要追落後, 許升不許跌

明日周二(7/12)轉節氣大雪, 係變盤日, 收升或跌對後市具啟示作用, 恒指收市U盤已是連續4日踢高, 代表好友健在, 正部署反擊, 如能收市重上23500, 代表好友仍未棄守, 會再挑戰23800~24000阻力位, 23175底+1000~1200點反彈幅度=24175~24375

港匯進一步走弱見7.8017, 收7.8005, 熱錢再度流走, 港股又反艇, 通常熱錢沽貨撤退港股就會突然大插, 當沽壓消除, 港股就會大彈高, 連日大舉屠殺近19000張肥牛後, 目前牛熊分布顯示港股再下殺誘因細, 貼價小肥牛陣亡, 肥牛在23200樓下, 熊熊大幅下移至23648, 大鱷準備開餐食熊掌, 年尾企業水緊, 近來配股活動增加, 今日輪到內房世茂集團.龍光集團, 怪不得大行撐市, 恒指連日在23500穿梭, 咬住唔放, 如能上企23800, 就會見24000

港股報復式反彈, 大舉屠熊

7/12(周二)恒指收報23983, 大升634點, 結束兩連跌

其實港股最難捱就係上周(29/11~3/12)MSCI及恒指季檢成份股變動, 減比重股受壓就拖低港股, 亦係30/11急挫創新低的原因之一, 24000的恒指市帳率略低於1倍, 估值偏低, 隊埋落23175簡直係大平賣, 多位基金經理過去幾個月都減了港股持倉, 有些由五成持倉減至三成, 但當港股大插創今年新低都紛紛趁低吸納, 恒指由今年大頂已嘔了8000點, 向下空間已收窄, 無論短炒客, 抑或長線價值投資者都吸貨, 其實唔少基金經理今年目標睇23000~23200，做8000點年波幅(31183-8000=23183)，上月尾低見23175年波幅已達標, 明年再創新低都得

人民幣強到不得了, 連老外都連日掃A股, 上証底頂上移, 不但企穩3550, 更上破3600,向3650進發, 成為港股的後盾, 年尾企業水緊, 近來配股活動以及新股IPO增加, 係大行撐市的原因之一, 假設今個月不再創新低, 做1500~2000點月波幅的話, 就要上企24000, 如果大鱷唔想太快造大頂, 上到阻力大位24200/24500就要掉頭回落屠牛, 拖到12月下旬才做大頂, 假如今個月係收跌月, 亦不應於月初升得太高俾靚位股民造淡

23175(底)+1500~2000點月波幅= 24700~25200

如果未見底, 24500 - 1500~2000點月波幅=23000~22500

~ 日前說23000~24000等爆邊來擴大月波幅, 今日向上爆邊, 創月內高位, 重上10天線, 久違的大升幅, 挾淡味濃, 淡友逃命補空倉, 基金追貨, 進一步推高大市, 超賣股飛天

~ 日前已預告今日轉節氣大雪, 係變盤日, 收升或跌對後市具啟示作用, 收升機會大, 結果高開高走, 一升到尾, 強爆, 全靠阿爺降準救市, 不過上周率先起步升的內銀趁好消息出貨, 逆市下跌

~ 恒指通常每周升跌2~3天, 目前係1升1跌, 博反彈要睇位食胡

~ 上周已說比亞迪走勢轉弱, A股寧德時代反艇, 電動車板塊有散水味, 拖累汽車股

~ 周三四五係創周高位的時間窗口, 今日高位23989/8530不是頂, 向上阻力24200.24500~24600

~ 股市有水則生, 老外大手掃A股, 大媽大手掃港股, 港匯亦轉強, 由昨日弱雞的7.8017回升至7.7950水平, 港股隨即生猛晒, 不過後市並非單邊向上, 只係超賣技術性反彈, 要留意港匯每日的變化, 係港股升跌關鍵

~ 避險情緒降溫, 日圓轉弱, 美股止跌回升又飛天, 美期續升, 急跌才會急彈, 基金年結, 齊齊掃高提早埋數拎花紅放聖誕新年假期, 港股已偷步跟美期升, 明日獲利沽壓會湧現

~ QQ今日雖然急升, 但其實1~2/12有少少莊家只係炒兩日上$473已經食胡鬆人, 今日爆升並非由莊家推動

~~~~~~~~~~~~~~~~~~~~~~~~~~~~~~~~~

~ 恒指收市U盤已是連續5日踢高, 即係由1/12起大鱷就佈局好淡通殺, 月初刻意壓住升勢, 高見23864就掉頭向下, 隊落去屠牛殺好友, 等科指創新低任務完成後, 才踢上去屠熊, 好淡通殺

~ 上周五恒指一插即彈, 明明炒緊降準, 但昨日特登玩大插插屠牛, 今日才彈高屠熊, 玩完大震倉才上山, 大鱷正趴街, 昨日插水嚇到好友雞飛狗走, 止蝕斬倉止賺, 一眾好友死心, 全城看淡就飛天

~ 大鱷昨日玩暴跌係要趕在阿爺宣布降準前殺好友

~ 大鱷今日玩飛天係要趕在14~15/12(下周二三)聯儲局議息前殺淡友, 臨近大限股匯債或會起風雲

~ 港股大幅上升, 淡友被大鱷挾到叫救命, 拿拿臨平倉, 進一步推高大市, 今日港股沽空明顯縮減至14.85%(昨日16.54%)

~ 早市大鱷壓住港股升勢, 扮受制於23800, 震牛引熊, 午後愈走愈高, 近全日最高位收

~ 按照今年港股周線的慣性走勢, 今個星期係收升周, 本周五(10/12)會收23766/8455之上, 關鍵位23800

~ 近來在美上市中概股洗倉式大插係老外空軍殺跌來平倉食胡, 港股空軍當然照跟, 所以周一港股亦大插, 當一眾大淡友食胡, 中概股隨即作出報復式反彈, 跌過龍梗係會彈高啦! 淡友食飽飽, 好友已奪回主導權

~ 港股升勢凌厲, 但升得太急, 要回氣儲力再上攻, 港股已偷步跟美期升, 明日獲利沽壓會湧現, 債息亦有暗湧, 為全球股市的隱憂, 近來全球股市彈高可能係12月有基金年結粉飾櫥窗效應, 提早埋年結放假, 係中港美股市一插即彈的主因