乜都5G｜2022智能手機有「晶」采？！
2021/12/31 04:13:53 網誌分類: 經濟
到底點解入門機咁難求？除咗因為長者需要升級智能手機適應新常態，今年全球晶片短缺先至係主要原因。自疫情出現以來，直接加速各行業數碼轉型，仲有物聯網嘅迅速發展，令晶片需求急增。疫情亦令晶片生產商大失預算，導致產量不似預期，部份廠商唯有將新產品的推出日期推遲，以應付晶片不足問題。
此外，隨著全球5G普及，根據《電子時報》報道，有手機代工生產商預期，市場對5G智能手機需求極強，於未來三年，發展較成熟嘅市場，5G智能手機出貨量每年將會翻一番。所以各大晶片生產商均集中火力生產支援5G技術嘅晶片，令支援4G技術晶片產量減少，所以入門級4G智能手機更加難求。
預期明年全球出貨量近14億部
事實上，喺疫情下，近兩年嘅智能手機出貨量的確比以往少。不過凡事總會有盡頭，市場調查公司TrendForce早前發表咗一份報告，預期2022年全球經濟活動將會重回正軌，當中全球智能手機出貨量更會達到約13.9億部，按年增長3.8%，差不多返到疫情前數字，幾大品牌嘅出貨量都有所增加。呢13.9億部裏面，有大約6.6億部會係5G智能手機，預期全球5G智能手機所佔嘅份額，將會升至47.5%。
我哋睇返香港，據聞喺2022年嘅第一季將會有近20款新機推出，當中大部份都係支援5G嘅型號，意味着消費者會有更多型號選擇。新一年智能手機市場有多「晶」采，大家拭目以待！
和記電訊香港行政總裁
古星輝
■全球5G普及，市場對5G智能手機需求極強。
回應 (0)
我要發表