乜都5G｜走出5G結界
2022/01/07 04:14:53 網誌分類: 經濟
前幾日朝早睇報紙，見到AT&T同Verizon兩大美國電訊公司企硬，表示唔會再理當局要求，會如期喺1月5號推出C頻段（即係4-8GHz）頻譜嘅5G服務。點知事情發展峰迴路轉，食完晏返公司就睇到網上新聞話兩大電訊商已經讓步，同意延遲兩星期推出5G服務，等當局有時間再處理5G與航空安全嘅問題。有時，要做好一件事，難免要互相遷就。
電訊商協力助港成5G智慧城巿
話時話，香港當年準備推出5G嘅時候亦非一帆風順，業界經常都要跟唔同持份者協調。最記得早期講嘅5G禁飛區（有人叫5G黑洞或5G結界），範圍包括大埔、沙田、馬鞍山、粉嶺同赤柱等，影響差唔多過百萬人口，當中仲包括中大同科學園兩個科研基地，佢哋用唔到5G的話，對香港嘅科研發展有重大影響。
由於5G需要較多頻譜先可以發揮威力，少不免要同其他服務正在使用嘅頻譜重疊。所謂5G禁飛區，係指電訊商唔能夠喺有關範圍用寬頻較多、穿透力較強，俗稱「黃金頻譜」嘅3.5GHz頻譜提供5G服務，原因係呢個頻段同禁飛區內衛星服務所使用嘅訊號重疊，為免互相干擾，所以呢個範圍嘅5G服務要暫時讓路。我哋業界出名夠靈活，加上方法總比問題多，喺同有關部門協調嘅同時，有人改用4.9 GHz頻段，亦有人重耕2.1 GHz頻段用嚟提供5G服務。總之大家同心協力，盡量將對客戶所造成嘅影響減至最低，同時又平衡各方利益，大前提係唔好阻礙香港發展成為5G智慧城巿。
就咁樣，香港推出5G服務好快就嚟兩周年喇！半年前，聽聞兩個喺大埔嘅衛星站已經着手搬去赤柱舂坎角，有關當局仲話禁飛區嘅問題可望喺2024年底前「徹底解決」。我哋距離解決5G禁飛區問題又近一步！有咗呢個初步時間表，業界喺未來嘅5G發展部署更加心中有數。
和記電訊香港行政總裁
古星輝
■兩大美國電訊公司Verizon與AT&T願意按當局要求，延遲推出C頻段（即係4-8GHz）頻譜的5G服務。資料圖片
回應 (0)
我要發表