古星輝
古星輝
古星輝

乜都5G|「無感出入」 5G智慧泊車

2022/01/14 05:44:41 網誌分類: 經濟
14 Jan
        每逢長假期,停車場都例必大排長龍,而呢個或多或少同出入閘有關,每部車出入停幾秒,好快就出現車龍。5G有好多應用,絕對能有效提升智能交通體驗,無論揸車定泊車,5G超高速、極低時延嘅優點都會幫到手,真係冇得輸。

最新嘅《施政報告》就曾經引述一間國際市場調查機構,話香港嘅5G覆蓋同穩定性分別排行全球第一及第二,為好多創新5G應用和方案提供咗有利條件。
簡化流程 加快疏導車龍

先唔講車聯網同智慧出行,因為始終牽涉好多道路基建,亦要等5G獨立網絡架構(SA)發展成熟先有條件。簡簡單單只講智慧泊車,「無感出入」5G停車場嘅泊車方案,已經可以大大加快商場同辦公大樓嘅人流同車流。喺港島同九龍,已經陸續有室內停車場採用咗5G智慧泊車方案,簡化出入閘嘅流程。

(一)高清影像辨識:唔使停車、唔使開窗,亦唔使拍卡。當汽車到達停車場閘口,高清鏡頭透過5G超高速、低時延嘅傳輸,極速同雲端嘅數據庫溝通,瞬間辨識已登記嘅車牌號碼,跟住自動開關閘,暢順無阻,是為「無感出入」。

(二)結合流動支付:唔使人肉畀錢,只要用相關嘅應用程式,或者喺網絡登記或預設好信用卡,出閘即可自動繳費。我親身試過「無感支付」,真係爽、快、方便。

為咗提升香港嘅智能交通體驗,各個持份者都好努力。其實「無感出入」5G泊車方案嘅應用喺戶外更見優勢,例如喺露天停車場(俗稱爛地停車場),特別係喺偏遠地方嗰啲,有電力供應但未必有寬頻,呢個時候5G就可以發揮作用,安裝不同類型嘅智慧停車場方案,既節省人手,亦方便駕駛人士,真係商機龐大。

5G嘅應用層面廣闊,唔同場景和唔同行業都有獨特嘅創新應用,而喺疫情嘅影響下,好多企業都知道數碼轉型同先進技術對提升營運效率的好處。政府去年七月宣佈將「鼓勵及早使用5G技術資助計劃」加碼,並將申請期延期至今年七月底,有興趣嘅企業要把握機會了。
和記電訊香港行政總裁
古星輝
  
回應 (0)
我要發表
user