乜都5G｜香港近三成用戶已用5G - 古星輝
2022/01/28 05:45:55 網誌分類: 經濟
要5G進一步普及，覆蓋的廣度和深度同等重要，舊年政府推出嚟拍賣嘅新增5G頻譜700MHz頻段，就係3.5GHz黃金頻段之外嘅「靚頻」，以往用於模擬制式的電視廣播。相信大家都記得過去有段時間成日話要換數碼電視，其實就係要清空該段頻譜作為規劃5G發展之用。700MHz頻段屬於低頻，穿透力強，覆蓋範圍廣，用於地底或封閉地方，可以增強室內接收。
另外，呢段頻譜可用於「廣域覆蓋」，即係話就算在相距基站較遠，都可以收到信號。對電訊商來說，有咗呢段頻譜，要提高5G覆蓋，簡直如虎添翼。雖然700MHz頻段目前仍未投入服務，估計本年內應可使用，到時大家就可以體驗到更好嘅5G服務。
朝向獨立模式5G網絡發展
講到要5G真正普及，以及要完完全全發揮5G嘅功能，電訊商嘅主要發展方向，都係邁向終極嘅獨立模式（SA）5G網絡。目前，大部份的5G商用，都係用緊非獨立模式（NSA）5G網絡，簡單來說，即是喺4G網絡基礎上行5G。喺初初推出5G服務嘅時候，NSA無疑係建網最快及合乎經濟原則，不過從非獨立組網過渡到獨立組網，至可以發揮5G網絡嘅最大威力。屆時，車聯網、遠端醫療、智慧交通等mission critical嘅應用就可以進一步充份發揮，而將香港發展成為智慧城巿，又行近了一步。
和記電訊香港行政總裁
古星輝
■5G要在香港進一步普及，覆蓋的廣度和深度同等重要。
回應 (0)
我要發表