木水火
木水火
木水火

村屋排污無王管 釐清權責免推卸

2022/05/13 12:00:00 網誌分類: 時事
13 May

功夫茶認為任何部門能得到市民認同,離不開「不受虛言,不興偽事」,切忌三斤豬頭得把嘴!本屆政府一事無成,蹉跎歲月,就係冇安民之心!管理村屋污水排污,更要察民疾苦!希望申訴專員能為各部門釐清權責,協調妥當,不會你推我卸,搞到污水橫流冇人理,村民眉鎖憂愁! {#icono_39}

村屋排污無王管 釐清權責免推卸

有道是「三個和尚沒水喝」。這個故事頗深入民心,要言之,就係話要辦妥一件事,需要明確責任,且需有制度作保證,若然責任不明確又欠制度作保證,你推我讓,責任就無從落實,人多聲雜,反而辦不成事。 {#icono_12}

各位,新界村屋一般係按《建築物條例(新界適用)條例》興建而獲得豁免,因而不受《建築物條例》中部分條文規管。興建前須獲得地政總署署長發出嘅豁免證明書,豁免項目包括排水工程。呢,在未有提供公共污水渠嘅鄉郊地區,申請興建新界村屋人士,須按該規定建造包括化糞池及滲水井嘅污水處理設施。 

目前,環保署、食環署、地政總署分別按《水污染管制條例》、《公眾衞生及市政條例》及地契條款,處理新界村屋欠妥排污設施嘅投訴。政出多門,加上港產官僚「少做少錯,不做不錯」嘅為官作風,可想而知,一旦村屋排污設施,如化糞池出現破損,可以造成環境衞生滋擾及污染,甚至波及附近嘅河道,破壞環境生態,亦可能會傳播疾病。冇錯,維修保養屬個別業主責任,之不過唔係個個業主都咁有責任心,肯第一時間自願作出糾正,咁,村民又向邊個部門投訴至啱呢? {#icono_86}

疫慌下,污水圍城,村民人心惶惶,有爆渠排污等問題,最終惟有向申訴專員公署投訴,指有關部門嘅執管工作欠缺成效。有見及此,申訴專員尋日宣布展開主動調查,審視政府對新界村屋欠妥排污設施嘅執管工作。呢嗱!包括現行執管嘅成效及部門間嘅協作,以便有需要時向政府提出改善建議。

申訴專員一片苦心,值得肯定,至怕部門又係「意見接受,態度照舊」,一如本報指出有些部門如食環、房署冥頑不靈,「年年審計年年犯,知錯認錯不改錯」,根本就係嘥氣!公署向有關部門主動調查,應着力看部門是否幹實事,所謂「上面千條線,下面一根針」,再繁雜嘅任務,再千頭萬緒嘅工作,也能條分縷析,去到最後,其實就係睇每個部門有冇為人民服務之心!否則,到頭來,又係落得三個和尚冇水飲! {#iconb_58}

各位,申訴專員依家正搜集有關課題嘅資料及意見,並歡迎市民喺下月11日或之前向公署提交資料或意見。功夫茶認為任何部門能得到市民認同,離不開「不受虛言,不興偽事」,切忌三斤豬頭得把嘴!本屆政府一事無成,蹉跎歲月,就係冇安民之心!管理村屋污水排污,更要察民疾苦!希望申訴專員能為各部門釐清權責,協調妥當,不會你推我卸,搞到污水橫流冇人理,村民眉鎖憂愁!

功夫茶

https://orientaldaily.on.cc/content/要港要聞/odn-20220513-0513_00190_001/村屋排污無王管--釐清權責免推卸

回應 (0)
我要發表
user