KellyChu - 鐵路迷羅生英文好流利｜Executive日記

2022/05/17 04:12:03 網誌分類: 生活

17 May

「東鐵過海真的很興奮」，呢首歌喺Kelly腦海loop完又loop，這首神曲始祖、鐵路迷羅哲琛先生爆紅咗，而佢嘅改編自《綠袖子》嘅成名作「屯馬開通真的很興奮」，同樣深入民心。小妹仲發現，羅生接受中文傳媒訪問時對答如流之外，仲以淡定兼流利嘅英文接受傳媒嘅訪問。

羅哲琛（Jason Law）接受英文傳媒訪問時話，雖然等到有啲攰，但覺得好值得，佢好享受呢條東鐵線過海線通車嘅歡樂時刻，仲話細細個已經知道東鐵線會擴展，終於有機會親身乘搭，真喺好激動。Kelly估計，「羅生」咁穩重，除咗因為有豐富嘅受訪經驗，亦有可能佢係應屆文憑試考生，勤力溫書，所以英文對答如流。
雖然要準備應考，但羅同學經常上載影片，唔單止有DSE打氣站，仲有好多自製嘅採訪影片，題材當然有佢最愛嘅鐵路啦。有網民讚短片內容充實，佢嘅咬字冇懶音，拎住嘅自製MIC同埋MIC牌都勁有趣，好有誠意呀！
Kelly Chu