木水火
木水火
木水火

行為指引小修補 司法改革就唔做

2022/05/17 12:30:00 網誌分類: 時事
17 May

行為指引小修補 司法改革就唔做  {#iconb_233}

本港家吓亂象頻生,諸如黑社會等不法狂徒之所以橫行無忌,無疑係源於有啲政府部門「有法不依,執法不嚴,違法不究」。其中,司法機構受到嘅輿論批評最多,甚至連「司法獨立」嘅美名,都被譏諷為「司法獨大」,法官公正不阿形象幾乎破產,民望跌至谷底!有見及此,各界都希望司法機構可以做番啲嘢,例如進行司法改革;殊不知,司法機構尋日發表長達44頁嘅2022《法官行為指引》,只係一啲小修小補,幾乎就於事無補,實在令人失望透頂。  {#iconb_234}

呢,終審法院首席法官張舉能都承認,《指引》自2004年首度發表以嚟,有關司法行為嘅議題有過唔少議論同發展,依家係合適嘅時候進行檢討同更新。而經修訂後嘅《指引》,的而且確有因應目前形勢,添加咗唔少內容,例如明確加入咗避免不必要地公開個人資料嘅條文,又加入咗關於社交媒體和「起底」等全新內容,同時加入咗處理涉及公眾爭議案件嘅一般原則,以及有關法庭內嘅言行舉止,仲有喺履行司法職能時,對於訴訟各方同他人作出評論方面嘅指引,其中就包括咗要求法官應以禮待人之類,總之就避免不必要嘅言行,注意自己言行可能造成嘅公眾觀感等啦。 {#icono_17}

嗱,功夫茶並唔係話今次修訂冇用,或多或少都符合現實需要嘅,各界都大致認同。例如有本身係律師嘅議員認為,更新《指引》係合適且有必要性,法官應約束自身行為,唔係就會削弱外界對法官處事嘅公正性。另外有專家都認為,依家正係時候更新《指引》,不過就特別提到,假如法官被「起底」,「起底」本身已經屬刑事,又使乜再請示法院領導,直接報警咪得;喺呢方面,專家似乎比司法機構更清醒噃! {#icono_6}

雖則話修訂《指引》符合現實需要,之不過係咪能夠徹底改善法官喺市民心目中嘅形象呢,最多咪改善些少,坦白講,完全做唔到對症下藥囉!舉例話《指引》要求法官要以禮待人咁,家吓啲法官好冇禮貌咩,唔通有法官喺法庭上「妖」人?無㗎嘛!對於法官,市民批評得最多係乜?司法不公囉!好似有啲案例,可以表證成立但罪名不成立,咁都得嘅,正常人都會覺得奇怪啦,自然想問︰法庭究竟係執行公義,抑或查實玩緊文字遊戲呢? {#icono_86}

仲有㗎!法官戴假髮係英殖時代陋習,何止功夫茶,好多市民都認為要去之而後快,咁先可以樹立管治新風!心中有法,又使乜笠住頂假髮?唔通頂假髮有特異功能,笠上去就可以變成法官咩?香港嘅法官,又使乜遵從外國嗰套,堅持呢啲不必要嘅刻板形象呢。功夫茶相信,比起外表,港人更注重法官嘅內在,實實在在咁公平審案就夠㗎啦! {#icons_boy7}

功夫茶

https://orientaldaily.on.cc/content/要港要聞/odn-20220517-0517_00190_001/行為指引小修補--司法改革就唔做

回應 (0)
我要發表
user