Kelly Chu
Kelly Chu
Kelly Chu

KellyChu - 直到案情結束 才安排領養 愛協澄清不會人道毀滅走私貓狗|Executive日記

2022/05/25 04:12:06 網誌分類: 生活
25 May
        上周有不法份子走私過百隻貓狗,唔少係哥基、柴犬、布偶貓、英短等名種,愛護動物協會接收照顧部份毛孩,竟然引起網上傳言話佢哋會喺短短數月內人道毀滅,即時群情洶湧,好多人打爆愛協嘅熱線,爭住領養毛孩,搞到愛協職員接電話接到手軟,要澄清無人道毀滅嘅計劃。

愛協喺社交平台譴責有人涉造謠,重申所有懷疑虐待動物案接收返嘅動物都係證物,喺調查期間,除咗得到執法機構嘅指示,愛協只負責醫治同照顧佢哋,而所有虐待動物案要等結束後,收到執法機構嘅指示,先可以安排領養。愛協補充,任何來歷不明、由外地入境嘅動物,要按法例規定,接受最少四個月嘅隔離檢疫。

Kelly知道愛協同大家一樣,見到呢啲可憐嘅動物都感到好心痛,希望佢哋盡快康復,可以遇到愛錫佢哋嘅家人。

愛協提醒有心領養嘅市民,除咗捐款或捐物資之外,亦可以領養喺愛協領養中心尋家嘅毛孩,佢哋當中唔少已尋家超過四個月,除咗可以令佢哋有溫暖嘅家,更可以令愛協有更多資源同人手,去照顧其他有需要嘅動物,大家記得要留意呀!
Kelly Chu
  
  
回應 (0)
我要發表
user