月尾港股好淡大鱷決戰

14/6 周二恆指收21068, 升0.41點，低開高收.單日轉向

牛死熊命危

港股置諸死地而後生，低見20717回補30/5上升裂口 20779~20885屠肥牛即彈，明日如能突破本周一高位21320 代表好友健在， 今早老外沽出深A股，但午後卻大手掃入A股，推動內地股市低開高收，單日轉向，靚絕，今日上證已創新高，明日要挑戰3300大位，利好港股

月中是港股回調的時間窗口，早前第一次上22000及100天線只係試水温，今次調整插穿21000是在預期之內, 港股雖然大幅回吐，但市底仍強市寬佳，繼上周恆指10天線升穿50天線，本周20天線亦已升穿50天線，近來連日下跌就會有貼價熊出世，普遍分析都唱淡，吸引淡友入局，如今熊仔已落到21500水平，當時辰一到就會再殺上去，反彈阻力10天線約在21400水平

唔少股份都受美國或會大幅加息 所拖累， 因為融資成本會急增，但為何港科技卻呈強勢呢？ 因為中國不但冇加息，仲推出救市政策，以及放寬科企的監管

點升上嚟就點落返去，股災式暴跌，繼續尋底

13/6周一恆指收21067, 急挫738點，連跌3日

上升裂口 27/5 20272~20494, 30/5 20779~20885未回補是後患

港股大裂口開出唔俾企錯邊的股民逃生係大鱷一貫操控港股的手法，低見20993即彈，又扮守得住大位21000來震熊引牛，20400-21000肥牛飛撲入市，貼價牛肥熊瘦，有下殺誘因, 估計淡友會在 議息前盡量推低大市

一般來說，大市未見頂大鱷就會力守關鍵大位，不過當見頂後就會縮手唔托，低位毫無承接力，全民皆艇買盤縮，斬倉止蝕盤湧現，股市就會急挫， 老外狂沽A股走鬼， 進一步拖低港股

以周線來看，今日低見20993巳跌穿上周低位21030, 港股轉勢向下，破位而下尋底格局已形成，月初低位20884不可能守得住，要向20500進發來擴大周及月波幅，有阿爺出台政策救市做後盾，如果好友仍未放手，就要守住20500，如收於20600之下，小心後市會急挫，如下試20000不妙

收跌周不會在周一見底，無論港股抑或指標股QQ周波幅都未達標，仍有下跌空間， 周三聯儲局議息前金融市場風雲變色， 華爾街大鱷 玩逼宮，想嚇窒鮑威爾，股滙債三殺，上周四五美股大插，到今日仍未止瀉，美期暴瀉，拖累全球股市

港股高處不勝寒，獲利盤湧現

10/6 周五恆指收21806,跌62點,繼續尋底屠牛之旅

港股連升兩周，累積龐大升幅，下周不妙，皆因14-15/6聯儲局議息，呢兩日美債息和美元已經湧緊上去，今日港股冇跟隨上證創新高，升勢已露疲態， 港股溫度計 QQ及港交所見頂回落，底頂下移，代表港股尋頂之旅暫告一段落，以恆指閒閒地千點周波幅來看，下周如未能重上22000水平，就要下試21000

留意大鱷的佈局， 明知臨近15/6聯儲局議息，以及今晚10/6公布美國通脹數據，股匯債必定會有負面反應，所以趁本周初美元及美債息仲未爆上，就拿拿林推高港股做世界，見呢兩日 美元及債息 蠢蠢欲動，湧緊上去，大鱷就沽貨鬆人，托沽手影明顯，扮跌唔落一插即彈引牛入局， 今日就大舉屠牛

昨晚美股暴跌破位而下，不利港股，港股出現多個利淡訊號， 多隻指標股 見頂回落，沽空連日急增， 內銀內險內房地產等舊經濟股持續沽壓沉重，由26/5起，恆指收市U盤每日都係踢高，但今日卻走低， 港匯轉弱，熱錢流走，人民幣連跌4日，收報6.6927，跌90點子, 昨日 港股見頂回落轉勢向下， 展開尋底之旅

本周港股收升，連升兩周已打破了慣性走勢 ，代表好友已奪得主導權，因為由2月中起, 港股每次只升一周就回落, 如今連兩周係強烈利好訊號, 月尾就要向22000及100天線進發， 正正配合 元帥早前寫的劇本，4-6月係築底市，6月好友發力上攻

9/6周四恆指收21869,跌145點

大成交衝頂冇好下場

昨日港股出現罕有的$1840億超大成交, 今日就倒跌收場, 港股溫度計港交所及QQ出現見頂訊號, 上證衝高回落，於3250穿梭，預示港股調整未完，嗶哩於收市後公布業績唔靚仔，會引發科企沽盤出籠

昨日港股Rsi已經去到70附近，通常上到呢個水平大市就會轉勢向下，今日果然收跌

港股今日雖然跌幅不大，但大量貼價牛飛撲入市，拉住港股後腿，21700向下級級有肥牛，淡友散戶輸到怕，紛紛變好友買上，有下殺誘因，北京朝陽疫情嚴峻，再度引發市場憂慮封區會拖垮經濟，好友紛紛沽貨止賺，導致中港股市齊齊掉頭回落

周三低位21734, 周四低位21738, 假如大鱷本周仍想攻上去做大頂，又點會咁好死落番去周三低位起步點，接好友散戶上車然後再爆頂呢！

上次高見21415回落至20884就再上攻， 只得 531點 跌幅太少， 因為通常要回吐600～800點 才達標，我估 係因為當時未見頂所以大鱷唔畀跌得太深，如果做了短頂，短炒好友大鱷已食胡，又或者空軍完成部署，大市就會跌多些, 要下試21500才達標，如中美股市亦見頂回落，恆指就要插深些，要向21000進發

有外電報道指，阿里巴巴旗下螞蟻集團或可能可能重啟上市，可是之後螞蟻集團表示，正在監管部門指導下專注落實整改工作，目前沒有啟動首次公開發行的計劃，假如炒阿里的熱錢見炒錯市齊齊散水就大鑊

8/6周三恆指收22014, 升483點, 繼續尋頂屠熊之旅

已經有一段長時間冇莊家進駐的QQ今日變天, 莊家湧入大舉掃貨追落後, 係港股市功臣, 推動科指率先突破4月高位4773, 科企強勢領軍，不過QQ$400係阻力大位，蟹貨會出籠

恆指早市上到22000水平急回，扮見頂震牛引熊，大鱷呢招果然令牛牛減倉，熊熊飛撲入市, 不過以周波幅計, 後市如上到22200已有約1200點周波幅, 本周不宜攻上22500, 如中美股市回吐, 加上港股升勢過急, 超買, 始終會對港股構成壓力, 小心再伸多一腳上去大市就要回吐, 其實老外今早沽出深圳A股獲利, 拖累內地股市一度急跌

3/6水星逆行結束，中港股市隨即於端午後芒種日起動，港股五月不窮，六月亦不會絕，未到七月已翻身，只要失驚無神大幅抽升挾淡，逼空軍投降回補空倉，又或者股民湧去買衍生工具做好倉，發行商入貨，就可進一步推動大市向上,

今日港股升勢並不全面, 皆因資金繼續丟舊經濟股，換入新經濟股, 即係逼股民跟紅頂白, 追入科企幫手推高大市, 大鱷大媽就乘機高位派貨

昨晚美國 10 年期債息高見3.064%後低收報2.979%,中港美股市借勢反彈, 不過今晚再度重上3%, 不利後市，如果好友想今個月收升，亦不應一路殺上去做大頂，畢竟仍有3個星期才到月尾，好難一直托住高位, 後日美國公布通脹數據, 獲利避險沽盤會出籠

7/6 周二恆指收21531, 跌122點

睇呢兩日港股表現，以及上證的強勢，本周港股收升已無懸念，收升周多數會在周三四五創周高位，即係會升穿今日高位21744, 如能連升兩周就更加確認早前所說3月做今年大底18235，4-6月築底, 不過美股大熊市會拉住港股後腿,令築底時間延長

早已說過假如昨日夾硬推升，今日獲利沽壓就會加劇，亦講過不宜太早上22000， 科指跌兩日就會彈一日，今日回吐係正路，拖多一日，21800-22100熊又養肥咗，老美收水，阿爺放水，中港股市一回吐就見趁低吸納盤，所以兩地股市一插即彈

人民幣兌美元在岸價收報6.6655，跌198點子, 中港股市借勢調整，港股要消化沽壓，再儲力向上，關鍵阻力大位22000，如能收於其上，下一站22500

中港股市氣氛明顯好轉，成交增加， 配合升勢， 底頂上移尋頂格，港股溫度計港交所早已率先起動， 具啟示作用

連早前弱雞的QQ及阿里都康復出院去登高，扯住港股上山, 近來見資金換馬, 沽出舊經濟股, 換入新經濟股, 今次升浪科指強得不尋常，皆因阿爺放寬互聯網新經濟企業的監管

早前已講過美股熊市，但港股卻是熊轉牛，所以港股表現勝道指，兩個指數差距明顯收窄，反映有資金流入炒中港股市

上證突破3200水平隨即咬住唔放, 強爆，不過上證連升3天，已經去到3250阻力位，如能上破，下一站3300, 如果上證受阻而回，就會拉住港股後腿

老外近來密密掃入A股，就算上午沽貨止賺，尾市都會再入貨，可能係炒阿爺推出扶持政策救經濟撐股市, 要留意當老外大舉活出A股, 就會壓住中港股市

~~~~~~~~~~~~~~~~~~~~~~~~~~

大市急升後回一回更健康, 為何尋頂之際回一回更有利破頂呢？

因為當大市升到嘭嘭聲，就會有唔少股民擔心見頂想走貨，又話者空軍想做淡，所以大鱷就會刻意畫見頂的利淡圖表，引股民出貨，消化沽壓，趕走擋路蟹，震牛引熊，引淡友沽空，當時辰一到，就抽升挾淡，收復跌幅並升突，逼淡友回補空倉，就可推動大市破頂而上

6/6 周一恆指收21654, 升571點

今日轉節氣芒種，預示有大變，6月開局連跌兩日後今日轉勢向上，展開尋頂之旅，上周恆指 出現罕有的531點超細波幅，預示本周會係大波幅，挑戰21800-22000水平，上證強勢突破大位3200後瞬即站穩， 成為好友推高港股的助力

上星期三四港股連跌兩天，不過當時港滙沒有急速轉弱，反映不是熱錢撤退，只係養牛熊及回調整固，消化沽壓, 上周港交所企10及20天線，今日攻上50天線，史哥以前曾經講過港交所企20天線，港股就會飛天

由2月中起港股周線只會升一個星期，未見過連升兩周，但內地股市飛天， 有超大成交配合升勢，扯住港股上山， 應跌不跌須防升，假如本周港股仍收升，連升兩周就打破了慣性走勢 ，代表好友已奪得主導權，要向22000及100天線進發， 正正配合 元帥寫的劇本，4-6月係築底市，6月好友發力上攻

2/6 周四恆指收21082, 跌212點，連跌兩天

本周好友大勝，周線收升收陽，今日港股一插即彈，雖然收跌，卻收陽燭，科指非常硬淨，低位見買盤承接，不過美元及債息止跌回升，股市沽壓會愈來愈大，本周港股雖然跟隨上證收升，不過由2月中起港股周線只會升一個星期，未見過連升兩周，是否應假設下個星期係收跌周？ 假如下周仍收升，連升兩周就打破了慣性走勢 ，代表好友已奪得主導權，要向22000進發

本周恆指只有531點超細波幅, 回吐幅度不足, 預示下周會出現大波幅，內地股市表現亮麗，有阿爺推出政策救市，愈升愈有，成為好友上攻的助力， 人民幣止跌回升 報 6.6750，收升191點子 ，港匯略為轉強， 怪不得港股大插後抝腰向上，收窄跌幅

早前估計21500-22000 只係6月上旬的阻力位，21415不會是反彈浪頂，呢兩日回吐只因由19178衝上來，累積龐大升幅，升勢過急，要歇一歇，消化沽壓再儲力上攻，今晚夜期收大高水， 按照慣性走勢下一個交易日收升機會大

~~~~~~~~~~~~~~~~~~~~~~~~~~~~~

有望上破22000

估計6月走勢會係高、低、再高，即係月初爆上，月中回吐做底，月尾再殺上去，以月波幅計，有望上破22000, 不宜太早，要等肥熊入局才有誘因攻破, 恆指的戰線由5月的20500穿梭變成21000穿梭，跟隨上證波動區間上移

3/6美國公布非農就業數據 ，的確是難關， 因為近日美股已預先大幅抽升，獲利沽壓會增加，唔少分析都看淡美股，普遍認為近來只係熊反彈，後市仍不樂觀, 港股最大問題係大鱷提款機，熱錢炒快閃，美股熊市，急升亦會急跌，大幅波動，必定會影響港股