KellyChu - 西九文化區「西油記」學生帶你「藝遊」各區地標｜Executive日記

2022/06/06 04:12:03 網誌分類: 生活

06 Jun

西九文化區Arts Pavillon呢排朝氣勃勃，一班學生應旅發局嘅邀請，透過藝術創作，表達佢哋心中嘅西九龍形象。

呢個展覽個名叫做「西油記」，係旅發局去年主辦「西九龍」地區路線遊嘅後繼活動，學生嘅作品好有誠意，絕對唔會「大話西遊」。一幅幅馬塞克砌畫，七彩繽紛，有佐敦名物繡花鞋，有M+巨牆，有美都餐廳嘅奶茶。Kelly為食，見到就吞口水。

展館上層有香港教育大學學生嘅作品，位位未來或晉身為藝術老師或從事創意嘅工作，每件作品都盡顯潛能。好似由晾衫竹組成的牆畫，望真啲，有當舖等老店招牌，構圖有如印象派嘅表達手法。一幅香港地圖上貼上泥塑浮雕塊，每塊代表一個區，大家一齊猜估，好好玩。貪靚又鍾意喺fb放閃嘅Kelly，猛咁係一件大型霓虹光管前擺post打卡，喺繽紛光影裏遊走廟街、玉器市場、官涌等地標，好靚又好玩。
Kelly Chu