木水火
木水火
木水火

醫療改革仲要拖 今屆政府搞邊科

2022/06/20 13:00:00 網誌分類: 時事
20 Jun

醫療改革仲要拖 今屆政府搞邊科 {#icons_boy4}

下屆政府新班子名單出爐,現屆政府唔少官員都冇得留低,好多市民拍掌慶賀!正常嘅,現屆政府一事無成,經濟民生仲搞到一鑊泡,港人梗係講句「好行夾唔送」啦!換屆在即,即將離任嘅官員相繼通過唔同渠道發表臨別贈言。唔知係咪特首林鄭月娥一句「前人種樹,後人乘涼」一錘定音呢,其他官員立即有樣學樣,各項牽涉民生嘅改革,唔係話經已起草,就係話完成藍圖,全部留畀下屆政府作決定;功夫茶聽到就真係「當堂嚇一跳,然後得啖笑」!任期未完㗎喎,唔通現屆官員臨尾幾日唔使出糧? {#icono0_12}

呢嗱!食衞局局長陳肇始尋日喺網誌寫道,當局已經完成咗基層醫療健康藍圖嘅框架,亦提出咗目標同建議;佢仲賣花讚花香,話藍圖闡述咗整個醫療體系方針所需進行嘅結構性改革,可以應付未來數十年嘅挑戰;其中包括探討進一步透過公私營合作,善用私營醫療資源識別同支援長期病患者,以減輕專科同醫院服務嘅壓力;又包括優化同規範醫療券嘅使用,同埋探討長遠增加基層醫療服務人手啦,加強各醫療專業啦,提供基層醫療服務培訓嘅策略等等。佢仲話當局正構建一個本港人口健康資料庫,以幫助制訂衞生政策同評估相關服務成效添! {#icono_18}

睇完整個醫療改革藍圖,好似幾宏大。之不過,呢個藍圖幾時落實,點樣落實,落實嘅時候會唔會大打折扣,呢啲先係關鍵。去到關鍵位,陳肇始梗係「不負眾望」,拋出一句「會將相關建議交由下屆政府考慮,以制訂合適嘅執行方案」,然後拍拍屁股走人!如果用一場球賽比喻,陳肇始作為一位進攻球員,講到自己扭過晒啲防守球員,好威威咁,又有乜用!臨門一腳「單刀橫傳」,美其名係助攻,實則係卸膊!喂,射唔入,場波都未叫贏㗎喎! {#icons_girl4}

查實基層醫療改革,社會各界都探討咗好多年,而陳肇始用咗足足一屆任期嘅時間,都只係完成咗一個框架,就算個框架幾靚幾完美,又點會讚得落口呢?須知道,醫療事關生死,基層現時處於水深火熱之中,好多長期病患基於各種原因,未能得到適切嘅治療或照顧;醫療券又得雞碎咁多,睇得醫生嚟都買唔起藥。另一方面,公營醫療體系長期處於崩潰邊緣,前線醫護壓力龐大,解決以上種種問題,本來就係刻不容緩,可惜港府一拖再拖! {#icono_38}

作為問責官員,既然在其位,自然要謀其事、盡其責,鞠躬盡瘁直至最後一秒啦,唔通臨走就唔使做咩,可唔可以唔出糧?坦白講,陳肇始在位咁耐,醫療健康、環境衞生、食物安全,真係無乜邊個範疇係做得出色,一場疫情更將缺失暴露於人前,搞到香港民不聊生!莫以善小而不為,距離卸任至少仲有11日,陳肇始與其花時間諗埋啲花言巧語,不如諗吓點樣造福港人,哪怕親身落區捉隻老鼠,都對香港有莫大益處啦! {#iconb_233}

功夫茶

https://orientaldaily.on.cc/content/要港要聞/odn-20220620-0620_00190_001/醫療改革仲要拖--今屆政府搞邊科

回應 (0)
我要發表
user