木水火
木水火
木水火

全民退保冇得傾 小恩小惠徒掩飾

2022/06/22 12:30:16 網誌分類: 時事
22 Jun

呢,林鄭就一味自誇任內尤其係民生議題交出不錯成績表,惟有學者批評係「失策」,政府嘅社福服務資源嚴重不足。講到尾,政府明明財政許可,庫房從來水頭足,卻死都唔肯推動全民退休保障,保障長者福利政策嘅穩健性,唔使啲老人家周街執紙皮咁淒涼,咁先可以話功德無量,造福全民!依家一丁點小恩小惠卻無限放大如何交出亮麗成績表,睇真係裝假狗,瘀到嘔吖! {#iconb_233}

全民退保冇得傾 小恩小惠徒掩飾

一畦春韭綠,十里稻花香;盛世無飢餒,何須耕織忙。各位,依家無論從邊個角度睇,活在香港,基層都睇唔到係「盛世」嘅影子啩?唉,逾兩年疫慌,政府無能,害慘全民,庸官抗疫張弛無度,以致第5波疫情至今持續難下,通關無望,經濟蕭條,百業凋敝,一街係吉舖,十里塵灰揚,依然大把基層失業,求政府打救! {#iconb_271}

嗱!社署日前宣布,今年9月1日將落實合併普通長者生活津貼及高額長者生活津貼。現時普通津貼及高額津貼分別為每月2,920元及3,915元。目前約5萬名正領取普通津貼嘅長者,喺合併實施後每月額外獲發995元。正領取普通長者生活津貼嘅合資格人士,喺合併措施實行前毋須再次申請。至於資產上限方面,經合併後,資產不多於37.4萬元嘅單身長者和56.8萬元嘅長者夫婦,劃一領取每月3,915元。 {#icono_57}

各位!政府今趟口大唔似累街坊喎!有嗰句,講嗰句,冇嗰句,由得佢!嘻!今次點都係「提升」弱勢社群收入,畀多成千銀佢哋花費噃,又可以為「振經濟」齊鼓掌喇!之不過,社區組織協會幹事尋日喺電台節目就話喇,贊成增加長者支援,但認為政策喺上年10月嘅施政報告已經提出,要拖到今年9月先落實係太遲! {#icono_39}

咁又難怪,飽漢又點知餓漢飢吖!遲一個月就係一個月,對捉襟見肘嘅長者,多成千蚊收入,也許可以喺月尾作為燃眉之急,買多幾罐午餐肉、幾包公仔麵之類!政府如果係有良心,應該好似公務員加薪咁追溯至4月,咁就公平啲!依家仲要拖到9月,政府對弱勢族群尤其是老人家,擺明係「茶瓜送飯,好人有限」! {#icono_38}

再講啊!依家百物騰貴,社區組織協會幹事認為應提高受助長者嘅資產限額,畀多啲長者受惠,包括將現時單身上限37.4萬元,升至50萬元;而夫婦由現時56.8萬元,升至100萬元。阿哥,以前100萬好巴閉,「百萬導演」都可以敲鑼打鼓作宣傳,依家100萬揸手,如果一年半載冇收入,面對衣食住行樣樣貴,都真係好似棺材拐杖,死頂㗎咋!而且都唔頂得幾耐!呢嗱!啲高官一個月人工都三、四十萬,而受助長者嘅資產只可以有幾十萬,講真,真係有乜急事要用錢,譬如急病等唔切公立醫院排期,去睇私院普通手術幾十萬閒過立秋,你話將受助資產升至100萬算多咩?  {#icono0_9}

呢,林鄭就一味自誇任內尤其係民生議題交出不錯成績表,惟有學者批評係「失策」,政府嘅社福服務資源嚴重不足。講到尾,政府明明財政許可,庫房從來水頭足,卻死都唔肯推動全民退休保障,保障長者福利政策嘅穩健性,唔使啲老人家周街執紙皮咁淒涼,咁先可以話功德無量,造福全民!依家一丁點小恩小惠卻無限放大如何交出亮麗成績表,睇真係裝假狗,瘀到嘔吖!

功夫茶

https://orientaldaily.on.cc/content/要港要聞/odn-20220622-0622_00190_001/全民退保冇得傾--小恩小惠徒掩飾

回應 (0)
我要發表
user