木水火
木水火
木水火

無能政府講唔聽 可憐租戶心驚驚

2022/06/27 12:30:16 網誌分類: 時事
27 Jun

無能政府講唔聽 可憐租戶心驚驚 {#iconb_617}

現屆政府任期走到尾聲,好消息係有啲廢官冇得留低,市民終於唔使篤眼篤鼻;壞消息係呢啲廢官遺下一大堆爛攤子,繼續禍害港人。呢!就好似現屆政府積極推動嘅劏房租管條例咁,縱然已於今年初生效,但由於港府一直漠視劏房戶訴求,卒之搞到呢條條例「管啲唔管啲」;其中最關鍵嘅起始租金就完全冇規管,大大條法律罅留畀業主任意穿梭。生效咗僅僅半年,坊間已經不停出現要求檢討嘅聲音,試問有咩法例可以廢到咁? {#icons_girl7}

嗱!近日有民間組織展開調查後發現,喺條例推行初期,已有一成業主抬高租金水平;其中唔少業主喺同新租客簽約嗰陣,因為知道將來嘅加租幅度會被規管,專登大幅提高單位租金,以便「彌補」日後受條例規管下減少嘅租金收益。面對上述情況,逾半受訪者求助無門,原因除咗有啲租戶對條例一知半解,根本唔知可以點投訴之外,仲有唔少租戶係敢怒不敢言,為咗安定平穩嘅生活,明知業主涉嫌違法,都寧願「硬食」,唔打算投訴!結果就係,租戶嘅租金佔入息比例比起條例生效前更高;簡單啲講,租戶未受其惠,先受其害! {#icono_30}

呢個世界最恐怖嘅,莫過於「好心做壞事」!假如話有心「謀害」,受害人或多或少都會感受到惡意,從而有所提防;但假如對方毫無惡意,受害人往往防不勝防。偏偏今屆政府最叻就係好心做壞事,呢條劏房租管條例咪又一實證囉,表面上想幫租戶,啲廢官由頭到尾都堅信自己係正確,坊間一早有質疑聲音,功夫茶都提點咗好幾次,殊不知港府牛皮燈籠咁,點極唔明,租戶梗係「領晒嘢」,咪畀人劏到成頸血! {#iconb_254}

米已成炊,唱多次「想回到過去」都於事無補,惟有期待港府識得亡羊補牢!民間組織今次照樣提出建議,包括建議港府參照差餉物業估價署對個別單位估值租金水平,規定業主分間單位出租後,年租金收入唔可以高於差餉物業估價署租值120%;又建議當局設立恒常檢討機制,每兩年進行檢討。呢啲建議查實都幾貼地,之不過港府聽唔聽又係另一回事,好在唔快樂嘅時間都過得快,今屆政府係時候講拜拜!下屆政府若肯引以為鑑,聆聽民間聲音,立即開始檢討,租戶尚有一線生機! {#icons_cat3}

之不過,租戶現時面臨嘅困境,又點止起始租金冇規管!日前獲立法會三讀通過租金扣稅條例草案,都出現咗唔少漏洞,搞到租戶未能受惠!坊間流傳,有啲業主為咗逃避租約印花稅同物業稅,訂立租約時根本無打釐印,結果租戶根本無辦法享受租金扣稅;仲流傳有啲業主揚言,租戶申報租金扣稅,就會被加租,租戶自然不敢造次,畢竟人在屋簷下,哪有不低頭!去到呢啲時候,港府係咪應該主動出擊,保障租戶嘅權益呢? {#icono0_12}

功夫茶

https://orientaldaily.on.cc/content/要聞港聞/odn-20220627-0627_00190_001/無能政府講唔聽--可憐租戶心驚驚

回應 (0)
我要發表
user