木水火
木水火
木水火

西九超支兼延期 皆因港府亂管理

2022/06/28 13:00:00 網誌分類: 時事
28 Jun

西九超支兼延期 皆因港府亂管理  {#icono0_12}

相傳喺「三皇五帝」時候,中華大地連年遭遇洪災,帝舜命令鯀治水,但鯀治水9年無功,於是帝舜又改派鯀嘅兒子禹繼續治水;禹上任後改用疏導法,歷13年治理終取得成功,獲後人尊稱「大禹」,呢個亦係「大禹治水」嘅典故由來。所謂以史為鑑,喺呢個典故中可以睇到,展開龐大工程嘅時候,管理者嘅作用非常重要,一旦管理者失職,及時撤換方可解決問題,拯救黎民百姓於水深火熱之中。今時今日嘅香港,都有多項斥資巨大嘅工程,其中西九文化區一再延期超支,試問當局係咪應該考慮撤換西九嘅管理層呢? {#icono_38}

立法會工務小組委員會尋日就召開會議,討論西九文化區基礎建設工程項目,包括南面登岸設施嘅細節。不過喺會上,唔少議員對於西九文化區屢次超支延期感到不滿,有議員質疑西九管理局係咪有能力承擔登岸設施同渠務工程,又有議員認為選址需要改建現有海堤,會產生額外費用。並唔係議員杞人憂天,而係西九管理局太多前科,問得詳細啲自然係好。之不過,土木工程拓展署解釋,話西九文化區佔地龐大,若由唔同承建商參與建造,可能導致造價上升,又話管理局作為最大持份者,由當局自行承擔相關工程係最合適不過! {#icono_9}

官員嘅答法不出所料,係相當官腔!倒番轉嚟問,家陣唔畀其他承建商參與建造,當局係咪可以確保造價一定唔上升先?假如無法作出承諾,咁係咪應該考慮更具效率嘅方法呢?西九管理局係就係最大持份者,但咁多年嚟,多次延期超支,局方有冇話承擔責任?係咪就算再延期,都係局方自己諗方法解決,唔使再追加撥款? {#iconb_233}

查實自從首屆政府提出「西九文化區」嘅呢項構思之後,久唔久都會有啲消息進入輿論視野,不過大部分都係壞消息,一時話呢項工程要延期,一時又話嗰項工程超支;喺2008年嘅時候,港府向立法會申請撥款216億元,去推動發展西九文化區,經已被批評係天文數字,諷刺為「世紀大白象工程」;殊不知呢個原來報細數,拎嚟氹港人落疊!隨住時間推移,西九文化區都未起完,整體成本已經超支一倍有多,爛尾又驚成為世人笑話,結果港府被迫充「大頭鬼」,一再追加撥款,將大量公帑掉入呢個無底深潭當中,莫講話回本,直頭想止蝕都做唔到! {#icono_49}

假如呢啲事發生喺古代,發生喺明君統治嘅時代,相關官員老早被人撤換,隨時問斬添啦!家陣香港好文明,無死刑嘅,但撤換查實係在所難免喎!講番轉頭,呢個西九文化區起完之後,究竟有幾大用途呢?查實係咪需要用到咁大幅地呢?假如話係「罪在當時功在後世」,畢竟可以造福下一代港人,市民大概都無咁嬲,否則只會被後人標上「好大喜功」4個大字,呢啲要交畀後人去評價啦! {#iconb_621}

功夫茶

https://orientaldaily.on.cc/content/要聞港聞/odn-20220628-0628_00190_001/西九超支兼延期--皆因港府亂管理

回應 (0)
我要發表
user