木水火
木水火
木水火

壟斷攤檔現不公 競投機制穿晒窿

2022/08/09 12:00:01 網誌分類: 時事
09 Aug

壟斷攤檔現不公 競投機制穿晒窿  {#iconb_234}

公平嘅營商環境,有利於促進經濟發展;吓吓玩壟斷、搞黑幕、使橫手,邊度仲有人願意投資呢?好多人以為只要有競投機制,價高者得就肯定公平啦!並唔係㗎,假如機制唔完美、漏洞處處,一樣會有人鑽法律罅,做埋啲偷雞摸狗嘅事,唔單止對其他商戶唔公平,甚至會影響政府庫房收入添! {#icono_35}

嗱,功夫茶今日講緊嘅係街市空置檔位競投。有監察公營街市發展嘅組織,去年視察街市空置檔位競投嘅時候,發現現行嘅競投機制好多漏洞,包括未有阻止現有承租人參加第一輪競投,又容許同一競投人喺中標之後棄標,之後再重複參與同一檔位競投,甚至懷疑有人利用防疫措施下,場地人數受限嘅漏洞使橫手,出錢聘請「排隊黨」,壟斷入場競投嘅名額等等。有關組織唔係齋講,仲有兩宗實例添,分別發生喺去年10月同埋12月,之後仲聯同兩名投訴人,喺今年初向申訴專員公署提出申訴,最終梗係申訴成功啦。

查實食環署一早白紙黑字規定,現有承租人係唔可以參與第一輪競投;不過從上述實例中,唔難發現食環署原來係齋噏,根本冇監察,居然喺現有承租人競投成功,準備簽約嗰陣先發現有問題,結果要流標重拍,畀另一人趁機以底價投得檔位;唔難推斷,嗰兩條友有可能一早就夾計,擊退其他對手之後,再冷手執個熱煎堆!至於當局容許「棄標再投」嘅情況,呢樣嘢仲好笑;有啲常識都知,棄標相當於失信,就算係一般拍賣嘅場合,棄標隨時會留下不良紀錄,甚至會被沒收保證金,又點會出現「棄標再投」呢? {#icono_38}

至於話有競投者出錢聘請「排隊黨」,壟斷入場競投嘅名額,嚴重啲講已經涉嫌「圍標」啦,係犯罪行為嚟;雖則話呢啲唔係咩大項目,但食環署又點可以置之不理呢?申訴專員認為申訴成立之後,咪立即敦促食環署改善囉;殊不知食環署回覆話冇發現當日有人派錢買籌,又強調就算已推出改善措施,都唔代表之前有不妥之處。呢個答法又係相當有趣,咁如果之前嘅機制並無不妥,沿用咪得,點解要改善呢?明眼人都睇得出,唔係機制冇問題,而係有人「死雞撐飯蓋」啫,有錯就認啦! {#iconb_233}

對於食環署話冇發現當日有人派錢買籌,功夫茶就半信半疑嘅!半信係因為,現時大街小巷都有老鼠橫行,食環署都睇唔到,死撐本港環境衞生好好,足見當局係盲嘅;咁盲嘅人,又點會發現有人派錢買籌呢?至於半疑喎,都唔能夠排除有內鬼,故意視若無睹㗎喎!畢竟都有人舉報,當局應該大為緊張先啱,依家卻一副大事化小嘅態度,唔通有人「身有屎」,心虛唔想搞大件事?現時無證無據,功夫茶唔作過多猜測啦,相信心水清嘅看官們,或多或少都睇到啲端倪啦! {#icons_cat7}

功夫茶

https://orientaldaily.on.cc/content/要聞港聞/odn-20220809-0809_00190_001/壟斷攤檔現不公--競投機制穿晒窿

回應 (0)
我要發表
user