鄧達智 - 泰問候｜講是非
2022/08/25 04:12:43 網誌分類: 生活
周生面書發文：「謝謝各位關心 曼谷很安全 我也平安，放心 只是新聞標題頗誤導」
不少問候，Comments隨後。自己當時正準備離開曼谷，奇怪；乜事？放了短短兩個禮拜假，正享受曼谷Every Single Bit；點解變身一片腦空白沒事人？香港曼谷兩邊到底發生了甚麼狀況？隨口問問：我都係曼谷，點解冇人問候我嘅？立即引來不少「問候」。李老師，你好想俾人問候咩？
猩猩——肉不夠嫩，器官不夠新鮮囉！（意謂：你就想俾人「問候」，講肉身條件㗎）。以為周生發生咗乜事，問候過佢，不得要領，算吧啦！
回到香港，正享受出門時規例「隔離」七天，歸來改為三天「恩惠」；說時遲，那時快，幾位熟稔媒體朋友迅速聯絡上：泰國通胡惠沖都話泰國現時十分危險，佢自己都好驚，勸香港人千祈咪去泰國⋯⋯閣下剛自泰京歸來，感覺係咪咁恐怖？
喂！喂！喂！到底乜嘢事咁危險、恐怖啫？鄧生，唔係嘛，閣下剛剛泰國返香港，你唔知東南亞發生咗乜嘢事？隨後，滿耳，接收一大串：販賣人口、監生切割器官變賣、當街老笠拉遊客上車、小鮮肉嘅不分男女販賣成性奴（唔怪得猩猩話我條件唔符合，未夠資格俾人「問候」）、蛇頭串通泰國、緬甸、柬埔寨、甚至馬來西亞跟台灣嘅警察齊齊做大茶飯⋯⋯總之擄劫、敗賣人口，搶劫生劏器官變賣！
嘩，好大陣仗呀！胡惠沖今次真係大鑊，記者話佢條勸人唔好去泰國嘅片一上架，賺到超額View數，同時俾泰國旅遊局及泰國人強插「問候」到血流成河；兩年半疫情沒完沒了，為經濟，重建旅遊業，泰國政府冒險自六月一日取消防疫措施，西方遊客陸續湧現，剛好碰上港府更改隔離政策，由酒店七天改為三天酒店四天在家隔離，不少港客㷫㷫烚烚摩拳擦掌正準備或已出發南下舒筋活絡；阿沖苦口婆心勸世人唔好去泰國；簡直打爛泰國旅遊部門如意算盤？死無葬身之地，陰功！
誰是世上販賣人口大國？哪個城市最多未成年男妓女娼？哪個城市最多光天化日搶劫偷竊？港人總算見過世面，旅遊地圖廣泛；不屬閉塞鄉下佬，就算在下這個如假包換鄉下仔，都不會相信以訛傳訛；客觀分析事情，明哲保身，便宜莫貪，出門諸事小心，緊記！
鄧達智
回應 (0)
我要發表