曾智華 - 擺酒前,先「坐監」|祿祿無窮
2022/09/20 04:12:43 網誌分類: 生活
不過,你知我知,近日疫情又升温,每日幾千至上萬(唔報可能更多!)中招。飲宴,做客的,較易搞。假若中招,禮到人不到即掂,唔會影響成個宴會搞唔成。就算做伴郎伴娘,兄弟姊妹的,一樣可以失場,婚宴照去。不過,假若新郎新娘老爺奶奶外父外母……幾位主人家中招又如何,點搞?
剛剛周日下午又有宴會(幾好,搞中午,十二點開波三點半走得,重可食埋甜品,不似搞夜晚,十點半開始雞飛狗走)。敬酒時,做外父的老友W走埋嚟細細聲:「碌Sir,如今搞次婚宴,真係一額汗,沒齒難忘!」
W哥講的,並非訂酒店、請親友、安排酒席內容等等繁瑣事情,而是……「為令婚宴能順利舉行,我哋男女兩家人,全部要閉環半個月,自困家中,完全唔同外界接觸,以保證冇機會感染病毒!即係,未擺酒就先齊齊坐兩個星期防疫監,你話慘唔慘?」
咦,真係未聽過喎,但又好似幾有道理。咦,咁搞法,擺次酒咪重慘過自己中招,要隔離七日?
曾智華
回應 (0)
我要發表