曾智華 - 余香凝闖金馬獎｜祿祿無窮
2022/10/03 04:12:54 網誌分類: 生活
豪言後，小小滴汗。因fb一共有近十萬追蹤者，若一成人睇完噓，嗌回水，咁我咪……死得，要嘔幾十萬出嚟填氹？
不過，嘻嘻，雖然網上咁多百彈haters，竟然冇一個叫我回水，連扮吓嘢都冇！
小弟推介此片時，票房約三四百萬。如今，已達千萬，真係飲得杯落。於是，決定真係飲杯，宴請監製鄺珮詩、導演黃浩然及製片馮惠思到戲曲中心「滿樂中菜」擦大餐，順便聽吓拍攝花絮。
討論的中心人物，當然為女主角余香凝，戲中扮演「咩姐」，可愛到不得了，人見人愛車見車載！
原來，拍此片時，佢已懷孕。整個戲組為遷就佢在未見肚前煞清全部戲份，趕到裙拉褲甩，終於搞掂。
小弟有一疑問，是「咩姐」咁清純，但戲裏爆過幾句粗口。究竟係真人演繹定導演或劇本要求？
「我加落去叫佢講嘅！」黃浩然直指，然後，解釋一輪現今香港的講粗口現象。事實，如今的港女，不少就是如此，早變順口溜而冇淫意。
飯後翌日，咦，新聞報道，余香凝提名金馬獎。不過，明明係女主角，點解變為最佳女配角呢？
曾智華
回應 (0)
我要發表