曾智華 - 吳剛師傅上身挽救樓市能吸引人才﹖｜祿祿無窮
2022/10/05 04:12:42 網誌分類: 生活
有品的人，講人時，會堅持公正公平原則，盡量把個人喜好及偏見壓低。
幸而，大部份人有個公道心，兼且，物以類聚，有品與冇品者，好少溝埋一齊。
最近一個飯局，小弟與其他老友，又「講人」。目標當然是有頭有面、有權有勢的公眾人物，又或富豪，又或高官及政客，因佢哋對香港有非一般的影響力，尤其擁有公權而收納稅人薪酬的，更應該日日俾市民「說三道四」。
當晚在座者，皆線路縱橫，兼有一定資歷及閱歷，故批評任何人時，必有一定真確性及份量。開波！當然講新政府班子表現。明顯地，全部評價遠比上一屆好，尤其講及最高領導的一位，即係特首！林鄭，眾所皆知，真係好少人頂得佢順。
好嘞，再落去又如何？講吓講吓，講到冇得坐直通車過渡的個別局長或秘書長。
最好笑，突然間有位創意無窮者，形容某前高官為「吳剛師傅」。
「佢呀，正牌吳剛師傅，日日上晒身！」
一眾唔知佢噏乜東東，只得擘大眼等開估。
「哈哈，吳剛師傅，畀人最深印象係乜？正是廿多年前，次次《歡樂滿東華》皆有佢份表演。凡出場就通身搽滿油，閃閃生光，睇就正，但你想捉住佢就難。吳剛師傅，即卸膊/跣膊之星呀！」
曾智華
回應 (0)
我要發表