曾智華
曾智華
曾智華

曾智華 - 預先警告—掃硬!|祿祿無窮

2022/11/17 03:12:49 網誌分類: 生活
17 Nov
        四年一度全球盛事世界盃,十一月二十日在卡塔爾開打,各媒介鋪天蓋地宣傳。

點解「鋪天蓋地」?無他,因此乃一個各方牟利大水塘,天文數字的財富效應出現,各方怎不瞓身齊齊谷?一於谷到全民參與——賭!

警方上周高調開記者會,大力作出反非法賭博宣傳。並度出一句——網上外圍波,陷阱誘惑多!其實,俾我設計,就會改一隻字,將「誘惑」變為「蠱惑」。

事實,合法非法賭博皆存在極大「誘惑」。但非法呢,毫無保障,所以,外圍莊家可以隨時出「蠱惑」。故此,賭仔為合法,為安全,理應冇咁蠢貪少少回扣,博坐監走去賭外圍嘅。

警方大力宣傳,與馬會攜手打擊外圍賭波,點解?因涉及龐大馬會收益,稅款及善款也。

馬會開賭波盤,利潤遠遠高過搞賽馬。無他,賽馬要自己搞,又Run馬場,養百計騎師練馬師及各種工作人員,營運費用,高到非常得人驚。

但波呢,嚴格上是「順風車」(free ride),人哋搞晒,馬會只攞佢來開賭收投注矣,乾手淨腳唔使天價成本,你話幾着數?

嗱嗱嗱,咪話唔事先警告,周日一開世界盃, 警方必定高調做嘢,搞一兩場「拉人大龍鳳」,招待埋記者去直播,英明神武破獲外圍波騷。

拉外圍波,一如拉外圍馬,要做,其實容乜易?因N咁多人賭外圍,莊家喺邊,根本不是秘密。再加內幕線報提供,要作出拘捕,真係手到拿來,極易上門拉人,交足功課。

上屆世界盃拉咗二百四十二人。今屆?冇理由唔破紀錄嘅,大家一齊睇睇「英勇幹探智擒外圍佬」啦。起碼有幾單億億聲人贓並獲,咁才似樣!
曾智華
  
回應 (0)
我要發表
user

網誌分類