12月中恆指19500好淡角力

港股連跌兩天，反彈在望

20/12 周二恆指收19094, 大跌258點

日本變相加息，日圓急升，震動金融市場，今日恆指最多跌468點低見18885，重倉肥牛陣亡，好友守住支持區18600-18800, 加上美股四連跌隨時反彈，淡友收斂攻勢，港股收窄跌幅，恆指重上19000

港匯雖然反映有熱錢流走，但好友卻有 一月初通關憧憬做後盾，只要周五收19000之上，12月港股收升機會大增，以去年來說，12月中震完就會再上攻

港股已連跌兩天, 今個月最長兩連跌, 希望明日好友出下力推番大市上山, 19300上面有昨日剛出世貼價bb小熊，下面有肥牛

按照慣性走勢，在跌浪當中，當貼價bb熊出世，大市就會反彈， 加上恆指由高位已回吐千點，亦有條件作出反彈，好友等緊中美股市止跌回升做助力

唔少基金經理及大鱷都提早放聖誕及新年假期，導致港股升跌都成交萎縮，細成交之下，大鱷就更容易舞高弄低，好淡通殺

港股受制於10天線, 熊死牛命危

19/12 周一恆指收19352, 跌98點

年尾企業水緊抽水潮特別係內房嚇窒投資者，沽盤湧現，今日港股跌幅不大只係假象，其實下跌股份非常多，唔少股份都急挫， 有臨危托沽味，明日19000危, 如果12月由好友睇場，就不會跌穿近日低位18799

港股指數跌幅不大，但下跌股份高達1212隻，升股只得507隻，今日竟然同上周四恆指大插304點時的升跌股份比例一樣，十分吊詭, 現時最擔心係港股累積沽空愈來愈多，唔知幾時會爆插

上星期恆指兩次都係跌一天即彈, 如明日港股收跌，代表淡友已奪回主導權 ，如競價大幅低開，又或者QQ跌穿$316.8, 就係淡友出手信號

內地股市跌到走樣，上證一度失守3100 ，但大鱷今早竟然夾硬踢高恆指上19786 秒殺小熊，空軍於高位加沽，特別針對科企，明日死得

今日港股又扮跌唔落，好友牛牛紛紛入局，18900-19300有肥牛，要買定官才，今日屠熊，明日殺牛，好淡通殺

Vhsi 恆指恐慌指數連日下跌後回升，驚驚！上周恆指炒細波幅729點，未做夠數，預示本周會走大波幅， 近日一再提醒大家港股有暗湧，匯市唔對路，19000未必守得住，如果短炒於過去幾日冇跟大鱷大媽走貨 就執輸喇！

港股受制於10天線, 19500穿梭, 好淡通殺

16/12 周五恆指收19450, 倒升82點

今日大鱷玩上攻下殺，高低位19130-19621, 牛熊齊齊陣亡, 向下支持19000-19200, 如失守, 就要下試近日低位18799, 不過今日低見19130即彈, 反映好友仍未放手

港股底頂下移，雖然失守10天線， 不過大鱷仍力守19400大位，今日港股低開高收, 單日轉向, 牛熊都非常貼價，19200牛：19600熊

美元反彈， 英磅歐元 齊齊下跌，人民幣連跌兩日，今日收跌26點子，報6.9716, 加上美股走弱，中港股市承壓,

美股受經濟衰退 陰霾困擾，美股跌跌不休，美國國債孳息率上升，匯債形勢有變，呢兩日多隻權重股都見短炒莊家出貨，幸好控盤大莊家仍坐定定, 指標股走勢雖然轉弱，但大鱷卻力托派貨

利好政策浪接浪卻成為大鱷趁好消息出貨的藉口，普遍分析師都認為12月係好倉底, 低位買意強, 所以港股往往係急跌急彈, 今個星期恆指兩次都係跌一天即彈, 如後市打破慣性走勢出現連跌，就係唔對路，19000就危

按照慣性走勢大市本周應收跌收陰燭，內房配股抽水潮，以及QQ比亞迪大股東減持，中港疫情惡化，拖低大市

散戶趁反彈跟大鱷大媽減磅可避險，連QQ大股東Naspers亦於周二(13/12）以每股平均價320.028元減持，套現近3.18億元

~~~~~~~~~~~~~~~~

恆指月波幅/季波幅

以恆指季波幅來看，今年第四季（10-12月）做了5329點已超標，即係就算12月下旬夾硬破頂推上20000也走不遠, 基金經理估計今次技術性牛市, 中線看頂部在20500-21000之間, 可能明年第一季見

問題係今個月上旬恆指高低位18530～19926月波幅只得1396點未達標，即係要爆邊, 破頂或穿底, 一係12月炒細波幅, 明年1月才大龍鳳

12月基金經理可能提早粉飾櫥窗埋年結, 放聖誕及新年假期, 近來港股成交縮減又似似地, 今日成交略增係因為富時指數更換成份股

有分析師說根據過去多年的統計，12月下旬港股偏弱，我冇去睇多年數據來印證，我只係睇咗去年(2021年), 的確如分析師所說12月下旬偏弱

2021年12月, 恆指係月中創高位後回落, 今年都係一樣

2021年12月, 恆指係12月下旬創月內新低, 如果今年照跟, 下周港股就危，不過當時急挫後抝腰向上，可能係年結因素

不過假如12月係好倉底, 12月下旬就會升穿月初高位19926，相反，如果12月收跌，後市就要下破18530, 睇盤路12月似係收升月, 回吐見底後就會急升, 就好似去年12月下旬

~~~~~~~~~~~~~~~~

港股衝頂打回頭續尋底

恆指由14597彈上18000時 人人以為到頂做淡本來冇錯， 但當上破18200並企穩18500關鍵位都唔走鬼就蝕章， 因為突破並企穩關鍵大位上多千多點係冇乜難度

18500 + 1000 = 19500

一如日前所說，只要淡友捱得過爆上 19800都唔死得，淡友就有運行，因為按照慣性走勢，衝頂打回頭就要再試底, 下試近日低位18799, 史哥估計會見189XX, 我估唔止, 仲會再低

近日港股走勢似係扮跌唔落，令人人上望20000, 引好友入局，部署失驚無神大插殺牛

一如下面所分析, 9/12去到 20000附近見港股動力不繼, 近日見大鱷明顯派貨手影, 過去一周港股扮跌唔落除了可能係臨危托沽之外，亦有可能係空軍推上去加沽，周五（16/12）的沽空比率是4日以來最高, 早晚會大插

港股暗湧

恆指由低位14597反彈至20000關口，大鱷已納入通關的利好因素，低位早已入貨，近日係好消息托沽出貨

基金經理為了年尾花紅 都唔想港股大插，只係略為減倉鎖定利潤， 佢哋對港股後市仍然樂觀，這才是最令我擔心的地方，因為當匯市有變，熱錢突然大舉撤退，港股就會急挫，到時基金經理就會爭相沽貨，令跌勢加劇

每5000點都係超級大位，無論跌穿15000抑或升穿20000都會掉頭

10月插穿15000低見14597, 隨即抝腰急升，按此推算，就算大鱷夾硬踢上20000甚至20500, 都會碌番落山，目前睇匯市形勢短線唔似上20000.20500, 其實恆指現貨於9/12高見19926後, 13/12夜期曾上破20000大關高見20168, 當晚唔少好友都食胡鬆人

我認同試兄所說，美股熊會拖累港股，其實明年亦可能會有灰犀牛隊低股市，到時港股就會做第二隻腳

結論: 

唔理依家港股係牛定熊，短炒上落可以，但19000-19500才建中長線倉風險大, 現水平才入貨就係高追，要有心理準備恆指可能會插穿19000見18800，因為呢個區間牛牛愈來愈多

港股失守10天線，繼續尋底屠牛之旅

15/12 周四恆指收19368, 大跌304點

今日恆指創本周新低19233， 由於周波幅未達標，明日一定要跌穿19233破底來擴大周波幅， 要看急跌後會否急彈， 因為今日收 19368, 非常接近19400大位及10天線不遠，反映好友仍未放手

信恆指周波幅較可靠， 上星期五收市總結已預告本周19200～19800要爆邊，結果本周三高見19859, 向上爆完邊，之後就輪到向下爆邊，牛熊都要死，如能守住19000-19200, 好友就會再上攻, 不過如仍受制於200天線(約在19700)及前頂19926, 下周就未必守得住19000

~~~~~~~~~~~~~~~~~~

中港美三地股市尋底

中港美三地股市多數係同步見底頂, 就算不是同一天, 亦會係接近的日子

道指1/12高見34595後回落, 月中再上, 13/12破頂高見34712後掉頭向下，美股目前正在尋底

同樣地，恆指1/12高見19237後回落, 低見18530後再上, 9/12破頂高見19926後掉頭向下, 就係跟住中美股市走

上證7/12高見3226後回落, 反覆向下尋底

港股跟美股上山, 卻被上證拉住後腿掉頭回落, 今日港股與上證同步創本周低位, 老美議息揭盅放鷹, 淡友借勢反擊

12月初尋頂應做好買上, 月中調整利淡, 直至出現見底訊號就再買上

港股連升兩天高處不勝寒， 回吐壓力大增

14/12 周二恆指收19673, 升77點

恆指仍受制於200天線及19800-20000大關，今日港股表面上收升，但其實唔少近日爆升的股份都逆市急跌， 技術指標亦不配合港股升勢， 港股已確認見短頂，要回調整固，消化沽壓方能再上攻

大鱷托住QQ阿里等幾權重股來派貨， 港股溫度計港交所於$350 打回頭具啟示作用， 按照慣性走勢，今個星期 港股及上證周線都會收跌，估計淡友明日會出手

近來大鱷一直托住19400樓上收市，小心當大鱷食飽熊熊以及養肥牛牛就會縮手唔再托

最吊詭的是，今日恆指收19673, 建行收$4.68，而2/12恆指收18675時，建行收$4.66, 恆指升了千點，但建行卻是原地踏步

日前19100-19500出世的 BB牛未死哂，今日19400-19600新牛出世，有生命危險，通常恆指升2-3天就會跌，明日高危，QQ今日收$325, 上周QQ於$325樓上只係企一日就碌番落山，QQ想擴大周波幅 $315.4 - 327.8 就要爆邊，如港股要插，QQ就要領軍

～～～～～～～～

小心明日淡友借 聯儲局議息後 反擊，隊穿周一（12/12）低位19366, 一如昨日所說，由上周五高位19926跌至昨日低位19382，只係回吐不足600點未達標是後患，因為通常要回調800-1000點，即係理應下試19000-19200

近日大鱷愛上攻下殺，牛熊都要死，今日踢上19859屠BB熊任務完成，輪到下殺BB牛，恆指由大底14597反彈至19926, 升幅逾5300點，19500樓上獲利沽壓大增，想企穩殊不容易

12月上旬港股爆升，亦符合元帥預測好友大鱷想於聯儲局議息以及世界盃決賽前踢高食胡

上證於7/12高見3226後一直無法破頂，當天恆指高見19737, 其後恆指於9/12夾硬破頂踢上19926, 但當時上證卻是頂部下移，拉住港股後腿， 內銀內險H股已乏力再進，中港股市通常係同步見底頂，上證早已見頂回落，港股亦走不遠

今晚聯儲局議息結果，廢老鮑爺講話, 明日內地公佈經濟數據以及召開中央經濟工作會議, 大龍鳳來了， 港股累積龐大沽空盤，壓力始終要釋放

13/12 周二恆指收19596, 升132點

今日港股衝高回落，收窄升幅，恆指最多升 244點，收市僅升132點， 大鱷壓住大市可能係畀19700熊仔出世

恆指由高位19926跌至昨日低位19366,回吐不足600點就反彈略嫌太少隱憂，雖然技術指標不配合升勢，但超買情況已舒緩，好友又再出手

市場氣氛熾熱，繼續熱炒通關，大鱷就乘機挾淡， 唔少股份升幅大過指數，但內房配股潮嚇窒股民，內房逆市下跌

目前牛熊都非常貼價， 只要升穿本周一高位19718就可擴大周波幅及屠熊，如果仍受制於 19800～20000，就要跌穿本周一低位19366

明晚聯儲局議息以及 鮑爺講話，周四除了要反映美國加息外，內地亦公佈經濟數據以及召開中央經濟工作會議， 係大龍鳳的一天

股神畢菲特旗下巴郡，在12月8日以平均每股201.3432港元減持比亞迪，套現2.677億港元

港股回調整固、消化沽壓

12/12 周一恆指收19463, 大跌437點

今日恆指低見19366殺牛，收19463, 自從5/12重上19000以來，恆指無論點震盪，都能收19400之上，只有一天（7/12）例外，但翌日（8/12）即刻收復失地急彈上19400 水平收，反映12月係好倉底, 19400係好友收市防守大位, 只要收市守得住, 就會再上攻

按照收升月的慣性走勢，12月下旬會有新高， 所以高位減咗磅又或者貨少的話，趁回吐就要入貨， 估計短炒好友會於聯儲局議息前 推高大市食胡

港股10天線正不斷上移，目前已上到19200水平， 如果好友想守住呢個大位， 急跌後亦要急彈，近來港股每次急跌都係短炒莊家沽貨食胡，但主力控盤莊家仍坐定定等食大茶飯

今日港股調整正好消化超買的壓力，近來港股走勢係急升、超買、回吐、急升……，周而復始， 如反彈卻未能破頂，就會跌穿短底，好友等緊突發利好消息或上證重上3200才爆上20000水平, 牛市或資金市特徵係壞消息快速消化，而每當有好消息大市就會爆升

中港不斷放寬防疫措施，市場氣氛仍佳，股民入市意欲增加，一回吐就見買盤追入，大鱷想派貨亦唔想港股深潛

港股連升兩日大舉屠熊, 進入關鍵阻力區

9/12 周五恆指收19900, 大升450點

港股高處不勝寒、 獲利沽壓大增、不進則退

港股今日進一步急升, 推高為了屠熊挾淡外, 亦可能係為了畀下面 19100-19500 的BB牛出世

發行商出衍生產品最少要3天, 昨日恆指收19450, 恆指今日急升上19926, 19100-19500牛仔才可以順利誕生, 如果今日港股碌落山, BB牛就要胎死腹中, 發行商就白忙一場了，所以今日要先推升屠熊，然後部署下周殺初生BB牛

今日恆指雖然收19900, 但指標股QQ阿里等一眾科企已升抵阻力大位，市場對 19500及200天線 仍有戒心，沽壓增加, 好難企得穩, 要再下試其支持力, 如失守，下一站19000-19200，如果12月由好友睇場，就不會跌穿近日低位18799

200天線大位在19750附近，向上阻力在 19800-20000, 正正是肥熊聚集區, 要上證站穩3200, 恆指才能上企20000水平, 不進則退，以閒閒哋恆指千點周波幅來看，除非做細周波幅，否則下周就要19200-19800爆邊

今日踢上去爆頂高見19926，一如所料大市及多隻權重股又超買了, 技術指標亦跟唔上升勢，上證亦冇破頂，代表港股後市或會有技術性調整，回吐儲力再上

好倉底的市況通常係月初踢高，月中回吐，該月下旬再上攻， 甚至破頂，好明顯近來大行推高港股來配股，空軍持續加沽，是計時炸彈, 小心下周淡友反擊

##############

有分析師說港股近來雖然成交大，不過 Al 炒股軟件顯示近日資金流入遜上周, 大鱷資金流入減少，散戶入市資金增加，即係大鱷踢上去派貨畀散戶，未派哂貨所以港股跌唔落

12月基金經理粉飾櫥窗, 亦有誘因推高出貨來鎖定利潤, 11-12月港股走勢係急升一段就回一回, 消化沽壓, 當儲夠力就破頂, 普遍基金經理中線上望20500-20800

回顧近來港股走勢， 牛味愈來愈濃，恆指底部上移二千多點, 低位見買盤承接, 見短頂後由高位往往回吐大約900-1600點即彈

14597 ----〉18414 ----〉16833 ----〉19737 ---〉18799 ----〉19926

風水術數師說小雪、大雪的一個月, 即係 22/11至 21/12 港股有財氣, 所以急跌急彈, 不過 22/12 冬至轉節氣後要小心

#################

近來市場炒東升西降，美股跌，中港股市升，不過我一直擔心12月中係港股回調時間窗口，所以短線倉已減磅炒波幅, 候低買回博破頂

一年一度的中央經濟工作會議於8-10/12舉行，有望釋出更多支持房地產市場發展的信號, 深圳口岸亮燈，燃點通關希望 ，皆利好市場氣氛

恆指連續兩日急升, 累計反彈逾1100點, 好友想在下周初美國公布 CPI，以及聯儲局議息13-14/12前盡量推高食胡，今晚美國公布 兩個重要通脹數據, PPI 及密歇根大學通脹預期, 如數據強勁或會拖累股市

美國稅局由 1/1/2023 起, 向非美籍炒 PTP / ETF 的股民大幅徵收 10%預扣稅或會拖累美股, 全世界有唔少非美投資者炒美股 PTP / ETF, 大佬! 賺唔到10%卻要繳交10%稅, 豈不是蝕硬? 咁如果想避稅的話, 持貨者 12月豈不是要狂掟貨? 30/11美股見頂回落, 又幾吻合啵!