2023年~港股一月例旺

港股高位反覆，儲力破頂

13/1 周五恆指收21738, 升224點

牛少(42％) 熊多(58％) 利上攻

尋頂市每周有新高

恆指已是連續兩日收市企21500關鍵位之上, 好友繼續控制大局, 即市一跌即彈, 代表港股正在尋頂，按照慣性走勢，要大市見頂後才會急跌，農曆新年/立春前後係最容易變盤轉勢

要留意的是恆指日線 9RSI  已升至82.25, 嚴重超買的問題始終要解決, 淡友積極部署，沽空持續增加

今日恆指國指齊創新高，但科指未能破頂4642, 更是連續兩日頂部下移，反映科企獲利沽壓加劇，QQ美團阿里有暗湧，小心科企累街坊

近來升至21500附近港股出現分化，升勢並不全面，超買股份沽壓特別大， 甚至逆市下跌, 中移連日上升代表大鱷托沽派貨，大鱷玩輪流炒來推高大市掩護出貨

人民幣強爆續升, 收報6.7099，升466點子，創去年7月11日以來新高, 外資日日大手掃入A股，上證企穩3150繼續上攻，美股登高, 通關復常, 阿爺撐平台經濟，內房有水到，美聯儲開始放鬆貨幣政策, 皆提振市場信心， 問題係一眾利好消息已反映，港股升至現水平買盤縮，托住大市來配股和畀時間指數/個股貼價牛出世

上證收3195, 重上3200大位不難，上證3050時元帥說大落後, 港股高處不勝寒，22000阻力超大，但上證風險較細，已不斷催促大家入貨, 如今上證已去到 3200關前

~~~~~~~~~~~~~~

淡友防線22000

近日恆指多次下探21200附近都急彈, 有資金入市博上千點見22000-22500, 去年12月有多位分析師預測今年首季最樂觀見23000, 如今已紛紛上調目標，唔夠貨的基金及散戶都趁即市調整追貨，在修復估值的憧憬下，唔少落後股都見買盤追入

目前牛熊都非常貼價，雖然熊較肥，小心大鱷又玩好淡通殺，因為牛牛已上移至21400水平, 於大升浪當中見貼價牛出世就係高危訊號， 港股隨時會見頂回落，其實科指QQ、美團、港交所已率先見頂

22000 係淡友最後防線, 阻力非輕，如上攻打回頭就要插穿21500, 如能收於22000之上，向上就會挑戰 22500.23000，不過未必係1月見

下星期非常關鍵，可能係轉折周，要留意何時出現高點, 長假期前獲利避險沽壓會大增，港股或會作出調整, 好友或會預留農曆新年後或2月的上升空間

~~~~~~~~~~~~~~~~~

成也QQ、敗也QQ

近日幾度挑戰21700窒一窒皆因有短炒莊家食胡, 不過主力控盤大莊家仍看好後市坐定定等食大茶飯, 過去兩日滬深大媽大手狂丟QQ, 但今日卻突然變臉大手掃入, 推動 QQ 及港股急升, 科指亦受惠結束三連跌， 農曆新年長假期在即 ，下周一二三係大媽 沽貨的最後機會， 如果大媽大手走貨就會拖低港股

5/1 QQ除淨派發美團後, 美團莊家日日走貨, 惠譽確認美團長期外幣發行違約評級為「BBB-」 展望負面, 資金流入舊經濟股, 中移表現亮麗, 代表大鱷利用中移托市, 來掩護派發其他股份

美國銀行股揭開美股業績期序幕, 老早已預告12月美企因稅務問題沽壓特別大 ，1月上旬美股走勢會好轉，不過美國最快會在下周四（19/1）達到31.4萬億美元的債務上限, 財政部需要採取某些非常措施來避免違約, 另外1月下旬亦要小心 聯儲局議息會引起金融市場波動

好友等緊中美股市 推動港股更上一層樓，不過要看淡友 會否 於22000攔路

回顧去年有6個月恆指月波幅是2150-2850點，目前已做了2467點，恆指月波幅已進入達標範圍，好友隨時食飽鬆人

總結全周, 恒指累升747點或3.56%, 國指全周升3.47%, 科指升幅最細，全周升2.79%，恆指國指本周4升1跌, 但科指卻是2升3跌, 反映科指動力已轉弱, 臨危托沽

港股繼續尋頂，21500好淡角力

12/1 周四恆指收21514, 升78點，連升兩天

牛少(46％) 熊多(54％) 利上攻

恆指連升兩天續創新高，但科指卻走弱連跌三天，今日亦冇升穿昨日高位，反映資金由新經濟股換碼舊經濟股，大鱷以輪動方式來推高大市，不過Al顯示港股回調壓力仍大，超買依然，不過今個星期係收升周，好友一直咬住高位唔放，不斷挑戰21700水平，只要上破就能擴大周及月波幅

美元弱雞， 人民幣唞咗兩日又升過，收6.7565，升210點子，強爆，上證急跌後收復失地，人仔強，內地股市生猛哂，連港股都跌唔落

昨日已說牛熊都係命危，今日果然先衝高殺熊，再急跌屠牛，然後再急彈 收復失地

港股強勢繼續即市完成調整，惟淡友節節敗退仍未放棄，沽空急增至16.04％（$256億),牛市順勢應見回吐買上, 港股未見頂, 做淡係高危動作, 

今日 終於收21500關鍵阻力位之上，好友勝， 除非本周炒特細周波幅，否則明日21200及21700就要爆邊殺牛熊， 港股動力指標已轉弱，正在消化沽壓， 於高位震蕩代替深度調整，近日頻頻收陰燭，今日係夾硬升，大鱷推高派貨

～～～～～～～

今日恆指一度大跌212點低見21223, 隨即見買盤湧現，牛熊分佈方面，目前牛熊都非常貼價，牛瘦熊肥

炒中國經濟增長 ，近來老外日日大手掃入A股，但滬深大媽卻繼續大手沽出QQ，係科指收跌的元兇， 如科指弱勢持續，就會拉住港股後腿，恆指高見21698就急回，收窄升幅，皆因QQ受制於$380急插，要等QQ及阿里完成調整，港股才能再上攻

內地股市向上空間大，繼續加注買阿爺，早已說過港股牛市不可清倉，短炒倉可炒波幅，中線倉就坐定定等食大茶飯

下星期一馬丁路德金日，美股假期休市

11/1 周三恆指收21436, 升104點

21500 好淡角力

港股破位而上，續創新高，大舉屠熊，今日恆指高見 21686, 惟淡友反擊，21800關前大量沽盤湧現， 拖累港股收窄升幅，皆因大媽大手沽出 QQ，QQ $380 阻力非常大

19/1 農曆新年長假期前 滬深股通關閉， 未來幾日大媽繼續走貨抑或趁回吐再掃貨，係港股升跌關鍵

內地股市雖然腳軟，但美股走勢轉強，港股夾在中間兩邊都跟， 港股牛氣沖天 ，好友仍主導大市，於21500穿梭，消化沽壓，最大阻力仍在21800～22000，升穿淡友就要買定官才

不進則退，未來兩日 要麼升穿21700，要麼插穿21200 來擴大周波幅， 兩邊都有牛熊待屠， 雖然目前牛少熊多利上攻，但大鱷可以玩好淡通殺，震住上，牛熊都高危

自從5/1恆指升穿21300, 已多次收陰燭，日升日跌派貨格，唔少股份呢幾日都冇跟隨大市創新高， 不同板塊輪流炒高來托市 ，大鱷主力推高 QQ和阿里，來掩護沽出其他股份

上證今日雖然收跌7點，收3161,  不過金融A股逆市急升， 相關H股亦跟住上，帶動國指跑贏恆指，撐住港股

港股大漲小回 繼續尋頂，近來恆指以三個形式來反覆推升：1）即市急跌急彈快速完成調整,  2）收市下跌 50~160點 , 3）衝高回落，收窄升幅，冇跌入肉，4）跌1～2天就 收復失地並升突

只要港股跟上述模式運行，代表好友當道續尋頂，當港股回吐唔跟上述模式，就係高危訊號， 科指已連跌兩天，只要明日續跌， 就打破慣性走勢

港股大漲小回，繼續尋頂

10/1 周二恆指收21331, 跌56點

牛少(43％) 熊多(57％) 利上攻

連日上升的人民幣及上證今日略為回吐，港股借勢作出技術性調整，休息是為了走更遠的路, 1月效應, 不但港股靚仔, 連弱雞的美股走勢都好轉

港股今日窄幅波動，恆指即市波幅大幅縮減至208點，波幅急降係大龍鳳先兆，明日肥熊命危

今日恆指低見21187，淡友如果冇趁港股回吐走鬼就要買定官才， 因為港股每次調整後都能收復失地並升突

雖然牛市趁回調買上易炒過做淡，不過貼價BB牛剛出世，已上移至21100附近， 按照慣性走勢，於大升浪見貼價 牛出世係高危訊號

內地快將放農曆新年長假期，大媽只餘下一個星期時間走貨， 其實近來唔少股份都有托沽散水味，好友大鱷逐個板塊輪流炒，炒高就掟貨，連大媽都走QQ及美團，持貨要睇路，QQ $380 阻力超大

今日金融及屋仔股回軟， 大鱷就轉炒車股及賭業股，QQ 逆市上升，今日QQ已率先破頂，具啟示作用，如果淡友 21500攔唔住就死得，再上阻力在 21800-22000， 係淡友最後防線

9/1  周一恆指收21388, 升396點

港股嚴重超買，回吐壓力越來越大，今日踢高屠熊，亦可能係為了明日月供股票於高位派貨，撐埋今日就跌得，回一回儲夠力就可再殺上去，唔少短炒好友於21500關前食胡， 短炒等回吐再買上

雖然好友當道，但淡友於21400-21500攔路，今日破頂高見21470，惟卻收21400之下, 代表淡友仍未放棄，QQ 收 $362 阻力大位， 如能站穩就有運行

人民幣急升, 怪不得近來老外日日掃入A股, 大媽卻派貨, 皆因19-27/1滬深港通(南向)於農曆新年關閉

上周 5/1 QQ 除淨後美團沽壓仍大, 配股潮沒完沒了，#9626  B站配股抽水, 集資約4億美元, #839 中教控股折讓 8.8% 配股籌 $16億  

港股回調整固、消化沽壓、儲力向上

6/1 周五恆指收20991, 跌60點，結束四連升

牛少(41％) 熊多(59％) 利上攻

今日港股 一如所料作出調整，休息是為了走更遠的路，2023年首周恆指高低位19303-21396, 按照慣性走勢，每月高低位不會在同一星期內出現，代表港股未見大頂, 下周就會破頂而上，向上阻力21500.21800

今日恆指理應插穿20800回補昨日的上升裂口20793-20962， 但低見20862即彈， 港股嚴重超買， 巴郡3/1再出售105.8萬股比亞迪H股, 除淨後的QQ及美團沽壓未除，加上未全數回 補上升裂口是後患, 阿里旗下螞蟻集團主要股東投票結構變化，市場憧憬螞蟻重組將完成，阿里表現一枝獨秀

人民幣強勢越升越有，今日收升143點子，收報6.8588，美元及美國十年期債息齊齊回落，利好股市

昨日恆指高見21396, 當時說 做淡快閃有值博率，今日低見20862, 由高位回吐533點， 按照慣性走勢，市強未見頂不應深潛，理應再挑戰21400-21500

～～～～～～～～

部署破頂屠熊

近來港股每次調整後 都能收復失地並升突及破頂，做淡係逆勢操作，只能快閃，牛市主力應做好買上， 短線高沽低吸炒波幅， 因為唔少股份都超買要回吐，而中線倉繼續坐定定等食大茶飯

一如昨日所說，今個星期恆指周波幅已超標，所以大鱷留力，等養肥熊熊，下周才殺上去， 尋頂市每周都會有新高 ，預示下星期會升穿本周高位21396

今早恆指一度急升231點高見21282, 已經嚇到唔少熊熊雞飛狗走， 雖然港股最終收跌，但淡友熊熊都要蝕住走 ，午後港股一度急跌, 連牛牛都嚇死, 好淡通殺, 大鱷真係奸險

～～～～～～～～

股災的反轉版、暴力上升

回顧今年9～10月 股災，港股出現史無前例的急速暴跌，低見14597, 炒港股的中外基金全面輸到趴街，惟插穿17000碌落地獄時北水大媽 卻無畏無懼密密趁低吸納，11月初彈上17000仍繼續掃貨 ，重倉港股

11月尾可能老外收到風內地1月通關， 當時外資(主力歐資、少量美資) 突然收手唔沽，反手瘋狂掃入港股，推動恆指由28/11低位16833爆上30/11的高位18645, 奠定港股後市飛天的基石， 不過於12月外資掃貨 港股急升 期間，北水大媽卻暗暗派貨出街， 食胡減磅

總的來說，股災時老外走貨撤資，大媽於低位收貨 ，11月尾老外入貨，大媽開始出貨，大媽是在17500樓下大手掃貨，而老外卻在17000樓上才開始大手入貨建倉，老外慢了幾十拍才掃貨，這就可解釋為何升至 20000水平老外仍未食飽，要繼續推上 21000

踏入12月港股繼續反覆急升，28/12高見20099後回氣, 隨著8/1落實通關 的消息，進入2023年港股繼續拔足狂奔，直迫21500仍未有見頂跡象，後市如能上企21500, 就會挑戰21800-22000

下周迎來內地經濟數據、周四美國12月 CPI 以及花旗摩通等一眾美企公布第四季業績

港股連升4日繼續尋頂，大舉屠熊

5/1 周四恆指收21052，升259點

市場繼續炒東升西降，好友踢高中港股市，老外大手掃A股，大媽就掃高港股來派貨，淡友雖然節節敗退，仍於 21400 攔路， 因為港股超買，恆指周波幅已超標，代表大市本周已見短頂，明日歇一歇，留待下周才破頂

港股連日急升後配股潮湧現, QQ 一如所料於今日 5/1除淨美團後獲利沽壓增加, 未知南非大股東會否走QQ，美團亦高危

大量亡命熊於 21400樓上加倉博回吐，真係嫌命長，淡友見港股已連升4日，即將作出調整， 不過牛市做淡係逆勢操作，向下支持20800 / 20500，近來港股的升浪係回吐1-2日後就會重拾升軌，好友當道，做淡只能快閃

今日港股衝高回落，收窄升幅, 只係超短炒莊家食胡，大莊家仍坐定定等食大茶飯，預示港股只係見短頂，大方向升浪未完， 不過升勢過急，高見21396 本周波幅已做夠，或要回調整固，消化沽壓，等養肥熊熊，留力下周再上攻

今日恆指力守21000收，另一個原因係為了托住大市畀20000-20200  BB牛明日出世，因為近日港股升勢過急，輪商來不及發行近牛，要明日及下周一才會有貼價BB牛陸續出世，按照慣性走勢，要貼價牛登場並養肥，港股才會大插

今日短炒好友大鱷散戶齊齊食胡，我都減磅博回吐再買上, 如果想快閃做淡，今朝殺上21396出手有值博率， 今早已說恆指周波幅已超標, 今日轉節氣小寒預示有大變，壓一壓大市升勢

今日輕易上破21000, 逼使空軍走鬼掃貨回補空倉，進一步推大市上21396, 短短幾日恆指升了約2000點, 短炒好友亦食胡, 港股收窄升幅

人民幣走強繼續上升，估計農曆新年前港股會係反覆向上，回顧去年1月上旬港股急升，1月下旬見頂後才回落，收窄升幅

港股牛氣沖天重上牛熊線，以全日最高位收市

4/1 周三恆指收20793, 升647點，連升3天

基金經理12月尾放長假期後回歸，港股上升動力隨即增強，加上大行唱好，推動資金入市炒上

明日 港股破頂屠熊已無懸念， 不過再伸多一腳上去的話，大市就會嚴重超買，周波幅亦超標，加上明日QQ除淨，沽壓會大增

明日轉節氣小寒, 預示有大變，日前預測大鱷於 5/1  QQ除淨前會盡量推港股上山，就係擔心南非大股東及基金於除淨後掟貨，美元雖弱，但連日力守103.4水平，於104穿梭

過去一個月港股的尋頂模式就係每次回吐只會跌1-2天, 然後就會反彈收復失地並破頂，牛市其中一個特徵係對好消息有強烈反應，對壞消息會瞬即消化， 震一震就會重拾升軌

陸Sir分析:  港股2023年第二個交易日繼續發威，主要是靠「中字股」，陸羽仁本周初話2023年睇好「中字股」，它們在新年兩日就發威，特別是去年跌得多的科網及內房股。

兩大板塊過去兩年多慘跌，主要是內地收緊政策，包括對科網股加強監管和對內房財務提出「三條紅線」要求，當時阿爺主要為這兩個充滿泡沫的板塊放氣，以減低可以預見去年美國加息的風險。

隨着兩大行業深度調整，美國加息之路行了大半，中央在去年第4季政策大轉向，向內房射出三支箭政策支持，同時對數碼平台經濟和民企表達肯定態度。在政策由緊轉寬過程中，兩個板塊明顯好轉。踏入新一年前後，外資對內地或中國股市看法漸漸變得正面，相繼發表看好觀點。

港股開年強勢向上突破，恆指重上二萬大關

3/1/2023 周二恆指收20145, 大升363點

今日港股跟足劇本下試10及20天線，旣可屠殺肥牛大震倉，亦可先向下擴大周、月及年波幅，然後才尋頂，是大鱷精心策劃的佈局

恆指最多下跌478點低見19303, 空軍有胡食，基金經理放 聖誕新年長假期後回歸，見大跌趁低吸納博上21000

港股一插即彈， 成交明顯增加, 上月減倉今日趁大鱷震倉就有得執平貨， 內地股市向上空間大，繼續加注買阿爺，早已說過港股牛市不可清倉，短炒倉可炒波幅，中線倉就坐定定等食大茶飯

港股急跌急彈皆因人民幣兌美元強勢爆升464點子, 收報6.905，創逾4個月新高，內地股市低開高走, 上證連升兩日重上3100水平以及美期先跌後揚升，亦加強了好友反擊信心，恆指國指齊破頂，科指大落後，等補漲破頂

恆指閒閒地每周都有千點波幅，上周分析已說上星期恆指做560點細周波幅，本周就會做大波幅補數，今日恆指即市波幅高達909點，先下殺肥牛，後上攻屠熊，好淡通殺， 好友大鱷於本周四（ 5/1 ）QQ 除淨關鍵日之前會盡量推高大市

恆指上企20000大位，500點一級就要上20500.21000....  向上阻力250天線約在20370， 如能突破，再上就要挑戰 20800-21000,  由於後日( 5/1）QQ除淨，要留意明日QQ及美團會否出現異動

今日大鱷屠殺肥牛後， 淡友熊熊飛撲入市，要買定官才喇！ 牛多熊少形勢已變為 牛少熊多，上攻誘因增加，肥熊在20200-20600

30/12 分析指大鱷同基金經理都唔想2022年埋年結恆指收20000之上，亦唔想12月上破20500, 因為2022年第四季恆指季波幅已超標，所以留力2023年第一季才殺上去，就可做新一季的波幅, 而2022年壓低收於20000之下，就可降低2023年的年線收升的門檻，同樣地，今早恆指競價大幅低開211點報19570 亦可降低2023年收陽燭的門檻

2/1/2023 周一中港美股元旦假期休市，歐股表現亮麗，德國DAX指數上升超過1%，法國CAC指數升近2%