KellyChu - 瑞士街頭展示香港地標財爺「說好香港故事」　路人聽到好雀躍｜Executive日記

2023/01/21 03:12:37 網誌分類: 生活

21 Jan

官員要負起「說好香港故事」嘅任務，財政司司長陳茂波便示範如何抓緊機會，佢曾外訪瑞士達沃斯，攞住iPad去街頭，向當地人展示香港嘅文化、美景同美食，邀請佢哋嚟香港旅遊，只見反應好正面，聽完都顯得好雀躍。

財爺陳茂波喺facebook專頁發放一段短片，話剛結束外訪瑞士達沃斯行程，連日除咗同政商界領袖會面外，亦不忘向當地人介紹展示香港地標，包括維港、天星小輪等。財爺攞住iPad，喺街頭向一名女途人展示西九戲曲中心相片，叫佢可帶多啲朋友嚟香港，女途人得知陳茂波係財爺後驚歎：「Wonderful！」，大讚戲曲中心好靚。

當財爺向一位男士自我介紹係香港財務司司長後，馬上得到雀躍回應，話曾喺香港見過佢，好高興再次碰面，財爺亦向佢展示一啲中國剪紙等相片。影片亦見財爺喺一個中東市集，向當地人介紹香港，對方都心領神會點頭示意。

財爺話呢幾次外訪，都抓緊機會向當地人介紹香港文化、美景、美食，邀請佢哋嚟香港旅遊，感受香港活力；佢話無論天氣有幾寒冷或炎熱，都無阻佢哋推香港嘅熱誠，佢仲話︰「香港已經返嚟啦，讓我們同世界各地建立更多友誼，講更多香港故事，展示更多香港優勢！」
Kelly Chu