27~31/1 港股高處不勝寒

31/1 周二恆指收21842, 跌227點，連跌兩天

恆指由上周高位22700跌至今日低位21631, 已回吐逾千點，肥牛陣亡，本周恆指連跌兩天，按照不會全個星期日日跌的慣性走勢，未來三天不會全跌，港股10天線不會一去冇回頭，只要企21800, 就會挑戰22000，今日大鱷壓低大市畀 22200～22600熊出世

上證能否守住3250係港股升跌關鍵, 26-27/1內地農曆假期休市, 有莊家入市掃貨，將恆指由22000踢上22700，呢批短線莊家呢兩日沽貨食胡，不過由20000樓下掃上的大莊家仍重倉港股，可能會托住大市來出貨

今次恆指連插兩棍累計跌逾千點，創1月份最大回吐幅度，進一步確認尋頂市已結束，展開尋底之旅

大媽連續兩日狂沽QQ，QQ跌至$370附近抝腰重上$380水平，可能有淡友補貨平空倉

恆指9-10月股災後連升3個月，1月尾已出現獲利沽貨潮，港股連跌兩日，失守10天線，估計2月份獲利沽壓雖然會加劇，不過恆指回吐逾千點亦會有短炒博反彈，以及持貨少的股民追貨，加上大莊家貨多未走哂，所以港股唔會直落地獄，可能會跌下彈下落20天線

呢兩日港股已經跌親腰骨，往後就算反彈亦會迎來龐大沽壓，連港股好友元帥都唱淡， 代表大市危機未除

2月開局首先迎來聯儲局加息，而市場傳聞6/2中港可免核酸檢測通關

異動日港股暴跌展開尋底屠牛之旅

30/1 周一恆指收22069,  大跌619點，結束三連升

港股成也QQ、敗也QQ

當港股打破了尋頂市每周都會有新高的慣性走勢，就代表 大市要作出深度調整，要向21800.21500.21300進發

過去幾周港股一直跌唔落皆因未見頂，好友力托， 當上周五27/1見頂22700， 1月份已做夠月波幅，好友食胡，港股今日就插得, 估計22000唔撐得幾耐，因為要擴大周波幅就要隊穿10天線, 今個月恆指未見過連跌兩天， 只要明日續跌，就打破慣性走勢， 代表淡友已奪回主導權

由於大莊家仍重倉港股走緊貨，所以今日 插到10天線即彈， 引好友入局接貨，早前人人估22000係頂，冇乜人肯入貨，所以大鱷就抽上22700, 今日再落番22000就會有好友肯入市接火棒，大鱷懂得捉心理

由於市場 情緒樂觀，推上去不愁冇人接貨， 今日港股出現罕有的大成交$2032億，反映有人辭官歸故里, 有人漏夜趕科場, 港股見頂回落，仍未有見底跡象，今日搏反彈 值博率低

～～～～～～～

肥牛命危

今日低見21992即彈上22069收，皆因今日21800-22000牛要出世, 回顧20/1大鱷將恆指踢上22000水平，就係畀21400-21800牛出世， 如今已養到肥肥白白，要買定官才

趁內地農曆新年休市，26-27/大鱷進一步抽上22700挾淡，係虛火上升，當天已見有莊家開始走貨，今日沽得更狠，再加埋大媽回歸大手狂沽 QQ 建行 港交所，內地股市高開低走，拖累港股於期結日大插插， 今日呢一棍唔簡單，大成交暴跌， 必有後著， 期指結算後好友亦縮手

早前曾提出一個論點, 就係去年港股於2月初，即立春後見頂回落， 而今年農曆新年比去年早了一個多星期， 提早於22/1新年, 所以港股今年亦有可能提早於1月尾見頂， 從而推算 今個星期 係港股 高危周，會大插插

～～～～～～～

科企領跌拖低大市

港股累積龐大沽空，QQ阿里 係五大沽空常客，預示後市必有一插，今日QQ就暴跌，由$415碌到落$384，$380及10天線危危乎， 如QQ續瀉，勢必拖累港股

今次港股反艇元帥早已發出預警，提醒大家小心本周中港美三地股市， 今日係異動日或會轉勢向下 ，上周末一眾分析師都唱好中港美三地股市，但元帥卻指出股市有暗湧， 高處不勝寒，已多次指出道指每次上34000沽壓會加劇，上周五高見34164即插

本周外圍要留意三大央行聯儲局、歐洲央行及英倫銀行議息，美國科技股本周為公布業績高峰期，市場關注 Meta、Goolge母公司Alphabet及亞馬遜最新業績及管理層對前景展望

港股連升三天，22800關前獲利盤湧現

27/1 周五恆指收22689, 升122點

下周一（30/1）內地農曆新年長假期後復市，當天港股期指結算，恰好是異動日，小心淡友會反擊，因為恆指月波幅3397點已超標，22800阻力大，今個月冇必要上23000, 不進則退，如要擴大周波幅，就要插穿22300落去回補昨日的上升裂口，向22000進發

1月開局前指出市場最樂觀預測首季可見22000～23000，估唔到短短一個月已到步，好友梗係食胡啦！空軍亦乘機加沽

市場預期內地股市復市高開高收, 所以本周四五多隻A股 ETF 已偷步大幅炒高, 升幅驚人反而令人擔心會否升過龍, 假如內地復市升幅遜預期就會拖低港股，所以呢兩日我連手上的A股ETF都減磅

無論港股抑或指標股都超買，港股溫度計港交所逆市下跌預示大市有暗湧，阿里巴巴莊家沽貨減磅，具啟示作用

1月港股威威已屆尾聲, 港股業績公布期: 2月中 至 3月尾, 因此1月尾開始就會出現盈警/盈喜潮, 相關股份會大幅波動

～～～～～～～

補跌

今個月恆指跌市日數未達標，昨日已預告，如今日不跌，就要小心下周要補跌，內地復市港股或會見光死，北約供應坦克支援烏克蘭，俄烏戰爭或會升級，下周二三聯儲局議息，亦會影響股匯債

人民幣及港匯於1月下旬明顯轉弱，但好友仍不斷推高港股，趁內地休市短短兩日由22000一路夾硬殺上22700, 成交並不配合升勢，今日買盤亦縮減，有莊家出貨

我最擔心〈立春〉的一周終於到了, 小心下周變盤，向上阻力 22800-23000, 大市嚴重超買, 昨日遺留上升裂口 22051-22329 是後患, 所以中港短炒倉已減磅, 因為就算後市再踢上去也不會是全面上升

港股短短3個月累積龐大升幅，恆指由低位14597反彈至今日高位22700, 升幅高達8103點， 當見頂回落，跌幅可以好驚人

大媽於農曆新年長假期前密密走貨, 已多次沽出QQ 建行 港交所等權重股, 呢兩日升了這麼多, 內地復市後大媽會繼續沽貨抑或高追呢？咪當大媽是傻的，梗係走貨啦！