古星輝
古星輝
古星輝

古星輝 - 港首個郵輪5G海上直播|乜都5G

2023/03/10 03:16:19 網誌分類: 經濟
10 Mar
        香港逐漸復常,國際郵輪亦開始返嚟,「名勝世界壹號」今個星期就到咗維多利亞港,準備今晚起航,接載遊客體驗別具特色嘅海上之旅。

為隆重其事,香港中樂團今晚會喺郵輪上嘅直升機坪演出,我哋電訊商亦會大膽嘗試,破天荒喺海上做5G現場直播,等全球觀眾可以喺中樂團嘅YouTube和Facebook同步見證香港嘅精采旅遊盛事!今次係全港首個郵輪5G網上直播,係5G場景應用一大突破。

講到5G直播,相信大家都唔會陌生,喺過去幾年疫情期間,5G直播音樂文化藝術表演、講座、會議、教學等應運而生,但今次喺海上直播,要做到高清、流暢、穩定,難度級別肯定超過十分!
須反覆測試海上網絡訊號

我哋特別為今晚嘅盛事度身配置專用嘅5G網絡資源,服務水平達最高級別。要做到直播流暢穩定,首要處理嘅係訊號接收。茫茫大海,航道縱橫,四周又無屏障,維港兩邊基站嘅信號好容易喺海中心互相干擾。因此網絡團隊須反覆測試海上網絡訊號、調校天線角度,模擬真實場景,減低複雜環境因素對直播嘅影響。

其次,郵輪喺海上航行,位置不斷改變,亦為收發信號添變數。再加上天有不測之風雲,萬一大雨或大霧,要保持5G直播嘅專業質素真係一個好大嘅挑戰。

可能有人會話,勤力啲測試、改善同固定網絡訊號,自然可以熟能生巧。但係呢次場地係海上樓高13層嘅郵輪,我哋嘅工程人員平日只能喺三層高嘅「維港遊」嘅露天甲板模擬測試,即使大家竭盡所能,唔到直播一刻,都唔知真實環境如何。喺唔能夠有正式綵排嘅情況下,要駕馭5G現場直播,真係要有冒險精神,同埋天時、地利、人和。

自古成功在嘗試,我非常欣賞同事勇於接受挑戰迎難而上!希望今晚嘅直播順利,誠邀大家一齊見證呢個時刻!有興趣人士可於今晚幻彩詠香江表演後,約8時10分掃描以下二維碼欣賞5G海上直播音樂會。
和記電訊香港行政總裁
古星輝
■香港中樂團今晚會在「名勝世界壹號」上直升機坪演出。p/  
 ■香港中樂團今晚會在「名勝世界壹號」上直升機坪演出。

   

  
回應 (0)
我要發表
user

網誌分類