古星輝
古星輝
古星輝

古星輝 - 港首個5G智慧港口 撐經濟再起航|乜都5G

2023/05/12 03:20:42 網誌分類: 經濟
12 May
         公司嘅總部位於青衣,喺天台可以遙望藍巴勒海峽同葵涌貨櫃碼頭。我哋同貨櫃碼頭又隸屬同一集團,相互合作盡佔地利。
公司嘅網絡團隊,早前就為葵涌貨櫃碼頭安裝咗5個5G基站,令碼頭成為全港首個應用5G嘅貨櫃碼頭,為碼頭業務全面邁向數碼化,引進5G方案,以及發展為智慧港口作好準備。

葵涌貨櫃碼頭位處海邊,佔地龐大,達279公頃,相等於約15個維園。碼頭嘅四周平坦,附近冇乜高嘅建築物可以起發射站;加上碼頭24小時運作,為咗令工程唔好影響業務運作,建造基站嘅時間亦要精準計算。

同事挖空心思,最後選定喺貨櫃場用作照明及通訊嘅燈塔,安裝5G基站,為貨櫃碼頭提供穩定、高速嘅5G連接,以及充裕頻寬,覆蓋荔景、美孚、青衣一帶,以至昂船洲沿岸,為碼頭打造強勁嘅5G通訊網絡,迎接數碼新時代。
葵涌貨櫃碼頭競爭力提升

有咗好嘅5G基礎建設,貨櫃碼頭隨即開始咗幾項先導計劃,體現5G萬物互連嘅優勢。其一是以5G通訊網絡取代Wi-Fi及光纖,遙距操作龍門架吊機。另外,有咗全面嘅5G覆蓋,又可以喺碼頭閘口,安裝有人工智能檢測功能嘅閉路電視,加強保安。

最近,我哋更開始喺岸邊吊機上安裝以5G連接嘅閉路電視系統,用嚟監測泊位嘅交通情況及船舶嘅營運管理。有咗5G,再配合人工智能、雲計算、大數據、機器學習等新科技,可更有效提高貨櫃碼頭營運嘅精準度、安全績效及營運效率。對於提升貨櫃碼頭整體競爭力,亦有莫大幫助。

5G連接廣、超高速、低時延、高容量,對於要處理吞吐量龐大嘅大型貨櫃碼頭來講,簡直如虎添翼!聽講新加坡正打造全球最大嘅自動化貨櫃碼頭,而且亦已經講緊要喺2025年中前,實現海上5G全覆蓋;要贏人先要贏自己,睇嚟我哋要加快步伐喇!
和記電訊香港執行董事及行政總裁
古星輝
■葵涌貨櫃碼頭已安裝5G基站,成為全港首個應用5G的貨櫃碼頭。資料圖片
 ■葵涌貨櫃碼頭已安裝5G基站,成為全港首個應用5G的貨櫃碼頭。資料圖片 
回應 (0)
我要發表
user

網誌分類