KellyChu - 警隊2名實習生擔大旗做創作舵手 素描警隊建築物月曆奪國際設計金獎｜Executive日記
2023/05/25 03:20:24
網誌分類:
生活
仔細觀察 畫出神髓
表揚全球傑出宣傳品嘅國際年度設計大獎「ASTRID Awards 2023」四月公佈得獎名單，警隊獲得八個獎項，其中公共關係部獲兩金、兩銀、兩銅同一個榮譽獎項，警察學院亦獲一個榮譽獎項，成績斐然！最值得注意係金獎作品「2023月曆─警隊建築物」，因為背後創作舵手，係兩位二十出頭嘅警隊暑期實習生Victoria同Karen。
《警聲》報道話，呢兩位女生去年六至八月到公共關係部實習，期間被委以重任，負責設計部門月曆，收集意見後，決定以警隊建築物為設計主題，並嚴選包括麥景陶碉堡等十二幢富歷史性嘅警隊建築物，對應十二個月份，並用電腦繪畫建築外觀。喺海外大學修讀社交媒體設計嘅Victoria就分享話，畫前水警總部「1881」同舊油麻地警署嘅難度最高，要多次到場勘察，先保證畫得出神髓！另外，月曆設計都好有心思，例如建築物名稱以田字格同手寫字體展示，顯示中國特色等。
就快大學畢業嘅Victoria形容，好意外可以獲得國際設計金獎，佢衷心感謝公共關係部畀實習生掌舵嘅機會，同時亦畀好多創作自由佢哋，希望市民可以透過作品，加深對香港警隊歷史建築嘅理解！
Kelly Chu
■實習期間，Victoria（右一）與另一實習生和公共關係部人員討論月曆設計主題。
■月曆頂部印有香港地標建築，方便用家轉換頁面，兩側由警察總部外形的咭紙承托，設計滿載心思。
■Victoria和另一實習生所設計的警隊月曆獲得國際設計金獎。
回應
(0)
我要發表