KellyChu - 泳隊汪順　體操張博恆　排球於垚辰 國家隊男神耀眼 顏值實力兼備｜Executive日記

小妹昨日同大家介紹今屆亞運國家隊才貌兼備嘅靚女運動員，相信大家睇到眼花繚亂，怦然心動。今日就繼續同大家盤點下國家隊有咩男神！

首先不得不提嘅，當然係有中國「泳隊男神」之稱嘅汪順。29歲嘅汪順身高1米92，肌肉結實，皮膚白皙，更重要係，樣貌神似台灣男星許光漢。喺上周日嘅男子200米個人混合泳決賽，汪順以打破亞洲紀錄奪冠後，激動揮舞雙手，向現場觀眾做出「第一」嘅手勢，瞬間迷倒大片粉絲，並且紅到去韓國，成為一眾韓國女網民嘅「老公」。

講到健美身材，當然少不了體操隊員。年僅23歲嘅張博恆，當仁不讓成為新一代「體操王子」。喺前日嘅男子體操個人全能，初賽排名第一嘅張博恆，喺決賽6個單項中，5項排名第一，1項排名第二，最終繼團體賽後再奪金。比賽中佢沉著穩定嘅表現，同埋身體優美嘅線條，相信「謀殺」唔少菲林。

今年中國男排取得一面銀牌，相信觀眾對首發嘅28歲「排球男神」於垚辰並唔陌生。人稱「中國男排第一帥哥」嘅佢，早於2016年就當選中國男排聯賽最受歡迎運動員。

Kelly Chu