KellyChu - 科大學生3D打印月餅夠創意 客製化訂造食得健康｜Executive日記

今日係中秋節，一家團聚，一定要食月餅。不過大家食過3D打印嘅月餅未呢？科技大學一班綜合系統與設計學系嘅博士生，就喺助理教授李桂君帶領下，製作出全港首批利用3D打印技術印製嘅月餅。呢批印有科大校徽嘅月餅，口味都幾多，有紫薯、奶黃味，仲可以根據客戶要求，度身訂造材料同份量，食得健康啲！

科大呢部食物打印機真係好先進，10分鐘就可以整一個月餅，未來仲只要5分鐘。團隊亦將加入加熱功能，所以日後無論整月餅、曲奇或甜品，都係整完就熱辣辣，做到製作烹調「一條龍」。現時團隊已就技術申請專利，希望之後可以大量生產，等大家試下！

另外，唔少市民關心，今晚可唔可以一家大細去賞月。小妹早前就同大家介紹過天文台派發嘅「賞月錦囊」，不過天氣幻變，天文台就再提醒，今日至周日都時晴時雨，但今晚都有機會喺雲隙間睇到月亮嘅！

Kelly Chu