頭條戲場 - 《劫機1971》好似睇緊《Top Gun》 | 頭條戲場
2023/10/12 03:00:07
網誌分類:
生活
好鍾意睇真人真事改編的電影，因為每次睇親都覺得劇情好離譜、好假，但真實世界確實有發生過，睇到好嬲，然後你會感恩，發覺呢個世界對你原來唔係咁差。電影改編自1971年發生在韓國的一單劫機事件，被逼退出南韓空軍，轉職商用客機副機長的泰仁（河正宇飾），以一力敵劫機者庸旲（呂珍九飾），劫機片套路全部齊晒，緊張、驚險、煽情乜都有，機師有型，空姐玉順（蔡秀彬飾）又靚，最重要拍過《白頭山：火山浩劫》的金盛漢導演，將《劫機1971》拍到好有《壯志凌雲》Feel，其實幾驚喜。（上映中） 撰文︰廖思慧
男主角河正宇在訪談中表示：「《劫機1971》係我拍過最攰嘅戲，因為劇組喺片場搭咗一架真實尺寸嘅飛機，而飛機下面有一個搖晃機，所以真係好似飛緊一樣。」同埋，河正宇飾演的副機長由頭帶到尾，乘客有爭執，勸交係佢、同劫機者談判係佢、連隻揪劫機者都係佢，仲要揸飛機呢，難怪拍到攰嘅。
高空追逐好刺激
電影有別一般劫機片，描述乘客人性唔算深入，反而因為客機被逼越過休戰線進入北韓時，戰鬥機對民航機發出射擊警告，帶領觀眾進入劇情高潮，民航機不斷閃避戰鬥機，前者360度環迴旋轉，又突然減速令機身垂直後翻轉倒飛，再翻半圈回復水平飛行，好似睇緊《Top Gun》，黐線勁緊張呀。
片長100分鐘，緊張位佔咗8成，難得煽情位唔算過分賣弄，CG特效逼真，故事節奏明快無可挑剔。好多觀眾都覺得疑惑，全機60人，得一個𡃁仔劫機者都制服唔到佢？呢個世界講就真係好無敵。為呢單真實事件感到難過，睇返有關歷史，英勇副機長真係用身體擋炸彈，希望佢嘅後人都能一生平安。
頭條戲場
本是空軍的泰仁轉揸民航機，全靠佢60名乘客全部獲救。
機長在劫機時一樣保持冷靜，負傷帶領乘客們逃出生天。
空姐玉順亦好幫到手，穩定乘客情緒，又幫手救人。
泰仁希望跟庸旲談判但失敗，後者逼前者下跪。
劫機者庸旲因在南韓被屈坐監，放監後阿媽死埋被逼走上絕路。
導演有請教現實中的機師，確保飛機飛行時符合現實。
當年缺乏安檢，劫機者拎住三個土製炸彈都可以上機。
乘客包括呢位袋住成身錢的老細，炸彈一爆，執返啲錢先。
成東鎰(右)飾演機長圭植，劫機後期因傷而睇唔到嘢，要全靠副機長揸飛機。
回應
(0)
我要發表