KellyChu - 「煤氣綠火焰未來實驗室」下月現身中環街市 煤氣公司夥小黃鴨主題巴士啟程載客｜Executive日記

煤氣公司一直致力轉型成為低碳能源供應商，而為咗推動環保，仲同本地原創人氣角色B.Duck小黃鴨合作，推出兩架主題巴士，今日起會率先啟程接客！小妹就覺得，車身上嘅B.Duck真係cute到爆，佢哋誠邀大家下月到中環街市參加「煤氣綠火焰未來實驗室」，邊玩邊學能源科學知識，相信一定好多小朋友捧場！另外，車身亦印有關於煤氣公司嘅環保訊息，同市民介紹下公司嘅低碳轉型進程。

車身印煤氣公司嘅環保訊息

兩輛主題巴士今日起至11月13日會喺路上行走，分別係來往西灣河嘉亨灣至中環港澳碼頭嘅城巴2號線，以及來往堅尼地城至深水埗白田邨嘅城巴104號線。「煤氣綠火焰大使」B.Duck化身成為煤氣公司工程師同實驗室人員，邀請市民下月到「煤氣綠火焰未來實驗室」，參加親子展覽、STEAM工作坊、古蹟文物遊等活動；到時完成指定項目，仲可以贏取限量Towngas×B.Duck精品！

煤氣公司亦同B.Duck打造一列主題電車，10月24日起會穿梭港島。大家如果喺街上見到主題巴士同電車，記得影相打卡呀！另外，煤氣公司亦藉此機會，向公眾介紹，依家煤氣公司生產嘅人工煤氣，其中一半成分係氫氣，而從煤氣抽取氫氣使用，未來有望用作驅動氫能巴士，帶動低碳經濟。

Kelly Chu