KellyChu - 迪士尼新景點下月迎粉絲 Frozen園區好玩到唔捨得走｜Executive日記
2023/10/14 02:59:36
網誌分類:
生活
香港迪士尼樂園Frozen園區下個月20號就正式開幕喇，Kelly幸運地可以喺開幕前率先入園體驗，兩個新遊樂設施「魔雪奇幻之旅」同埋「雪嶺滑雪橇」都刺激好玩，阿德爾港畔餐廳嘅北歐美食更令小妹味蕾大滿足。
園區以迪士尼經典電影《Frozen》為主題，重塑故事中以古代挪威為背景嘅阿德爾王國。講到《Frozen》，好多人都會自然諗起《Let It Go》呢首歌，小妹噚日體驗「魔雪奇幻之旅」嘅時候，愛莎公主現身施展冰雪魔法並演唱《Let It Go》，沿途仲遇見其他栩栩如生嘅角色，真係非常精彩震撼。
喺阿德爾森林嘅「雪嶺滑雪橇」係一個家庭式過山車，適合大人細路一齊玩，坐上雪橇後可以欣賞到整個王國嘅自然風光，刺激又好玩。玩到攰當然係去醫肚，阿德爾港畔餐廳有4款北歐主菜，分別係港畔海鮮燴、小鎮芝士火腿雞肉卷、掌櫃秘製羊膝及森林貓耳粉。小妹揀咗香港較少食到嘅羊膝，搭配肉汁，大件夾好味。
阿德爾王國舉辦夏雪節慶祝活動紀念皇室姐妹之間嘅真愛，所以園區內處處洋溢節慶氣氛，遊走於小鎮同森林之間，都會遇上熱情嘅阿德爾居民款待。
Kelly Chu
■坐上雪橇後可以欣賞到整個王國嘅自然風光。
■阿德爾港畔餐廳其中一款主菜掌櫃秘製羊膝。
■安娜與基斯托夫演唱《For the First Time in Forever》。
■香港迪士尼樂園魔雪奇緣世界「魔雪奇幻之旅」。
回應
(0)
我要發表