KellyChu - 梵高莫奈名畫 故宮博物館有得睇｜Executive日記

文青Kelly好興奮，因為終於可以親眼見到梵高畫作真跡喇！香港故宮文化博物館同英國國家美術館合作，今日起舉辦「從波提切利到梵高：英國國家美術館珍藏展」特別展覽，展出共52幅名畫，除咗梵高晚期作品《長草地與蝴蝶》，仲有莫奈嘅《鳶尾花》、高更嘅《窗前果盆和啤酒杯》等，時間橫跨15世紀至20世紀初，從文藝復興到印象派時期，真係視覺盛宴！

今次展覽仲設有以梵高《長草地與蝴蝶》為靈感製造嘅互動媒體裝置，重現梵高晚年入住嘅精神病院對出草地，觀眾走入裝置後，可以體驗畫作《長草地與蝴蝶》嘅場景，感受梵高當時嘅精神狀態；畫作背後嘅燈光，亦會由黃色漸變成綠色，模擬光線變化下畫作嘅變化，並投射蝴蝶喺畫作上飛舞。

設「歷險旅程」觀賞路線

另外，展覽設有專為學生而設嘅「歷險旅程」觀賞路線，包括尋寶遊戲、猜謎遊戲等，等佢哋可以觀察名畫細節，喺娛樂中學習。

香港故宮文化博物館長吳志華就話，今次展覽籌備近兩年，預計入場人數超過30萬人次！

Kelly Chu