KellyChu - 滙豐銀杏館倡「退而不休」 7旬翁獲聘「運包員」 開心讚有意義｜Executive日記

為改善長者生活質量，同時實踐「退而不休」理念，滙豐銀行慈善基金就同社聯及「銀杏館」推出「滙豐香港社區夥伴計劃」，昨日更請到受惠長者到場分享。其中年逾7旬嘅陳伯獲聘為「運包員」，每日為弱勢社群提供新鮮麵包，仲大讚工作好有意義！

計劃下，「銀杏館」推出名為「杏福補給站2.0」嘅自助麵包機，聘請長者及弱勢社群製作「愛心麵包」，供基層領取。現年74歲嘅陳伯，已獲聘「運包員」10個多月，每朝會送新鮮麵包到自助麵包機。佢話，機構上門探訪嗰陣，就請咗自己，又大讚工作好有意義：「有好多人都慘過自己，幫唔到大忙就幫小忙」。

計劃今年撥款1800萬元予27個社福機構，捐助30個社區項目，料約13萬人受惠。另外，計劃本月17日會喺中環遮打道行人專用區舉辦「滙豐香港社區節」，現場設有大型裝置展覽沉浸式體驗、巨型扭蛋機和多元文化舞台表演等，大家仲可以同視障導師學習扭氣球！

Kelly Chu