KellyChu - 斥毫無根據行為　盼下屆選舉改善 葉劉不滿被抹黑撤2蚊優惠｜Executive日記

今次區議會選舉新民黨贏得15個席位，主席葉劉淑儀（Regina）對成績滿意，不過就有少少怨言，話選舉期間，有人抹黑佢要求取消長者2元乘車優惠，結果影響選情，話希望下屆選舉可以改善！其實早喺11月，Regina已經拍片澄清「絕無此事」，所以小妹覺得今次佢有啲嬲，都可以理解！

Regina昨日喺記者會話：「呢次選舉雖然我沒參選，但都不斷被人抹黑。直至投票前幾日，仍然有啲基層市民好嬲咁衝過嚟同我講，話『我唔投畀你，因為你取消2蚊雞』。其實我從來沒講過取消2蚊雞，但我哋好多候選人都知道，多區嘅討論平台或者單張都係話，新民黨要取消2蚊雞。其實絕沒此事！呢個抹黑影響我哋喺公屋區嘅支持率，所以我都唔知咩人做喇，無從跟進喇，但我對於一個應該係君子之爭嘅選舉，出現呢啲毫無根據嘅行為，表示極度遺憾，我希望下屆可以改善。」

Kelly Chu