KellyChu - 記得嚟星島頭條攤位拎禮物 Chill 11開幕喇 3大主題等大家體驗｜Executive日記

香港貿易發展局今日起至下星期二（23至26日），喺亞洲國際博覽館舉辦「潮活11」（Chill 11），以「Chill好玩」、「Chill文創」及「Chill著數」三大主題，打造文創娛樂新蒲點，為市民旅客帶嚟佳節至Chill體驗。另外，大家只要親臨星島頭條攤位（Hall 3-E28），即場下載星島頭條APP，並成為新會員，即可獲得迎新禮物，千祈咪錯過呀！

Kelly好想參加「Chill文創」嘅多個工作坊，學習用牛仔布做環保玫瑰或者鎖匙扣，體驗製作保鮮花玻璃瓶手工藝、彩繪石頭等，學到新技藝之餘，亦可以同家人朋友分享有趣體驗。仲有工作坊教寫西洋書法去DIY聖誕卡，自製送畀人，更有心意。4日共設有約30場工作坊，門票會喺活動開始前1個鐘登記派發，先到先得！

「Chill好玩」除咗邀請到多名藝人作星級表演，亦有街舞、街頭音樂、競技啦啦隊及跆拳道表演等，場內擺設嘅8米高萬花筒聖誕樹及「巨型聖誕水晶球」，亦好有創意，小妹推薦大家去打卡留念。

Chill 11入場劵收費30元，兒童、全日制學生及65歲或以上長者免費。現場更會設有壓軸大抽獎，幸運者有機會贏取雙人來回曼谷機票，真係「Chill著數」！

Kelly Chu