KellyChu - 「喜雙逢」情比金堅 葉劉美照「雙發」賀新春情人節｜Executive日記

今日係情人節，相信唔少情侶都甜甜蜜蜜。一向悉心打扮嘅行會召集人、新民黨主席葉劉淑儀（Regina），昨日就率先祝願市民情人節快樂，又喺Facebook大派福利，上載兩幅美照，分別身穿紅、綠碎花連身裙、手持鮮花，引得網民大讚「姐姐好靚」！

網民大讚：姐姐好靚

Regina話，今年情人節正值大年初五，浪漫日子適逢農曆新年，祝願天下有情人喺呢個「喜雙逢」日子倍添甜蜜，情比金堅。

佢又建議，未有情人和朋友，都可以趁喜慶日子同親朋好友共聚慶祝，樂也融融。帖文發表不足3小時，就有逾400個like。

Kelly就發現，原來Regina大年初一起已經連續4日發美照，初一就以「龍馬精神、萬事如意」為題，特登身穿帶百合圖案嘅紅色旗袍，同市民拜年。唔少網民相當受落，紛紛同Regina送上新年祝福。

Kelly Chu