KellyChu - 登Google熱搜榜首 Chubby Hearts首日6.5萬人打卡｜Executive日記

由著名設計師Anya Hindmarch構思、香港設計中心策展嘅「Chubby Hearts Hong Kong」巨型飄浮紅心，周三起快閃香港，昨日就去到中環街市，吸引好多市民到場打卡。而據嘉柏市場策略研究有限公司統計，Chubby Hearts首日總參觀人次為6.5萬，其中遊客佔20.7%，大幅超出預期。另外，活動首日，呢件盛事仲一度登上Google趨勢熱搜榜首！小妹聽完，唔自覺「嘩」咗一聲，勁呀！

Chubby Hearts昨日飛到中環街市，唔少市民到現場打卡，有一家大細特意到場大合照，亦有市民「舉高隻手」，做出親手拖住紅心嘅效果。其中鍾先生特意帶女兒到場合照，佢話之前見到很多朋友share Chubby Hearts嘅相，覺得好有意思，又大讚：「幾好，多啲打卡點，多啲正能量，香港都好啲」，強調要支持香港舉辦更多類似盛事！

Kelly Chu