KellyChu - 更生輔助犬改善在囚者心理 | EXECUTIVE日記

Kelly昨日出席懲教署周年記者會，品嘗到在囚人士準備嘅茶點之餘，亦都認識咗兩隻「更生輔助犬」及懲教署新引入嘅「機械巡邏犬」，前者幫助輔導在因人士情緒，後者協助署方巡邏工作，兩款「犬」已於年初開始效力。

　　在囚人士為記者朋友預備咗咖喱角、生果撻及杏仁酥等茶點，仲有手繪賀年曲奇，好有心。記者會上，懲教署回顧過去一年嘅工作，同時都介紹咗兩款工作「犬」畀大家認識。

　　懲教署今年1月推行「更生輔助犬服務」，由兩隻通過懲教署領犬員訓練成更生輔助犬，為參加者提供動物輔助治療，希望在囚人士藉着與輔助犬嘅互動，可以改善情緒和心理健康。有在囚人士指，與輔助犬互動，成功改善其焦慮情緒。   

　　懲教署上月起亦於石壁監獄進行「機械犬巡邏系統」測試，協助懲教人員執行圍牆及院所周邊嘅巡邏工作。

　　機械犬能夠按預設路線自動巡邏，同時傳輸實時影像至遠端工作站，巡邏期間懂得避開障礙物及探測溫度變化，如偵測到任何人士闖入禁區範圍或失火等，就可以幫助懲教人員應對突發事件，加強保安。

　　署方多管齊下改善和提升工作效能，值得欣賞，小妹樂見兩款工作「犬」未來能夠繼續一展所長，成為懲教署「寵兒」。
Kelly Chu